सबैलाई भागवण्डा पुर्याउन नेकपा एकीकृत समाजवादीबाट मन्त्री हेरफेर, मन्त्रीमा फेरी गैर सांस्द थपिए

काठमाडौं, २२ जेठ । नेकपा एकीकृत समाजवादी पार्टीले आफ्नो मन्त्रीहरू हेरफेर गरेको छ । मन्त्रीहरूले प्रेमबहादुर आले, रामकुमारी झाँक्री, विरोध खतिवडा र किसान श्रेष्ठलाई फिर्ता बोलाउँदै उनीहरूको ठाउँमा नयाँ मन्त्रीको नाम सिफारिस भएको छ ।

समाजवादी अध्यक्ष माधव कुमार नेपालले मेटमणि चौधरी, शेरबहादुर कुँवर, जीवनराम श्रेष्ठ र हिराचन्द्र केसीलाई मन्त्री बनाउन प्रधानमन्त्री समक्ष सिफारिस गरेका हुन् । सिफारिस भएका मध्ये शेरबहादुर कुँवर गैर सांसद हुन् । सुदूरपश्चिमबाट राष्ट्रियसभा सदस्य रहेका उनको कार्यकाल गत फागुन मै सकिएको हो ।

श्रेष्ठले संस्कृति, पर्यटन तथा नागरिक उड्डयन, चौधरीले शहरी विकास, कुँवरले श्रम तथा रोजगार र खापुङले स्वास्थ्य मन्त्रालयको जिम्मेवारी पाउने भएका छन्। यसअघि खापुङ स्वास्थ्य राज्यमन्त्री थिए। सचिवालय बैठकपछि एकीकृत समाजवादीका अध्यक्ष माधवकुमार नेपालले मन्त्री बनाउने भएका चारै जनाको नाम प्रधानमन्त्री शेरबहादुर देउवालाई बुझाएका छन्। प्रधानमन्त्री देउवाले उनीहरूलाई मन्त्री  नियुक्त गर्न लागेका छन्।

यसअघि देउवा सरकारका कानून न्याय तथा संसदीय मामिला मन्त्रालयमा गोविन्द बन्दीलाई मन्त्री बनाइएको थियो । उनी पनि गैर सांसद हुन बन्दी पनि नेकपा एस निकट मानिन्छन् । अध्यक्ष नेपालले ६ महिनामा मन्त्रिमण्डल हेरफेर गर्ने पार्टीको सहमतिअनुसार नै फेरबदल भएको बताएका छन् । तर गैरसांसद व्यक्तिलाई मन्त्री बनाउने बाध्यता नेकपा एसलाई किन पर्यो भन्ने उनले खुलाएनन् ।

नयाँ नियुक्त हुन लागेका मन्त्रीको शपथ ग्रहण भने आज नहुने भएको छ। सोमबार शपथ ग्रहण गर्ने तयारी गरिएको प्रधानमन्त्री कार्यालय स्रोतले जनाएको छ।

उन्नाइसौं साधारणसभाबाट नयाँ कार्यसमिति चयन तथा नवनिर्वाचित जनप्रतिनिधि सम्मान कार्यक्रम सम्पन्न

भक्तपुर, २१ जेठ । सूर्यविनायक नगरपालिका वडा नं.१, सिरुटार स्थित सिरु बौद्धिक समाजको १९ औं साधारणसभा सम्पन्न भएको छ । सिरु बौद्धिक समाजको सिरुटारमा सम्पन्न सभामा सूर्यविनायक नगरपालिका वडा नं.१ का नवनिर्वाचित जनप्रतिनिधि सम्मान तथा बधाई ज्ञापन गरिएको थियो ।

कार्यक्रममा वाग्मती प्रदेशसभा सदस्य शशीजंग थापाले सामाजिक सेवाको कार्यमा सिरु बौद्धिक समाज र वडाका जनप्रतिनिधिले सहकार्य गर्दै अगाडी बढ्न सुझाव दिन भयो । उहाँले स्थानीय विकासमा प्रदेश सभा सदस्यको हैसियतमा सूर्यविनायक नगरपालिका वडा नं.१ को विकास निर्माणमा सक्दो सहयोग पु¥याउने प्रतिबद्धता व्यक्त गर्नु भयो ।

नवनिर्वाचित वडा अध्यक्ष सानुकाजी कायस्थले जनमतबाट आफू पुनः निर्वाचित भएकोमा स्थानीय मतदाता सबैलाई धन्यवाद दिँदै वडाको विकासको कार्यमा अझ सक्रिय भएर लाग्ने प्रतिबद्धता प्रकट गर्नु भयो ।

कार्यक्रममा समाजका कार्यकारिणी सदस्य नातिबाबु बुढाथोकीले स्वागत मन्तव्य व्यक्त गर्नु भयो भने समाजका सचिव सनोदकुमार थापाले वार्षिक प्रतिवेदन र आगामी कार्य योजना प्रस्तुत गर्नु भयो । कोषाध्यक्ष गीताप्रसाद पोखरेलले आर्थिक प्रतिवेदन प्रस्तुत गर्नु भएको थियो ।

कार्यक्रममा वागमती प्रदेश प्रमुख कार्यालयका सचिव शिवराम न्यौपाने, महालक्ष्मी नगरपालिका, ललितपुरका शिक्षा विभाग प्रमुख चिरञ्जीवि पौडेल र स्थानीय सिमबिरुवा खानेपानी उपभोक्ता समितिका सचिव मधुकर थापा, ले साधारण सभाको सफलता र नवनिर्वाचित स्थानीय जनप्रतिनिधिहरुलाई शुभकामना व्यक्त गर्नु भयो ।

स्थानीय निर्वाचन २०७९ बाट सूर्यविनायक नगरपालिका वडा नं.१ का नवनिर्वाचित वडा अध्यक्ष सानुकाजी कायस्थ, वडा सदस्यहरु कुमारप्रसाद चौलागाई, सुवास न्यौपाने, महिला वडा सदस्य मञ्जु कार्की, दलित महिला वडा सदस्य कल्पना नेपालीलाई वागमती प्रदेश सभा सदस्य थापाले सम्मान पत्र प्रदान गर्दै सम्मान गर्नु भयो । समाजका अध्यक्ष एवं कार्यक्रमका सभापति ध्रुवराज विष्टले आफ्नो कार्यकाल सफल पुर्याउन सहयोग पुराउनु हुने कार्यसमिति लगायत सबै सदस्यहरुलाई धन्यवाद व्यक्त गर्नु भयो ।

त्यसैगरि सभाले समाजको नयाँ कार्य समिति सर्वसम्मत चयन गरेकको छ । नेपाल सरकार, न्याय सेवाका पूर्व सहसचिव एवम् अधिवक्ता विष्णुकाजी थापाको अध्यक्षतामा राजेन्द्रकुमार श्रेष्ठ उपाध्यक्ष, सनोदकुमार थापा सचिव, नातिकाजी बस्नेत कोषाध्यक्ष र सदस्यहरुमा गीताप्रसाद पोखरेल नातिबाबु बुढाथोकी, रामकृष्ण कार्की, सुश्री भगवती थापा, जनार्दन न्यौपाने, मिलन थापा, अमर के.सी. र नवराज गिरी सहितको १३ सदस्यीय नयाँ कार्य समिति गठन भएको छ । सिरु बौद्धिक समाजको विधानमा सूर्यविनायक नगरपालिका वडा नं.१ को अध्यक्ष कार्य समितिको पदेन सदस्य रहने प्रावधान अनुरुप वडा अध्यक्ष सानुकाजी कायस्थ समेत कार्य समिति सदस्य रहनु हुने छ ।

कालीगण्डकीको बिजुली भारत निर्यात सुरु, प्रतियुनिट न्यूनतम २.३८ रुपैयाँदेखि १९ रुपैयाँ सम्म

काठमाडौँ, २१ जेठ : नेपाल विद्युत् प्राधिकरणको स्वामित्वमा रहेको १४४ मेगावाट जडित क्षमताको कालीगण्डकी ए विद्युतगृहबाट उत्पादित विद्युत् भारत निर्यात सुरु हुने भएको छ । नेपाल विद्युत् प्राधिकरणले कालीगण्डकी विद्युत्गृहबाट उत्पादित विद्युत् आज राति १२ बजेदेखि निर्यात सुरु गर्न लागेको हो । प्राधिकरणले विद्युत् भारतीय ऊर्जा एक्सचेञ्ज (आइएक्स)मा बिहीबारदेखि त्रिशूली र देवीघाट जलविद्युत्गृहबाट उत्पादित विद्युत्लाई स्रोत मानी दैनिकरुपमा करिब ३९ मेगावाट विद्युत् निर्यात गरिरहेको छ ।

कालीगण्डकीको पनि सुरु भएसँगै प्राधिकरणले १७७.७ मेगावाट विद्युत् भारत निर्यात गर्नेछ । कालीगण्डकी ए को १४० मेगावाट, त्रिशूलीको २३.२ मेगावाट र देवीघाटको १४.५ मेगावाट विद्युत् भारत निर्यात हुनेछ । वर्षात्सँगै नदीनालामा पानीको बहाव बढेर विद्युत्गृह पूर्ण क्षमतामा चल्न थालेपछि आन्तरिकरुपमा खपत गरी अतिरिक्त भएको ऊर्जालाई प्राधिकरणले भारत निर्यात गरेको हो ।

प्राधिकरणका कार्यकारी निर्देशक कुलमान घिसिङले आज रातिदेखि निर्यात हुने विद्युत्को औसत बिक्री मूल्य प्रतियुनिट ११.२ रुपैयाँ (७ भारु) रहेको बताउनुभयो । “अधिकतम दर प्रतियुनिट १९ रुपैयाँ (१२ भारु), न्यूनतम २.३८ रुपैयाँ (१.४९ भारु) र औसत दर ११.२ रुपैयाँ (७ भारु) छ”, घिसिङले भन्नुभयो । आइएक्समा २४ घण्टालाई १५÷१५ मिनेटको ९६ वटा ब्ल्कमा विभाजन गरी बजारले तय गरेको प्रतिस्पर्धी दरमा विद्युत्को कारोबार गरिन्छ । त्यसैले हरेक ब्ल्कको मूल्य फरकफरक हुने गरेको छ ।

प्राधिकरणका अनुसार बिहीबार निर्यात गरिएको विद्युत्को अधिकतम र न्यूनतम मूल्य प्रतियुनिट क्रमश: भारु १२ (१९.२ नेरु) र २.४९ (३.९८नेरु) छ । त्यस दिनको औसत मूल्य प्रतियुनिट भारु ६.७२ (१०. ७६ नेरु) छ । यसैगरी, शनिबार प्राधिकरणले अधिकतम प्रतियुनिट मूल्य १९.२ रुपैयाँ (१२ भारु) र न्यूनतम ४.०८ रुपैयाँ (२.५५ भारु)मा विद्युत् बिक्री गरेको छ । औसतम मूल्य ११.४८ रुपैयाँ (७.१८ भारु) रहेको छ । नेपालले भारतीय भारतीय ऊर्जा एक्सचेञ्ज मार्केटमा प्रतिस्पर्धी दरमा ३६४ मेगावाटसम्म विद्युत् बिक्री गर्न अनुमति पाएको छ ।

यौन दुर्व्यवहारको आरोपमा सर्वनाम शिक्षालयका वार्डेन पक्राउ

काठमाण्डाै, २१ जेठ ।  छात्राहरूमाथि याैन दुर्व्यवहार गरेकाे आराेप लागेका जाेरपाटीकाे सर्वनाम शिक्षालयका वार्डेन पक्राउ परेका छन् ।शिक्षालयका वार्डेन रामजी बस्नेतलाई रामेछाप प्रहरीकाे समन्वयमा पक्राउ गरिएकाे हाे । अहिले उनलाई काठमाण्डाै ल्याउँदै गरिएकाे प्रहरी नायब उपरीक्षक ढुण्डीराज न्याैपानेले जानकारी दिनुभयाे ।

१२, १३ र १५ वर्षीया बालिकालाई वार्डेन रामजी बस्नेतले झन्डै चार महिनाअघि यौन दुर्व्यवहार गरेको विद्यार्थी र अभिभावकको आरोप छ । यसै विषयमा आज शिक्षालयका प्रधानाध्यापक र विद्यार्थी तथा अभिभावकबीच भनाभन हुँदा अवस्था तनावपूर्ण बनेको थियो ।

१५ वर्षसम्म सर्वनाम शिक्षालयमै शिक्षकको रूपमा कार्यरत बस्नेत अहिले वार्डेनको जिम्मेवारीमा रहेको र १५ वर्षमुनिका तीन जना बालिकालाई यौन दुर्व्यवहार गरेको आरोपमा विद्यार्थी र अभिभावक आक्रोशित बनेका न्यौपानेले जानकारी दिनुभयो । पक्राउ परेका बस्नेतमाथि जाहेरी दर्ताको प्रक्रिया सुरु भएको प्रहरीले जनाएको छ ।

दुई वर्षपछि धुमधामका साथ मनाइयो भोटो देखाउने जात्रा

काठमाडौँ, २१ जेठ  : कोरोनाको कारण दुई वर्षपछि वर्षा र सहकालका देवता रातो मच्छिन्द्रनाथको भोटो देखाउने जात्रा धुमधामका साथ सम्पन्न भएको छ । विगतका दुई वर्षसम्म औपचारिकतामा मात्रै सीमित रहेको जात्रा कोरोनाको त्रास कम भएसँगै यस वर्ष भव्यताको साथ समापन गरिएको हो । गत वैशाख २१ गतेदेखि सुरु भएको रथ जात्रा आज भोटो देखाएसँगै यस वर्षको लागि जात्रा सकिएको हो ।

लगनखेलबाट जावलाखेल पु¥याइएको चौथो दिनको दिन भोटो देखाउने परम्पराअनुसार आज राष्ट्रपति विद्यादेवी भण्डारीको उपस्थितीमा लतिपुर जिल्ला गुठीका प्रमुख हरिप्रसाद सुवेदीले भोटो देखाउनुभएको हो । भोटोको अवलोकनसँगै राष्ट्रपति भण्डारीले कुमारीको हातबाट प्रसाद ग्रहण गर्नुभयो । उपत्यकाको सबैभन्दा लामो रातो मच्छिन्द्रनाथको जात्रा ललितपुरमा मात्रै नभई काठमाडौँ उपत्यकावासीकै सहभागितामा धुमधामका साथ मनाइँदै आएको छ ।

विगत दुई वर्ष कोभिड–१९ का कारणले जात्रा नियमितरूपमा सञ्चालन हुन नसकेकामा यस वर्ष उत्साहका साथ रथयात्रा सम्पन्न भएको गुठीका प्रमुख सुवेदीले बताउनुभयो । स्थानीयवासी हर्षित र उत्साहितरूपमा नै सहभागी रहेको सुवेदीले बताउनुभयो । ज्योतिष दैवज्ञ कीर्तिमदन जोशीका अनुसार जावलाखेलको जात्रालाई सात गाउँको जात्रासमेत भन्ने गरिएको छ । भोटो देखाउने काम सकिएसँगै देवतालाई बुङ्मती लगिएको छ । देवता वर्षमा झण्डै आधा–आधा समय पाटन र बुङ्मती रहने गर्छन् । जात्रा समापन भयसँगै उक्त ऐतिहासिक भोटोलाई बुङ्मतीमा सुरक्षा घेरा दिएर राखिने पनि प्रमुख सुवेदीले बताउनुुभयो । मच्छिन्द्रनाथलाई पुल्चोकबाट तानेर पाटनका विभिन्न स्थान हुँदै जावलाखेलसम्मको यात्रालाई त्रिलोक भ्रमण भन्ने गरिन्छ । यो रथयात्रालाई मच्छिन्द्रनाथको स्वर्गलोकको भ्रमणतुल्य मानिन्छ, ऐतिहासिक महत्व सुनाउँदै प्रमुख सुवेदीले भन्नुभयो ।

ललितपुरवासीले विशेष महत्वका साथ मनाउने जात्रामा परम्परादेखि नै काठमाडौँ र भक्तपुरवासीको पनि सहभागिता रहँदै आएको छ । रथ लिन जाँदा ललितपुरका किसान रथचक्र, काठमाडौँका गुरु बन्धुदत्त बज्राचार्य र भक्तपुरका राजा नरेन्द्रदेवसँगसँगै जानुले पनि जात्रामा काठमाडौँ र भक्तपुरवासीसँग पनि जोडिएको भए पनि अहिले काठमाडौँवासी र भक्तपुरवासी रथ तान्न भने आउन छाडेका छन् ।

किसान रथचक्र, गुरु बन्धुदत्त बज्राचार्य र राजा नरेन्द्रदेवको सम्झनामा रथ यात्रा हुने गरेको जानकार बताउनुहुन्छ । गाबहालबाट सुन्धारासम्मको यात्रा भक्तपुरका राजा नरेन्द्रदेवको र सुन्धाराबाट लगनखेलसम्मको यात्रा किसान ललित रथचक्रको स्मरणमा हुने गरेको छ । अहिले पनि पुल्चोकबाट गाबहालसम्मको जात्रालाई काठमाडौँवासीको र गाबहालबाट सुन्धारासम्मको जात्रालाई भक्तपुरवासीको जात्रा भनिन्छ । मच्छिन्द्रनाथको जात्राको तयारीका लागि गुठी संस्थान झण्डै वर्षभर नै लाग्ने गरेको छ । यस वर्ष झण्डै रु ५० लाख खर्च भएको कार्यालयले अनुमान गरेको छ ।

मच्छिन्द्रनाथको पर्व, पूजा, रथ निर्माणलगायत कामका लागि कार्यालयले रकम उपलब्ध गराउँदै आएको छ । जङ्गलमा गएर काठ काट्नेदेखि, आवश्यक सामग्री बनाउने र रथ बनाउने तथा भोटो देखाउँदासम्म विभिन्न समुदायको सहभागिता हुने गरेको पानेजु हेम बर्जाचार्यले बताउनुभयो । परम्परालाई तोड्दै पछिल्लो जात्रासम्बन्धी काममा केही वर्षदेखि युवाको सहभागिता बढिरहेको पाइन्छ । घरमा बुबा, हजुरबुबाले नसक्ने अवस्थामा सन्तानले उक्त जिम्मेवारी लिने गरेका छन् । सीप भएका व्यक्ति विदेश जाँदा भने काममा बाधा पुग्नसक्ने उहाँले बताउनुभयो ।

सहमहामन्त्री शाह भन्नुहुन्छ : सुनुयोजित रुपमा फसाइयो, तत्काल रिहा गर

भक्तपुर, २० जेठ : राष्ट्रिय प्रजातन्त्र पार्टी भक्तपुरले जग्गा कारोबार किर्ते अभियोगमा पक्राउ परेका आफ्ना नेतालाई तत्काल रिहाई गर्न माग गरेको छ । रफत सञ्चार क्लब भक्तपुरमा आज राप्रपा भक्तपुर जिल्ला समितिले आयोजना गरेको पत्रकार सम्मेलनमा आफ्ना नेता कार्यकर्तालाई सुनुयोजित रुपमा फसाइ नियम विपरित मुद्धा लगाएर थुनामा राखेको भन्दै तत्काल रिहा गर्न माग गरेको हो ।

काठमाडौैं उपत्यका अपराध अनुसन्धान कार्यालयले यही जेठ १३ गते सरकारी जग्गा समेत बैना गरी ठगी गरेको अभियोगमा राप्रपा जिल्ला कोषाध्यक्ष चाँगुनारायण नगरपालिका–७ निवासी ७२ वर्षीय केशवप्रसाद अधिकारी र भक्तपुर नगरपालिका–८ बस्ने ५८ वर्षीय ईश्वर गाइजुलाई पक्राउ गरेको थियो ।

कित्ता नम्बर ३९९ क्षेत्रफल (०–४–०–०) सरकारी जग्गा सहित बैनाबापत पाँच करोड २० लाख रुपैयाँ पीडितबाट ठगी गरेको अभियोगमा प्रहरीले पक्राउ गरेको थियो । सोही घट्नामा राप्रपाबाटै हालै सम्पन्न स्थानीय तहको निर्वाचनमा चाँगुनारायण नगरपालिका—७ का निर्वाचित वडाध्यक्ष श्यामकृष्ण नायजूसहित ६ जनालाई प्रहरीले पक्राउ पूर्जी जारी गरेको थियो । वडाध्यक्ष नायजू भने अहिले पनि फरार छन् ।
पत्रकार सम्मेलनमा राप्रपाका सहमहामन्त्री रबिन्द्रप्रताप शाहले चुनाव सकिए पछि राप्रपाको जनलहर देखेर आत्तिएकाहरुले राप्रपा बिरुद्ध षडयन्त्र गर्दै सुनुयोजित रुपमा फसाएको आरोप लगाउनु भयो ।
देवयानी मुद्धा चलिरहेको यस घट्नामा नियम विपरित दबाब र प्रभाबमा परेर प्रहरीले पक्राउ गरि मुद्धा चलाएको आरोप लगाउदै उहाँले २०७७ चैत ३० गते खोटाङको बुइपा—३ का धनिराम राई र रुपसुन्दर चामलिङलाई बैना गरेको उक्त जग्गा २०७८ पुस २३ गते मात्र नेपाल सरकारको नाउँमा कायम भएको अबस्थामा पनि प्रहरीले सत्य तथ्य अनुसन्धान नगरी पक्राउ गरेको उहाँले जिकिर गर्नु भयो ।

पत्रकार सम्मेलनमा राप्रपाका जिल्ला अध्यक्ष रामशरण लामिछानेले जग्गा लेनदेनसम्बन्धी जाहेरीवाला धनिराम राईसमेत र पक्राउ परेका अधिकारीको बीचमा भएको सम्झौता अनुसार छ महिनाको भाखा राखेर २०७७ चैत ३० गते उक्त जग्गा खरिद बिक्रीको लागि बैनापट्टा गरिए पनि २०७८ पुस ३० गतेको अबस्थालाई जोडेर मुद्धा दर्ता गरि राप्रपाका नेता कार्यकर्ता पक्राउ गर्नु वदनियतपूर्ण भएको आरोप लगाउनु भयो ।

जग्गा बैना तीन वर्ष अगाडि नै गरिए पनि बैना वापत राईसमेतले दिएको रकमको चेक बाउन्स भएपनि पक्राउ परेका अधिकारीसमेतले प्रहरीमा उजुरी नगरी सहमतीमै समस्या सुल्झाउन खोज्दा उल्दै राईको समूहले अधिकारीलाई झूटो उजुरी दिएर पक्राउ गर्न लगाएको अध्यक्ष लामिछानेको दाबी छ । उहाँले तत्काल पक्राउ परेका अधिकारी र गाईजूलाई रिहा गरि सत्य तथ्य छानबिन गर्न पत्रकार स्म्मेलनमा माग गर्नु भयो ।

 

भक्तपुर जिसस निर्वाचन, नेतृत्व गर्ने अवसरबाट चुक्दै नेमकिपा

नेमकिपाले भने एमसीसी समर्थन पार्टीसँग मिलेर जान नसकिने जवाफ फर्काएको बताइएको छ । छलफलमा नेमकिपाले एमसीसी पक्षधर दलसँग कुनै हालतमा सहकार्य नगर्ने र गर्नै परे एमसीसी गलत हो, यसलाई मान्दैनौ, हामी यसको बिरोध गर्छौ भनेर हस्ताक्षर गर्नु पर्ने शर्त अगाडि सारेको कांग्रेस एमालेका नेताहरुले बताएका छन् ।=========================================

भक्तपुर, २० जेठ : जिल्ला समन्वय समिति भक्तपुरको निर्वाचन यहीँ जेठ २८ गते हुने भएको छ । मुख्य निर्वाचन अधिकृतको कार्यालयले यहीँ १९ गते निर्वाचन कार्यतालिका सार्वजनिक गर्दै २३ गते उम्मेदवारी दर्ता र २८ गते निर्वाचन गर्ने जानकारी दिएको छ ।

मुख्य निर्वाचन अधिकृत गोपालप्रसाद बास्तोलाले १९ गते मतदाता नामावली प्रकाशनसँगै निर्वाचन प्रक्रिया सुरु भएको र निर्वाचन तालिका अनुसार सबै प्रक्रिया पुरा गरेर २८ गते शनिवार निर्वाचन गरि सोही दिन मतगणना गरि घोषणा गरिने जानकारी दिनु भयो । आगामी पाँच वर्षे कार्यकालका लागि हुने निर्वाचनमा यस पटक नेपाल मजदुर किसान पार्टी निर्णायक हुने भएको छ । नेपाली कांग्रेस र एमालेको बराबर मतभार भएपछि नेमकिपा निर्णायक हुने भएको हो ।

भक्तपुरका चार नगरपालिकामा प्रमुख र उपप्रमुख गरि आठ जनाले मतदान गर्न पाउने व्यबस्था छ । जसमा नेकपा एमालेको ३, नेपाली कांग्रेसको २, नेमकिपाको २ र नेकपा माओवादी केन्द्रको १ जना मतदाता रहेका छन् । अहिलेकै अवस्थामा गठबन्धनमा रहेका कांग्रेस र माओवादी मिल्दा ३ मत हुने हुँदा एमाले र गठबन्धनबबीच बराबर मतभार रहन्छ । यस्तो अबस्थामा २ मतभार रहेको नेमकिपा निर्णायक हुने भएको हो ।

नेमकिपा निर्णायक हुने भएपछि कांग्रेस र एमालेको जिल्ला नेतृत्व तहले जिससमा सहकार्य गरेर जान नेमकिपासँग छलफल अगाडि बढाएको बताएका छन् । नेपाली कांग्रेसका जिल्ला सभापित दुर्लभ थापाले कसैको बहुमत नभएको अबस्थामा जिससमा सबै मिलेर जान सके राम्रो हुने भन्दै यसका लागि दुई तीन चरणमा छलफल भइरहेको जानकारी दिनु भयो ।

उहाँले भन्नुभयो, “नेमकिपासँग पनि एक चरणमा छलफल भएको हो, तर उहाँहरुको कुरा एमसीसीसँग पनि जोडिएको रहेछ, जिल्ला समन्वय समिति भनेको नगरपालिकाहरुसँग समन्वय गर्ने निकाय हो, सबै पार्टी मिलेर जान सके राम्रो भनेर एमालेसँग पनि यसबारेमा छलफल भइरहेको छ ।”

कांग्रेस सभापति थापाले समन्वय गर्ने निकाय जिसस भएकाले काँग्रेस, एमाले मिलेरै जान सके अझ राम्रो हुने भन्दै कतै सहमति नभए बराबर मतभार रहेको काँग्रेस गठबन्धन र एमालेबीच अन्तिममा गोलाप्रथाबाट टुङ्गोमा पुग्न सकिने बताउनु भयो ।

एमालेका भक्तपुर जिल्ला अध्यक्ष बचत देउजाले नेमकिपासँग यसबारेमा दुई तीन चरणमा छलफल भएको तर जवाफ नआएको बताउनु भयो । एमाले अध्यक्ष देउजाले भन्नुभयो, “एमालेले नेमकिपासँग छलफल गर्दै आएको छ, तर उहाँको स्पष्ट धारणा केही आएको छैन । नेमकिपाबाट केही स्पष्ट कुरा नआएकाले सहकार्य हुनेमा यसै भन्न सकिने अबस्था छैन, मतभार भएका सबै दल मिलेर जान सके अझै राम्रो हुन्छ, अन्त्यमा कुनै सहमति बन्न नसके गोलाप्रथा छदैछ ।”

एमाले र कांग्रेस दुबै दलले नेमकिपालाई जिसस प्रमुख सहित सदस्यहरु दिने र उपप्रमुखसहित केही सदस्य आफ्नो पार्टीले लिने गरि प्रस्ताव लगेको दुबै पार्टीका नेताहरुले बताएका छन् । तर नेमकिपाले भने एमसीसी समर्थन पार्टीसँग मिलेर जान नसकिने जवाफ फर्काएको बताइएको छ । छलफलमा नेमकिपाले एमसीसी पक्षधर दलसँग कुनै हालतमा सहकार्य नगर्ने र गर्नै परे एमसीसी गलत हो, यसलाई मान्दैनौ, हामी यसको बिरोध गर्छौ भनेर हस्ताक्षर गर्नु पर्ने शर्त अगाडि सारेको कांग्रेस एमालेका नेताहरुले बताएका छन् ।

नेमकिपाका केन्द्रीय सचिव प्रेम सुवालले भने जिससमा समन्वय गरेर जानेबारेमा कांग्रेस र एमालेसंग आफूसंग कुनै छलफल नभएको बताउनु भयो । उहाँले भन्नुभयो, “अहिलेसम्म यसबारेमा मसंग कांग्रेस, एमालेका कोही पनि नेताको कुरा भएको छैन, उहाँहरुले कोसंग कुरा गर्नु भो थाहा पनि छैन, यसबारेमा पार्टीमा छलफल भएर पार्टीले आधिकारिक निर्णय नगरेसम्म केही भन्न सक्दैनौ ।”

नेमकिपाका एक जिल्ला नेताले भने कांग्रेस र एमाले दुबै दलले नेमकिपालाई जिसस प्रमुखसहित बहुमत सदस्यहरु दिने प्रस्ताव ल्याएको स्वीकार्नु भयो । नेमकिपाले राखेको शर्तका बारेमा पनि लचक भएर जानेबारेमा छलफल भएको जानकारी दिदै ती नेताले पार्टीको एउटै नीति एमसीसी पक्षघरसँग सहमति र सहकार्य गरेर जान सकिदैन भन्ने जवाफ केन्द्रबाट आएकाले यसबारेमा जिल्ला तहले केही गर्न नसक्ने बताउनु भयो ।

त्यसो त यसअघि पनि नेमकिपाले जिससलाई काम नलाग्ने निकायका भएकाले जिससलाई खारेज गर्नुपर्ने माग राख्दै आएको थियो । २०७४ को जिससको निर्वाचनमा भने कांग्रेसको उम्मेदवारी नपरेपछि बहुमत रहेको एमाले र दुई मत रहेको नेमकिपाबीच निर्वाचन भएको थियो । पाँच मत रहेको एमालेले जिसस प्रमुखमा नवराज गेलालसहित सबै पदमा उम्मेदवारी दिएको थियो भने नेमकिपाले जिसस प्रमुखमा कमला भारती गिरीलाई उम्मेदवारी दिएको थियो ।

नेतृत्व गर्ने अवसर पाउँदा पनि नेमकिपा नेतृत्व लिन नचाहने तर बिरोध मात्रै गर्ने भन्दै कार्यकर्ता तहमै चर्चा चल्न थालेको छ । एमसीसी पक्षघरसँग सहकार्य नगर्ने पार्टीको नीति र निर्देशन विपरित केहीदिन अघि मात्रै चाँगुनारायण नगर कार्यपालिकाको निर्वाचनमा नेमकिपाले पाँच मत प्रदान गर्दै कांग्रेसलाई बहुमत दिएर विजयी गराएको थियो ।

कांग्रेस र एमाले दुबैको कार्यपालिकामा बहुमत नपुग्दा नेमकिपाले जता साथ दियो त्यतै बहुमत पुग्ने अबस्थामा पार्टी नीति र निर्देशन विपरित नै नेमकिपाका जनप्रतिनिधिले कांग्रेससंग सहकार्य गर्दै कार्यपालिकामा जाने आफ्नो अवसर प्राप्त गरेका थिए ।

पेट्राेल, डिजल र मट्टीतेलकाे मूल्य प्रतिलिटर १० रुपैयाँले घट्याे

काठमाण्डाै, १९ जेठ :  नेपाल आयल निगमले पेट्राेल, डिजल र मट्टीतेलमा प्रतिलिटर १०/१० रुपैयाँ घटाएकाे छ । आज बिहीवार राति १२ बजेदेखि लागू हुने गरी निगमले पेट्राेल, डिजल र मट्टीतेलकाे मूल्य घटाएकाे हाे । मूल्य घटेसँगै अब पेट्रोल लिटरकाे एक सय ७० र डिजल/मट्टीतेल लिटरकाे एक सय ५३ रुपैयाँमा झरेको छ ।

निगम सञ्चालक समितिकाे बैठकले पेट्राेलियम पदार्थकाे मूल्य घटाउने निर्णय गरेकाे हाे । यसअघि अर्थ मन्त्रालयले उद्याेग, वाणिज्य तथा आपूर्ति मन्त्रालयलाई पत्र पठाएर पूर्वाधार कर घटाएर मूल्य समायाेजन गर्न भनेकाे थियाे ।

सूर्यविनायक नगरपालिकाको प्रवक्तामा रबिन्द्र सापकोटा चयन, नगरपालिकाद्धारा बिभिन्न समिति गठन

भक्तपुर, १९ जेठ । सूर्यविनायक नगरपालिकाको प्रवक्तामा रबिन्द्र सापकोटा चयन हुनु भएको छ । नगरपालिकाको आज बसेको कार्यपालिका बैठकले वडा नंं ७ का वडाध्यक्ष सापकोटालाई नगरपालिकाको प्रवक्तामा तोक्ने निर्णय गरेको हो ।

नगरपालिकाले आज बिभिन्न समितिहरु गठन गरेको छ । बैठकले सार्वजनिक सेवा, सुशासन तथा क्षमता विकास समिति, आर्थिक विकास समिति, सामाजिक विकास समिति, पूर्वाधार विकास समिति, वातावरण तथा विपद व्यबस्थापन समिति, विधायन समिति र लेखा समिति गठन गरेको नवनियुक्त प्रवक्ता सापकोटाले जानकारी दिनु भयो ।

नगरपालिकाले वडा नं. १ का वडाध्यक्ष सानुकाजी कायस्थको संयोजकत्वमा सार्वजनिक सेवा, सुशासन तथा क्षमता विकास समिति गठन गरेको छ । उक्त समितिका सदस्यहरुमा शर्मिला बस्नेत, बिक्रम तामाङ, ताराबहादुर बिष्ट, सन्तोषी नेपाली, कल्पना नेपाली, कल्पना खतिवडा दाहाललाई चयन गरेको छ ।

त्यस्तै वडा नं. ८ का वडाध्यक्ष पुष्पराज बस्नेतको संयोजकत्वमा आर्थिक विकास समिति गठन गरिएको छ । यस समितिको सदस्यहरुमा लछुराम न्यौपाने, सुमन परियार, हेमा खतिवडा, मञ्जु कार्की, सरला विश्वकर्मा, रन्जीता तिखत्री, हिरालक्ष्मी कोजू र बिदुर खड्का रहनु भएको छ ।

त्यसैगरि वडा नं. ७ का वडाध्यक्ष रबिन्द्र सापकोटाको संयोजकत्वमो सामाजिक विकास समिति गठन गरिएको छ । उक्त समितिको सदस्यहरुमा दिपेन्द्र केसी, शेरकाजी सुवाल, सावित्री मिश्र, कुमार चौलागाई, गंगा खड्का र लक्ष्मण त्वाती रहनु भएको छ ।

त्यस्तै वडा नं. १० का वडाध्यक्ष शिवराम राउतको संयोकत्वमा गठन भएको पूर्वाधार विकास समितिमा मनोज थापा, गीता पण्डित, विश्वराम त्वायनावासु, जनक भण्डारी, पम्फा परियार, पुजा वराह चयन हुनु भएको प्रवक्ता सापकोटाले जानकारी दिनु भयो ।

वातावरण तथा विपद व्यबस्थापन समिति वडा नं. ९ का वडाध्यक्ष भगवाण खत्रीको संयोजकत्वमा इश्वर खड्का, उमेश कार्की, अञ्जना नेपाली, प्रजुन तिखत्री, दिप गिरी, जनार्दन खड्का, राधिकार मिजार, विदुर देउजा सदस्य रहको समिति गठन गरिएको छ ।

त्यस्तै वडा नं. २ का वडाध्यक्ष प्रदीप कार्कीको संयोजकत्वमा गठन भएको विधायन समितिमा इश्वरबहादुर थापा, कमला पोखरेल, सुनिल भुजेल, सुवाष न्यौपाने, उज्वल राजथला, भगत राना, गीता बुसुंखे सदस्य रहनु भएको छ ।

वडा नं. ५ का वडाध्यक्ष राजकुमार जोशीको संयोजकत्वमा लेखा समिति गठन भएको छ । यस समितिको सदस्यहरुमा तारा सापकोटा र घनश्याम भट्टराई रहनु भएको प्रवक्ता सापकोटाले जानकारी दिनु भयो । नगरपालिकाको उपप्रमुख सरिता भट्टराई तिमिल्सिनाको संयोकत्वमा राजस्व परामर्श समितिमा रबिन्द्र सापकोटा र शर्मिला बस्नेत सदस्य रहनु भएको छ ।

ड्राइभिङ लाइसेन्सको अनलाइन फर्म भर्नै समस्या

काठमाडौं, १७ जेठ । सवारी चालक अनुमतिपत्रको अनलाइन आवेदनमा पुनः समस्या आएको छ । पछिल्लो पटक सोमबारदेखि खुलेको अनलाइन आवेदनका क्रममा ओटीपी कोड नै नआउने अथवा आए पनि धेरै समय पछि मात्र आउने समस्या देखिएको हो । चैत १ गते देखि बन्द रहेको सवारी चालक अनुमतिपत्रको अनलाइन आवेदन फेरि सुरु भएपनि धेरै सेवाग्राहीहरूले ओटीपी कोड नै नआएको गुनासो गरेका छन् । सोमबारदेखि सुरु भएको अनलाइन आवेदन प्रणालीमा आवेदन प्रकृया पनि नयाँ छ ।

पहिलेको प्रणालीमा सेवाग्राहीले सोझै आवेदन फाराम भर्न सक्ने अवस्था रहेको थियो भने अहिले नयाँ प्रणालीमा सेवाग्राहीले सुरुमा आफ्नो व्यक्तिगत विवरण सहित विस्तृत प्रोफाइल नै बनाउनु पर्ने हुन्छ । यसका लागि आफ्नो सामान्य विवरण राखेपछि प्रणालीबाट सेवाग्राहीको युजरनेम र पासवर्ड क्रियट गर्नु अघि प्रमाणीकरण स्वरूप उपलब्ध गराइएको मोबाइल नम्बरमा एउटा ओटीपी कोड आउँछ। उक्त ओटीपी कोड बिना आवेदन प्रणालीमा अगाडिको प्रकृया थाल्न सकिँदैन ।

सेवाग्राहीलाई भने यही ओटीपी कोड पाउन सास्ती भइरहेको छ । विभागले भने नयाँ प्रणाली सुरुवाती चरणमा रहेको र धेरै आवेदन एकैपटक आउँदा यस्तो समस्या आएको बताएको छ । “धेरै सेवाग्राही लामो समयदेखि यसको पर्खाइमा छन् । खुल्ने बित्तिकै धेरै आवेदन एकैचोटी पर्दा ट्राफिक बढी भएर कोड जान ढिलाई भएको हुनसक्छ । यसमा हाम्रो प्राविधिक टिमले काम गरिरहेको छ,” टेकपानासँगको कुराकानीमा विभागका प्रवक्ता इश्वरी दत्त पनेरूले भने ।