भक्तपुर, २३ चैत : भक्तपुर नगरपालिका वडा नं. १० स्थित एक गाई फार्ममा आज आगोलागी हुँदा चार वटा गाई मरेका छन् भने केही गाईहरु घाईते भएका छन् ।

कमलबिनायक पाईपलाईनस्थित सुकुना फार्टमा सिन्धुपाल्चोक मेलम्ची नगरपालिका घरभई हाल कमलबिनायक पाईपलाईनमा गाई फार्म सञ्चालन गर्दै आउनु भएकी लक्ष्मी पुरी गिरीको गाई फार्ममा आगोलागी हुँदा चारवटा गाई जलेर मरेको, फार्म जलेर नष्ट भएको र केही गाई घाईते भएको जुद्ध बारुण यन्त्र भक्तपुरको प्रमुख विजयप्रसाद धौभडेलले जानकारी दिनुभयो ।

विद्युतको लाईन सर्ट भई आगालागी भएको जानकारी आएपछि जुद्ध बारुण यन्त्र भक्तपुरको दमकलले आगो निभाएको थियो । जस्ताको टहराको फार्ममा लागेको आगोले पराल, भुसालगायत जलेका छन् । प्रहरीका अनुसार आगोलागीबाट करिब आठ लाख भन्दा बढीको क्षति भएको छ ।