भक्तपुर, ३० जेठ : नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले जिल्ला समन्वय समिति भक्तपुरका नवनिर्वाचित प्रमुख इश्वर थापालाई सबै नगरपालिका र दलसँग समन्वय गरेर विकासका काम गर्न निर्देशन गर्नु भएको छ ।
आज ओली निवास बालकोटमा आयोजना गरेको बधाई तथा शुभकामना कार्यक्रममा थापालाई टीका तथा खादा लगाएर बधाई दिदै भक्तपुरको समग्र विकासमा पार्टी र चारवटै नगरपालिकासँग समन्वय गरेर काम गर्न आग्रह गर्नु भएको हो । भक्तपुरको बिकासलाई सबै मिलेर अगाडि बढाउनु पर्ने बताउदै उहाँले बिकासलाई पहिलो प्राथमिकतामा राखेर निर्णय गर्न निर्देशन गर्नु भयो ।
कार्यक्रममा एमाले पोलिट व्यूरो सदस्य महेश बस्नेतले तीन तहकै सरकार, जिल्लाका चार नगरपालिका तथा रोकिएका बिकासलाई अगाडि बढाउन जिल्ला समन्वय समितिको भूमिका प्रभावकारी रुपमा निर्वाह गर्ने अपेक्षा गरेको बताउनु भयो ।
ओली निवासमा एमालेका केन्द्रीय सदस्य एवं भक्तपुर इन्चार्ज सोम मिश्र, सूर्यविनायक नगरपालिकाका प्रमुख वासुदेव थापा, जिससका निवर्तमान प्रमुख नवराज गेलाल, निवर्तमान् उपप्रमुख सरिता कुँवरलगायतले पनि बधाई तथा शुभकामना दिनु भयो ।