नगर प्रमुख वासुदेव थापालाई आफ्ना नागरिकको चिन्ता, सम्पर्क बिहिनहरुका आफन्तलाई सम्पर्क गर्न आग्रह
भक्तपुर, ११ भदौ । सूर्यविनायक नगरपालिकाका प्रमुख वासुदेव थापाले यही भदौ १० गते बुधबार रसुवाको भोटेकोशी नदीमा आएको अकस्मात बाढीका कारण सम्पर्क बिहिन हुनुभएका आफ्ना नागरिकका परिवारलाई नगरपालिकामा सम्पर्क गर्न अनुरोध गर्नु भएको छ ।
उहाँले बिहिबार आफ्ना नागरिकका नाममा सार्वजनिक आव्हान गर्दै भदौ १० गतेको भोटेकोशी बाढीको विपदजन्य घटना पछि सम्पर्कमा नआएका नगरवासीलाई विवरण सहित सम्पर्क गर्न आव्हान गर्नु भएको हो ।
सूर्यविनायक नगरपालिका वडा नं. १ देखि १० सम्मका स्थायी वा अस्थायी बासिन्दा रसुवा, नुवाकोटलगायत विपद प्रभावित क्षेत्रमा कार्यरत रहेको वा भ्रमणमा रहनुभई भोटेकोशीको बाढीपछि सम्पर्क विहीन भएकोे भए उहाँहरूको नाम र हाल रहेको स्थान एवं व्यक्तिगत विवरण यथाशीघ्र आफ्ना वडा कार्यालय वा सूर्यविनायक नगरपालिकाको विपद् व्यवस्थापन शाखामा उपलब्ध गराइदिन आव्हान गर्नु भएको छ ।
उहाँले नगरपालिकाले विवरण संकलन गरिरहेको र सम्पर्क विहीन रहनुभएका सबैको सकुशल उद्धार गर्न आवश्यक पहल गर्ने जानकारी दिदै देशमा आएको विपत्ति र यसबाट भएको जनधनको क्षतिप्रति गहिरो दुःख व्यक्त गर्नुभयो । नगरवासीलाई वडा, नगरपालिका र सिंगो जनप्रतिनिधिको साथ र सहयोग रहने बताउदै सम्पर्कविहीन रहेका नागरिकहरुकोे सकुशल उद्धार र शीघ्र सम्पर्कको नगर प्रमुख वासुदेव थापाले कामना गर्नुभयो ।
वडाध्यक्ष पुष्पराज बस्नेतको आव्हान :
त्यसैगरि सूर्यविनायक नगरपालिका वडा नं. ८ का वडाध्यक्ष पुष्पराज बस्नेतले पनि रसुवा लगायत देशका अन्य विभिन्न जिल्लाहरूमा गएको विनाशकारी बाढीका कारण सिर्जना भएको विषम परिस्थितिप्रति वडा कार्यालयको गम्भीर ध्यानाकर्षण भएको बताउनु भएको छ ।
देशमा आएको यस विपत्ति र दुखद घडीमा र बाढी प्रभावित क्षेत्रहरूमा आफ्नो वडा सूर्यविनायक–८, सिपाडोलका कोही पनि बासिन्दाहरू सम्पर्क बिहिन भएको भए उनीहरुको अबस्था यकिन गरि खोजी तथा उद्धार गर्न अत्यावश्यक रहेको बताउनुभयो ।
उहाँले आफ्ना वडा भित्रका परिवारका सदस्य वा आफन्तजनको हालको अवस्था (सकुशल रहेको वा सम्पर्कविहीन भएको) बारे यथाशीघ्र भाइबर (Viber) वा ह्वाट्सएप (WhatsApp) नम्बर ९८५१२०१५५८ सम्पर्क गरि जानकारी गराइदिनुहुन सम्पूर्ण वडावासीहरूमा अनुरोध गर्नु भएको छ ।
कोही सम्पर्कमा नआएको भए सम्बन्धित निकायसँग समन्वय गरी आवश्यक उद्धार तथा खोजी कार्यमा सहयोग गर्ने बताउदै दुखद समयमा उद्धार र खोजीका लागि सम्पर्क र समन्वयका लागि आग्रह गर्नु भएको छ ।
