भक्तपुर, २९ भदौ : भक्तपुर र काठमाडौंको सिमाना भएर बग्ने मनोहरा खोलामा पानीको बहाव बढेर पुलसम्म छोए पछि खोला किनारामा टहरा एवं घर बनाएर बसोबास गर्दै आएका स्थानीय बस्ती छाडेर भक्तपुरको लोकन्थली हाईटमा पुगेका छन् ।

चाँगुनारायण नगरपालिकाको नगरकोटदेखि काठमाडौंको साँखुलगातका क्षेत्रमा साँझ परेको ठूलो वर्षाका कारण आएको बाढीले खोला किनाराबाट बस्तीमा पानी पसेर टहराहरुमा पानी पसेपछि १०० भन्दा बढी स्थानीयले त्रासमा राती ९ बजे नै बस्ती छाडेर लोकन्थलीको हाईटमा पुगेर बसेको स्थानीय कमलनाथ प्रसाईले जानकारी दिनुभयो ।

राती ८ बजेपछि पानीको बहाब बढेको र ९ बजेपछि खोलाको बहाब बढेर साईरन बजाएर अलर्ट गर्दै सुरक्षित स्थानमा जान आग्रह गरिएको उहाँले जानकारी दिनुभयो ।

भोटेकोशी बाढीको वितण्डाको कारण पनि मनोहरा खोलामा आएको बाढीले थप त्रास बनाएर सुरक्षित हुन लोकन्थलीको हाईटमा बच्चादेखि बुढासम्म पुगेको उहाँले बताउनुभयो ।

सरकारले मनोहरा सुकुम्वासी बस्ती हटाए पछि जडिबुटी पेप्सीकोलाको पश्चिमतर्फ निजी जग्गा भाडामा लिएर र आफ्नै जग्गामा घर टहरा बनाएर बसेकाहरुको बस्ती भित्र बाढी पसेको हो ।

जिल्ला प्रहरी परिसर भक्तपुरका प्रहरी उपरीक्षक सुर्य बहादुर खड्काले मनोहरा खोलामा बाढीको बहाव बढेसँगै राती नैे प्रहरीले खोला किनारका बस्तीमा प्रहरी परिचालन गरे स्थानीयलाई सुरक्षित स्थानमा सारेको जानकारी दिनुभयो ।

उहाँले आवश्यक पर्दा उद्धारको लागि सुरक्षाकर्मी तयारी अबस्थामा रहेको भए पछि राती १० बजेपछि खोलामा पानीको बहाब घटेको बताउदै उहाँले प्रहरी मनोहरा किराना क्षेत्रमा खटिएको बताउनुभयो ।