नेशनल प्याब्सन भक्तपुरद्धारा १९७ जना शिक्षकहरुलाई परिवर्तित नयाँ पाठ्यक्रमकोबारे प्रशिक्षण प्रदान

भक्तपुर; १८ भदौ । नेशनल प्याब्सन भक्तपुरले १९७ जना शिक्षकहरुलाई परिवर्तित नयाँ पाठ्यक्रमकोबारे प्रशिक्षण दिएको छ ।
पाठ्यक्रम विकास केन्द्रकै सम्बन्धित विषय विज्ञद्वारा सदस्य विद्यालयहरुमा अध्यापनरत नेपाली, अंग्रेजी, गणित, विज्ञान र सामाजिक गरी पाँच विषयका कक्षा चारदेखि कक्षा १० सम्मका छुट्टाछुट्टै समूहमा शिक्षकहरुलाई प्रशिक्षण दिएको हो ।

नेशनल प्याब्सनले आफ्ना सदस्य विद्यालयहरुका विषयगत शिक्षकहरुलाई परिवर्तित नयाँ पाठ्यक्रमकोबारे जानकारी दिने उदेश्यले आयोजना गरेको परिवर्तित नयाँ पाठ्यक्रम विषयक एक दिने अभिमुखीकरण कार्यक्रम–२०७९ मा शिक्षकहरु लाभान्वित भएको नेशनल प्याव्सन भक्तपुरका सचिव जयप्रकाश राईले जानकारी दिनु भयो ।

पाठ्यक्रम विकास केन्द्रकै सम्बन्धित विषय विज्ञद्वारा सदस्य विद्यालयहरुमा अध्यापनरत नेपाली, अंग्रेजी, गणित, विज्ञान र सामाजिक गरी पाँच विषयका कक्षा चारदेखि कक्षा १० सम्मका छुट्टाछुट्टै समूहमा शिक्षकहरुलाई परिवर्तित नयाँ पाठ्यक्रमकोबारे प्रशिक्षण गरिएकाउहाँले जानकारी दिनु भयो ।

कार्यक्रममा नेशनल प्याव्सनका राष्ट्रिय अध्यक्ष पाण्डव हमालले स्थानीय तहले नै यस्ता कार्यक्रम आयोजना गरी आफ्ना स्थानीय तहका शिक्षकहरुलाई नयाँ पाठ्यक्रमबारे प्रशिक्षण दिनु पर्ने औल्याउनु भयो । उहाँले स्थानीय तहले पाठ्यक्रम मार्फत सम्पूर्ण शिक्षकहरु माझ पुराउनु पर्नेमा त्यो जिम्मेवारी नेशनल प्याव्सन भक्तपुरले बहन गर्दै पाठ्यक्रम लागु हुदै गर्दा आयोजना गरेको कार्यक्रम निकै उपलब्धीमूलक हुने बताउनु भयो ।

नेशनल प्याब्सन भक्तपुरले निकै महत्वपूर्ण कार्यक्रमहरु नियमित रुपमा गर्दै आएको चर्चा गर्दै उहाँले यस्ता कार्यक्रमको प्रशंसा गर्नु भयो । कार्यक्रममा नेशनल प्याव्सनका केन्द्रीय महासचिव पारसमणि दाहाल लगाएतको बिभिन्न सरोकारवाला निकायका महत्वपूर्ण व्यक्तित्वहरुको सहभागिता रहेको थियो ।

त्यसअवसरमा सहभागी शिक्षकहरुले पनि पाठ्यक्रम सम्बन्धि प्रशिक्षण अन्य तालिम भन्दा पनि ज्यादै महत्वपूर्ण र उपलब्धी भएको भन्दै कार्यक्रममा सहभागी हुन पाउँदा निकै खुसी लागेको बताउनु भएको थियो । नेशनल प्याव्सन भक्तपुरका अध्यक्ष संजय खड्काले पाठ्यक्रम विकास केन्द्रले कक्षा १ देखि ३ को एकिकृत पाठ्यक्रम ल्याई सकेको र कक्षा ४,६,७ र ९ को नयाँ पाठ्यक्रममा आधारित रहेर लागु गरिसकेको बताउनु भयो ।

उहाँले भन्नुभयो, “ पाठ्यक्रम विकास केन्द्रले एकिकृत पाठ्यक्रम ल्याई सकेको छ, साथै आगामि शैक्षिक सत्र २०८० देखि कक्षा ५, ८ र १० को पनि नयाँ पाठ्यक्रम लागु हुने भएको छ । त्यसैले पाठ्यक्रम सम्बन्धि ज्ञान शिक्षकहरुले जान्नु र बुझ्नु पर्ने सबै भन्दा पहिलो ज्ञान भएकोले यो अभिमुखीकरण आयोजना गरेका हौँ ।”

परिवर्तित पाठ्यक्रमको बारेमा विषय शिक्षकहरुमा पर्याप्त ज्ञान हुनुका साथै वार्षिक कार्य घण्टा, आन्तरिक एवं बाह्य मूल्याकंन, अन्तिम मूल्याकंन र विशिष्टिकरण तालिका सम्बन्धि बुझ्न पनि आजको यस प्रशिक्षणले टेवा पुग्ने अध्यक्ष खड्काले बताउनु भयो ।

राष्ट्रपतिले सैनिक शासन लागू गरेर भए पनि देश बचाउनु पर्छ : बिजुक्छें

भक्तपुर, १८ भदौ । नेपाल मजदुर किसान पार्टीका केन्द्रीय अध्यक्ष नारायणमान बिजुक्छेँले नागरिकता विधेयक देशघाती भएको रहेको बताउनु भएको छ ।

नेमकिपाको केन्द्रीय समितिको बैठकमा बोल्दै उहाँले यो विधेयकको कारण देश नै नरहने परिस्थिति आउने हुँदा राष्ट्रपतिले सैनिक शासन लागू गरेर भए पनि देश बचाउनुपर्ने बताउनु भएको हो । उहाँले आगामी निर्वाचनमा पनि नेमकिपाले भाग लिने तर पुँजीवादी सरकारमा भने नजाने बताउनु भयो ।

आगामी निर्वाचनमा पनि नेमकिपाले लेनिनवादी सिद्धान्तअनुसार संसद्को क्रान्तिकारी उपयोग गर्ने बताउदै उहाँले देशघाती नागरिकता विधेयक, एमसीसी सम्झौता र एसपीपी समझदारीका पक्षधरहरूको आगामी निर्वाचनमा जनताले मत नदिएर हराउनु पर्ने उहाँले धारणा राख्नु भयो ।

शासक दलहरूको अकर्मण्यताको कारण राजनीतिप्रति नै जनताको वितृष्णा देखिएको बताउनु भयो । उहाँले आगामी निर्वाचनमा पनि सिद्धान्तहीन गठबन्धन गर्नेहरूविरुद्ध नेमकिपाले सैद्धान्तिक संघर्ष गर्ने बताउनु भयो ।

सत्तामा बस्दै आएका नेपालका कम्युनिस्ट पार्टीहरूले समाजवादबारे भ्रम छरेको टिप्पणी गर्दै अध्यक्ष बिजुक्छेले समाजवादमा उत्पादनका मुख्य मुख्य साधन र सेवा सामाजिकीकरण, शिक्षा र स्वास्थ्य निःशुल्कको व्यवस्था, व्यक्तित्व विकासमा समान अवसर, धनी र गरिबको दूरी कम गर्ने, गाउँ र सहरबीचको भेद कम गर्नेजस्ता बन्दोबस्त लागू हुनुपर्नेमा जोड दिनु भयो ।

बैठकमा नेमकिपाका केन्द्रीय सचिव प्रेम सुवालले पार्टी केन्द्रीय समितिको प्रतिवेदन प्रस्तुत गर्नुभएको थियो । पार्टीको केन्द्रीय परिषद् बैठक आज र भोली १९ चल्ने बताइएको छ । केन्द्रीय परिषद्को बैठकमा केन्द्रीय पदाधिकारी तथा सदस्यहरू, जिल्लाका अध्यक्षहरू, जनवर्गीय संगठन तथा पेशागत संगठनका पदाधिकारीहरूको सहभागिता रहेको नेमकिपाले जानकारी दिएको छ ।

समानुपातिक प्रणाली खारेज गरौँ, राष्ट्रिय सभाको सदस्य संख्या थपौ : काँग्रेस वाग्मति प्रदेश सभापति बाँनिया

भक्तपुर, १८ भदौ : नेपाली कांग्रेस वाग्मती प्रदेशका सभापति ईन्द्र बाँनियाले आगामी निर्वाचनदेखि समानुपातिक निर्वाचन प्रणाली खारेज गर्नुपर्ने बताउनु भएको छ ।

आज नेपाली कांग्रेस सूर्यविनायक नगर समितिको सिरुटारको बिरुवामा सुरु भएको दुई दिने प्रथम नगर सम्मेलनको उद्घाटन उहाँले प्रतिनिधि सभा र प्रदेश सभाको समानुपातिक प्रणाली खारेज गर्नुपर्ने बताउनु भएको हो । उहाँले समानुपातिक प्रणाली खारेज गर्दै राष्ट्रिय सभाको ५९ सदस्य संख्यालाई १०० पुरर्याउन कांग्रेस लाग्नु पर्नेमा जोड दिनु भयो ।

प्रदेश सभा देशका लागि भारी भएको भन्दै प्रदेश सभापति बानियाँले संघीयतालाई खारेजीको माग राख्ने तत्वलाई निस्तेज बनाउन मंसिरको निर्वाचनमा गठबन्धनले दुई तिहाई बहुमत ल्याएर प्रदेश सभा र प्रतिनिधि सभामा समानुपातिक प्रणाली खारेज गर्ने नीति लिनुपर्ने बताउनु भयो ।

नेपाली कांग्रेस भक्तपुरका सभापति दुर्लभ थापाले कांग्रेस भित्र वडादेखी संघीय संसदको टिकट एउटै व्यक्तिले पटक पटक दावी गर्ने प्रवृत्तिले नेता व्यवस्थापनमा चुनौती थपिएको बताउनुभयो ।

वाग्मति प्रदेशका भौतिक पुर्वाधार विकास मन्त्री कृष्णलाल भँडेल, नगरसभापति निशान ढुंगेल, क्षेत्रीय सभापतिद्धय जीवन खत्री र भेषबहादुर कार्की, पुर्व जिल्ला सभापति एवम् पुर्व सांसद लेखनाथ न्यौपाने, मध्यपुर थिमि नगर सभापति हरिदास प्रजापति, नेपाली कांग्रेस भक्तपुर क्षेत्र नं. २ (क) प्रदेश समिति सभापति प्रदिप कार्कीलगायतले आगामी मंसिर ४ गतेको निर्वाचनमा कांग्रेसले आफ्ना उम्मेदवारलाई विजयी बनाउन एकजुट भएर लाग्नु पर्ने बताउनु भयो ।
अधिवेशनले नयाँ कार्यसमिति चयन गर्दै भोली सम्पन्न हुने नगर सभापति ढुंगेलले जानकारी दिनु भयो ।

शिक्षा र स्वास्थ्यको जिम्मा सरकारले लिनुपर्छ : वरिष्ठ नेता पौडेल

तनहुँ, १८ भदौ  : नेपाली कांग्रेसका वरिष्ठ नेता रामचन्द्र पौडेलले शिक्षा र स्वास्थ्यको जिम्मा सरकारले लिनुपर्ने बताउनुभएको छ । तनहुँको व्यास नगरपालिका–१ भादगाउँस्थित आदिकवि भानुभक्त क्याम्पसको आज आयोजित ३६औँ वार्षिकोत्सव तथा ११औँ साधारणसभाको उद्घाटन गर्दै उहाँले संविधानमा नै समाजवाद उन्मुख लेखिएकाले शिक्षा र स्वास्थ्यको जिम्मेवारी सरकारले लिनुपर्ने बताउनुभयो । देशलाई काम गर्ने जनशक्ति आवश्यक भएको उल्लेख गर्दै नेता पौडेलले सीपवान नागरिक तयार गर्ने खालको शिक्षा अहिलेको आवश्यकता रहेको औँल्याउनुभयो ।

आदिकवि भानुभक्त क्याम्पसलाई प्राविधिक क्याम्पसको रुपमा रुपान्तरण गर्नुपर्ने उहाँको भनाइ थियो । उहाँले भन्नुभयो, “सीपवान नागरिक उत्पादन गर्नुपर्छ, त्यसका लागि प्राविधिक शिक्षाको खाँचो छ । आदिकवि क्याम्पस अब उक्त बाटोमा अगाडि बढ्नुपर्छ ।” वरिष्ठ नेता पौडेलले मुलुकको नेतृत्व गर्ने इच्छाशक्ति आफूमा रहेकाले अहिल्यै सक्रिय राजनीतिबाट विश्राम नलिने बताउनुभयो । “सक्रिय राजनीतिबाट म अहिल्यै उन्मुख हुन्न”, उहाँले भन्नुभयो ।

कार्यक्रममा तनहुँ क्षेत्र नं १ का सांसद एवं पूर्वमन्त्री कृष्णकुमार श्रेष्ठ, गण्डकी प्रदेशका आन्तरिक मामिलामन्त्री डोवाटे विक, प्रदेश सांसद सरिता गुरुङ, जिल्ला समन्वय समितिका प्रमुख शान्तिरमण वाग्ले, नेकपा एमाले तनहुँका अध्यक्ष एवं म्याग्दे गाउँपालिकाका अध्यक्ष श्रीप्रसाद श्रेष्ठ, व्यास नगरपालिकाका प्रमुख वैकुण्ठ न्यौपाने, नेपाली कांग्रेसका उपसभापति देवकुमार श्रेष्ठ, क्याम्पस सञ्चालक समितिका अध्यक्ष ब्रम्हदत्त तिमिल्सिनालगायतले आ–आफ्नो धारणा राख्नुभएको थियो । सो अवसरमा क्याम्पस स्थापनाकालदेखि सहयोग पु¥याउनुहुने पूर्वराज्यमन्त्री अमरराज कैनी, तमबहादुर दरै र दामोदर खनाललाई सम्मान गरिएको थियो । हाल उक्त क्याम्पसमा तीन हजार एक सय विद्यार्थी अध्ययनरत छन् ।

आउने निर्वाचनको नतिजापछि एमालेको सरकार बन्छ : अध्यक्ष ओली

इनरुवा, १८ भदौ  : नेकपा (एमाले) का अध्यक्ष तथा पूर्वप्रधानमन्त्री केपी शर्मा ओलीले आउने निर्वाचनबाट नेकपा (एमाले)को नेतृत्वमा सरकार बन्ने दाबी गर्नुभएको छ । सुनसरीको दुहबी नगरपालिकामा आज एमाले क्षेत्र नं ३ ले आयोजना गरेको कार्यक्रममा उहाँले आफ्नो पार्टीले जनमत प्राप्त गर्ने विश्वास व्यक्त गर्नुभयो ।

एक वर्षमा सरकारले विकास निर्माणका आयोजनाहरू कटौती गरेको आरोप लगाउँदै अध्यक्ष ओलीले सामाजिक न्याय र समानताका आधारमा सबैलाई बराबरी हक, बराबरी सुरक्षा, बराबरी अवसर, बराबरी सम्मानका आधारमा राष्ट्रिय एकता कायम गरेर एकता प्रबद्ध प्रयासद्वारा नेपाललाई विश्वको नमूना राष्ट्रिय बनाउन सकिने विश्वास व्यक्त गर्नुभयो । फरक प्रसङ्गमा अध्यक्ष ओलीले मङ्सिर ४ गतेको निर्वाचनमा देश, जनता, लोकतन्त्र, राष्ट्रियता, स्वाधीनता, स्वतन्त्रताले नहार्ने बताउनुभयो ।

डा आरजु राणा बागलुङ क्षेत्र नं २ बाट सिफारिस

बागलुङ , १८ भदौ : नेपाली कांग्रेस बागलुङले बागलुङ क्षेत्र नं २ बाट प्रधानमन्त्री पत्नी डा आरजु राणा देउवासहित १० जनाको नाम सिफारिस गरेर पठाएको छ ।

नेपाली कांग्रेस बागलुङ क्षेत्र नं २ को आज बसेको बैठकले डा आरजु राणा देउवासहित नेपाली कांग्रेस सभापति जीत शेरचन, गणेश शेरचन, टेकराज पौडेल, देवीप्रकाश भट्टचन, दोर्णकुमार कुँवर, नरबहादुर पुन निरज, रामप्रसाद आचार्य, डा शान्तराज आचार्य र सिंहबहादुर राणाको नाम सिफारिस गरिएको बागलुङ क्षेत्र नं २ का क्षेत्रीय सभापति जोकलाल बुढाले जानकारी दिनुभयो ।

बुढाका अनुसार बागलुङ क्षेत्र नं २ मा नेपाली कांग्रेस बलियो सङ्गठन रहेको भन्दै गठबन्धमा भागबण्डा मिलाउँदा उक्त क्षेत्र कांग्रेसले पाउनुपर्ने बताउनुभयो ।

अन्तर्राष्ट्रिय क्षेत्रमा खरो उत्रनसक्ने खेलाडी बनाउनुपर्छ : प्रधानमन्त्री

काठमाडौँ, १७ भदौ : प्रधानमन्त्री शेरबहादुर देउवाले नेपाली खेलकुद क्षेत्रमा निखारता ल्याउँदै खेलाडीलाई अन्तर्राष्ट्रिय क्षेत्रमा खरोरुपमा उत्रनसक्ने बनाउनुपर्ने बताउनुभएको छ । काठमाडौँमा आज राष्ट्रिय खेलकुद परिषद् (राखेप) को ५९औँ वार्षिकोत्सव समारोहमा प्रधानमन्त्री देउवाले पछिल्लो समयमा खेलाडीले अन्तर्राष्ट्रिय क्षेत्रमा सहभागी भई मुलुकको नाम उच्च बनाउँदै गएको स्मरण गर्दै अझै सफलता प्राप्त गर्नुपर्ने आवश्यकता औँल्याउनुभयो ।

“खासगरी केही वर्षयता नेपाली खेलाडीले अन्तर्राष्ट्रिय प्रतियोगितामा विजयी भएर नेपालको नाम उँचो बनाउँदै विजयको माला पहि¥याएर फर्किनु हामी सबैका लागि गौरवको विषय हो, यसका लागि सम्पूर्ण खेलाडी तथा प्रशिक्षकलाई धन्यवाद दिन चाहन्छु”, प्रधानमन्त्री देउवाले भन्नुभयो, “अझै उच्च सफलता प्राप्त गर्दै नेपालको प्रतिष्ठा अभिवृद्धि गर्दै लैजानेछ भन्ने अपेक्षा छ, खेलकुदमा अझै निखार ल्याउँदै अन्तर्राष्ट्रिय क्षेत्रमा खरो उत्रनसक्ने बनाउनु आजको आवश्यकता हो, यस कार्यमा नेपाल सरकारको पूर्ण सहयोग रहने प्रतिबद्धता जनाउन चाहन्छु ।”

प्रधानमन्त्री देउवाले सीमित स्रोत र साधनका बाबजुद नेपाली खेलकुद क्षेत्रले हालसम्म प्राप्त गरेको उपलब्धि प्रशंसनीय रहेको बताउनुभयो । उहाँले नेपाली खेलाडीले विभिन्न कठिनाइका बाबजुद स्वदेश तथा विदेशमा उत्कृष्ट प्रस्तुति दिँदै आएको पनि खुसी व्यक्त गर्नुभयो । उहाँले राष्ट्रिय तथा अन्तर्राष्ट्रिय प्रतियोगितामा उत्कृष्ट प्रदर्शन गर्ने खेलाडी देशका गहना भएको बताउनुभयो । उहाँले देशको शिर उँचो बनाउन खेलाडीले गरेको मेहनत र प्राप्त उपलब्धिको सरकारले उच्च मूल्याङ्कन गरेको उल्लेख गर्नुभयो ।

खेलाडीलाई सम्भव भएसम्म आर्थिक र गैरआर्थिक सुविधाका साथ प्रोत्साहित गर्न सरकार प्रयत्नशील रहेको प्रधानमन्त्री देउवाको भनाइ थियो । खेलाडीको क्षमता विकासका लागि आर्थिक सुधारका अतिरिक्त खेल पूर्वाधार महत्वपूर्ण पक्ष रहेको उहाँले बताउनुभयो । उहाँले मुलुकको विभिन्न क्षेत्रमा अन्तर्राष्ट्रियस्तरको पूर्वाधार विकास गर्ने योजना सरकारको प्राथमितामा रहेको जानकारी दिँदै खेलाडीलाई नियमित अभ्यास र अन्तर्राष्ट्रियस्तरको प्रशिक्षणको आवश्यकता औँल्याउनुभयो ।

खेलकुदका क्षेत्रमा राष्ट्रियस्तरको पूर्वाधार निर्माण गरी क्षेत्रीय र अन्तर्राष्ट्रिस्तरको खेलकुद प्रतियोगिता सञ्चालन गर्ने वातावरण निर्माण गर्न सम्बन्धित मन्त्रालय र राखेपले थप सक्रियता दिनुपर्नेमा जोड दिनुभयो । प्रधानमन्त्री देउवाले मुलुकमा विभिन्न प्रकारका राष्ट्रिय तथा प्रादेशिकस्तरका खेल आयोजना गरी निरन्तररुपमा खेलाडीको प्रतिभालाई तिखार्ने अवसर दिलाउन परिषद्लाई निर्देशन दिनुभयो ।

नियमित खेलकुदका कार्यक्रम आयोजना हुन नसक्दा खेल प्रतिभा पलायन हुनेतर्फ ध्यानाकर्षण गराउँदै उहाँले परिषद्को संस्थागत विकासका लागि सरकार प्रयत्नशील रहेको पनि जानकारी दिनुभयो । उहाँले परिषद्ले आफ्ना कमजोरी सुधार गर्दै खेल क्षेत्रको विकासमा नेतृत्वदायी भूमिका निर्वाह गर्न सकोस् भनी शुभकामना दिनुभयो ।

ओलम्पिकमा स्वर्ण विजेतालाई एक करोड ३० लाख दिनेगरी कानुनी व्यवस्था हुँदैछ : मन्त्री गहतराज

उक्त समारोहमा युवा तथा खेलकुदमन्त्री महेश्वर जङ गहतराजले राज्यले ओलम्पिकमा स्वर्ण पदक विजेता खेलाडीलाई रु एक करोड ३० लाख पुरस्कार दिने घोषणका लागि राज्यले कानुनी व्यवस्था गर्न लागेको जानकारी दिनुभयो ।

मन्त्री गहतराजले भन्नुभयो, “खेलाडीले अब खेल खेल्दा खाली हात होइन्छ कि भनेर सोच्नुपर्ने अवस्था छैन, राष्ट्रका लागि खेल खेल्ने उनीहरूलाई राज्यले उचित सम्मान र पुरस्कारको प्रबन्ध गर्न लागेको छ, आगामी मन्त्रिपरिषद्बाट पास हुँदैछ ।” उहाँले आगामी एशियन खेलमा स्वर्ण पदक जित्ने खेलाडीले रु ३०÷३२ लाख पुरस्कार प्राप्त गर्ने पनि जानकारी दिनुभयो । केही दिनमा मन्त्रिपरिषद्बाट पारित हुन लागेको राष्ट्रिय खेलकुद परिषद्को नियमावलीमा खेलाडीलाई उक्त पुरस्कार दिने व्यवस्था गर्न लागिएको उहाँले जानकारी दिनुभयो ।

“उत्कृष्ट खेल खेलेमा कानुनीरुपमा नै राज्यबाट सम्मान र पुरस्कार प्राप्त गर्ने आधार तयार भएको छ”, समारोहमा उहाँले थप्नुभयो । मन्त्री गहतराजले खेलाडीले उच्च मनोबलका साथ राष्ट्रका लागि खेल्दैछौँ, व्यक्तिगतरुपमा पनि खेलबाट राम्रो व्यवस्था हुँदैछ भन्ने कुरालाई आत्मसात गर्नुपर्ने अवस्था आएको पनि बताउनुभयो । खेललाई अब सामान्य क्रियाकलापका लागि मात्रै नभएर उद्योग र अन्तर्राष्ट्रिय सम्बन्धका रुपमा विकास गर्नुपर्ने तथा प्राकृतिक सौन्दर्यलाई उपयोग गर्दै खेल पर्यटनकैरुपमा विकास गर्दै लैजानु जरुरी रहेको उहाँले बताउनुभयो ।

उहाँले खेलकुदलाई सामान्य क्रियाकलापले मात्रै बुझ्ने गल्ती गरेमा तत्वयिक सफता प्राप्त गर्न नसकिने बताउनुभयो । उहाँले खेललाई जीवनको पर्यायका रुपमा विकास गर्दै बहुआयामिक पक्षसँग जोड्नुपर्ने आवश्यकता औँल्याउनुभयो । उहाँले खेलकुद भनेको विज्ञान हो भन्दै यसलाई खेलकुद शिक्षाका रुपमा विकास गर्नुपर्नेमा जोड दिनुभयो । प्राथमिक तहदेखि नै खेलकुदप्रति लगाव विकास गर्नु आवश्यक रहेको मन्त्री गहतराजको भनाइ थियो ।

सरकारकाले स्पोर्टस् विश्वविद्यालय बनाउने सोचका साथ नीति तथा कार्यक्रममा समावेश गरेको जानकारी दिँदै उहाँले त्यसले ओलम्पिकसम्मको यात्रालाई सफलतामा पु¥याउन मद्दत गर्ने बताउनुभयो । “अन्तर्राष्ट्रिय प्रतियोगिता जुन क्रमले अघि बढिरहेको छ, त्यसतर्फ हेर्दा निरन्तर खेल प्रतियोगिता गर्दै जाने र तल्लो तहदेखि नै खेलाडी उत्पादन गर्नुपर्ने आवश्यकता छ”, उहाँले भन्नुभयो । मन्त्री गहतराजले सरकारले आगामी साफ गेमको तयारी गरिरहेको तथा २३ सेप्टेम्बरमा एशियन खेल हुँदै गएकाले राम्रो तयारीको आवश्यकता औँल्याउनुभयो ।

 प्रथम राष्ट्रिय धामीझाँक्री सम्मेलन

झापा, १८ भदौ : नेपाल प्रज्ञा–प्रतिष्ठानका उपकुलपति वरिष्ठ संस्कृतिविद् डा जगमान गुरुङले धामीझाँक्रीमा वर्ग, लिङ्गजस्ता कुनै पनि किसिमको विभेद् नहुने बताउनुभएको छ । धामीझाँक्री समाजको अभिन्न अङ्ग भएकोे भन्दै उहाँले धामीझाँक्रीलाई समाजमा अझै पनि उच्च स्थानमा राख्ने गरिएको बताउनुभयो ।

नेपाल राष्ट्रिय धामी वैद्य सङ्घद्वारा आज झापाको विर्तामोडमा आयोजित प्रथम राष्ट्रिय धामीझाँक्री सम्मेलन तथा ‘नेपाली धामीझाँक्री संस्कृति तथा परम्परागत उपचार पद्धति’ विषयक पुस्तक लोकार्पण कार्यक्रममा गुरुङले धामीझाँक्रीलाई हेयका दृष्टिले हेर्न नहुने धारणा राख्नुभयो । झाँक्रीविद् एवं पुस्तकका परिकल्पनाकार भोलानाथ बाँस्तोलाको अनुसन्धान, निर्देशन र प्रकाशनमा प्रकाशित पुस्तकमा २० जना धामीझाँक्रीको अनुभव समेटिएको छ ।

कार्यक्रममा संस्कृति, पर्यटन तथा नागरिक उड्डयन मन्त्रालयका संस्कृतिविद् डा भक्त राईले धामीझाँक्री परम्परा र विज्ञान, नेपाल संस्कृत विश्वविद्यालयका तन्त्रविद् डा माधवप्रसाद लामिछानेले धामीझाँक्री परम्परासँग वैदिक र तान्त्रिक सिद्धान्तको अन्तर सम्बन्ध, पुस्तकका सम्पादक सापकोटाले बलि परम्परा, पञ्चतत्व, पाञ्चायन देवता र तन्त्र र झाँक्रीविद् बाँस्तोलले लोकसंस्कृति र परम्परामा झाँक्रीको स्थान साथै धामीझाँक्रीले चलाउने सामग्रीका विषयमा कार्यपत्र प्रस्तुत गर्नुभएको थियो ।

कार्यक्रममा रु एक करोड ६० लाखको लागतमा अर्जुनधारा–७ स्थित जरुवामा निर्माण हुने सङ्घको भवनसहित सङ्ग्रहालय र गुफा घरको गुरुयोजनासमेत सार्वजनिक गरिएको थियो । सो समारोहमा गुरु डिल्लीराम आचार्य, छविलाल रसाइली, डिल्लीराम बाँस्कोटा, खडानन्द अधिकारी, गोगलाल राजवंशी, दलबहादुर लक्सम, बाबुलाल दनुवार, मीनकुमार दनुवारले झाँकी र मुकुट प्रदर्शन गर्नुभएको थियो । सम्मेलनमा झापासहित ताप्लेजुङ, इलाम, मोरङ र धनकुटा गरी पाँच जिल्लाका धामीझाँक्री सहभागी भएका थिए ।

नेपाल डिस्ट्रिक्ट अफ अप्टिमिष्ट इन्टरनेशनलको प्रथम जिल्ला अधिवेशन भक्तपुरमा सुरु

भक्तपुर, १७ भदौ । नेपाल डिस्ट्रिक्ट अफ अप्टिमिष्ट इन्टरनेशनल ( Nepal District of Optimist International) को प्रथम जिल्ला अधिवेशनमा भक्तपुरमा शुक्रबारबाट सुरु भएको छ । भक्तपुरको गठ्ठाघरमा सुरु भएको दुई दिने अधिवेशनमा मानिसलाई जीवन जिउँने क्रममा आशावादी बनाएर लैजानेबारे व्यापक छलफल भएको छ ।

कार्यक्रमको पहिलो उद्घाटन सत्रमा राष्ट्रिय समाचार समितिका अध्यक्ष धर्मेन्द्र झाले बोल्दै आशाहरुले मान्छेलाई बचाउँने भएकाले मानिसको जीवन निराशा हुन नहुने बताउनु भया्े । उहाँले आशा नै नहुने हो भने जीवन सकिने भएकाले जीवनमा आशा जगाउनु पर्ने बताउनु भयो ।

समाचार लेख्न पत्रकारलाई पनि राम्रा कुराहरु देखाउनु पर्नेमा चर्चा गर्दै उहाँले भन्नुभयो, “पत्रकारले जे देख्छ, त्यहीँ लेख्छ, तपाईले पत्रकारलाई राम्रो देखाउनुहोस्, राम्रै लेख्छ, नराम्रो देखउनु भयो भने त नराम्रै लेख्छ नी, पत्रकारले सत्य पस्किने हो, तर सत्य पस्किने भन्दैमा पत्रकारले पनि कसैको जीवनप्रतिको मोहमा आक्रमण गर्नु हुदैन, भविश्यको आशामा आक्रमण गर्नु हुदैन ।”

समाजमा दुःख र पीडा छ भन्दैमा एउटा पत्रकारले दुःख र पीडा मात्रै पस्किने काम गर्नु हुदैन भन्दै उहाँले त्यसको समाधानको उपाय पनि पस्किनु पर्नेमा जोड दिनु भयो । उहाँले भन्नुभयो, “दुःख र पीडाको समाधानको उपाय पनि पत्रकारले खोज्नु पर्छ आजको पत्रकारितामा त्यो जरुरी छ, आशावादीका कुरा पनि पत्रकारिताले दिनु पर्छ । त्यो दिन सकेन भने निराशावादी मात्रै हुन्छ, त्यसले जीवनको मोह सकिन्छ ।”

म खुसी भए भने मात्रै म जस्ता अन्य व्यक्ति पनि खुसी हुन्छन् र समाज खुसी हुन्छ भन्ने मान्यता स्थापित गर्नुजरुरी रहेको औल्याउँदै उहाँले व्यक्ति आफ्नो स्वतन्त्र अधिकार प्रयोग गर्दै भएर खुसी भएर बाँच्ने मोह जगाउँने बताउनु भयो ।

आज मात्रै होइन भोलीका लागि पनि आशावादी हुनु पर्छ भन्दै उहाँले जबसम्म बाच्छौ सुखले बाँचौ, मरे पछि कसले देख्छ भन्नु भयो । नेपाल पत्रकार महासंघका पूर्व अध्यक्ष समेत रहनु भएका राससका अध्यक्ष झाले बुद्ध दर्शनको चर्चा गर्दै भन्नुभयो, “आउँदा न सम्पत्ति लिएर आएका थियौ, न लिएर जान्छौ, आफूले सञ्चय गरेको धन के हुन्छ, यदि छोरा छोरी सपुत छन् भने आफ्नो व्यबस्था आफै गर्छन्, कपुत छन् भने त सञ्चय गरिदिएको पनि सिध्याउछन् ।”

उहाँले २०६२ सालको बैशाख २ गते एकैदिन तीन वटा घट्ना भएको स्मरण गर्दै भन्नुभयो, “बैशाखमा एकैदिन तीन वटा घट्ना घट्यो, कोशीको बाँध टुट्यो, जनधनको क्षति भयो, त्यही दिन सरकार परिवर्तन भयो र नेपाल पत्रकार महासंघका अध्यक्ष म ठूलो सडक दुर्घटनामा परे । भोली पल्ट ३ गते होसमा आउँदा म आफू बाँचेकोमा धेरै खुसी भए, मलाई त्यसले ठूलो आशा जगायो ।”

कार्यक्रममा नेपाल पत्रकार महासंघका अध्यक्ष विपुल पोखरेलले आउँदो पुस्तालाई अझै सुन्दर कसरी बनाउने, आशा सहितको जीवन जिउँने सन्दर्भमा निराशाको बाटो बन्द गर्दै बालबालिका र किशोर किशोरीलाई आशा कार्यक्रमहरु व्यापक बनाउनु पर्नेमा जोड दिनु भयो । नीति राज्य बनाउदैमा सबै सफल हुदैन भन्दै उहाँले समुदायलाई संगठित गर्दै सही बाटोमा लगे मात्रै राज्यको नीति सहि मार्गमा कार्यान्वयन हुने बताउनु भयो ।

नेपालको सन्दर्भमा एउटा नागरिकले सबभन्दा पहिला पाउने नागरिकता हो, त्यो पाउन उसले व्यहोर्ने सास्ती, पैसा नखुवाई सवारी लाइसेन्स बन्दैन भन्ने मानसिकता र राज्यबाट पाउने सेवा सुविधा लिन व्यहोर्नु पर्ने झन्झट र पनि पैसा नखुवाइ हुदैन भन्ने गलत संस्कारको अन्त्य हुनु पर्ने बताउनु भयो ।

अहिलेका विद्यार्थीलाई कसरी यो मुलुक छाडेर विदेश जाने, नेपालका कुनै भविश्य छैन भन्ने पर्दा पनि उनीहरुमा आशा जगाउन नसक्नु दुर्भाग्य भएको चर्चा गर्दै अध्यक्ष पोखरेलले मानिसमा साना कुराले पनि आशा जगाउने भएकाले हरेक नागरिकमा आशा जगाउने कार्यक्रम ल्याउनु जरुरी रहेको बताउनु भयो ।

कार्यक्रममा नेपाल डिस्ट्रिक्ट अफ अप्टिमिष्ट इन्टरनेशनलका गभर्नर उदय निरौलाले सामुदायीक विद्यालयहरुमा विद्यार्थीहरुसँग प्रतक्ष्य सम्पर्कमा रहेर किशोर स्वास्थ्य तथा कल्याण (ब्मयभिकअभलत ज्भबतिज बलम ध्भििलभकक) का विषयमा कार्यशाला गर्दै आएको बताउनु भयो ।

उहाँले किशोरकिशोरीमा निराशापनले डरलाग्दो रुपमा जरो गाडेको अबस्थामा बालबालिका र किशोरकिशोरीहरुमा सकारात्मक भावना तथा आशावादी आशावादी जीवन दर्शनको प्रवद्र्धन गर्ने उदेश्यका साथ संस्था अगाडि बढेको चर्चा गर्नुभयो । नेपाल डिस्ट्रिक्ट अफ अप्टिमिष्ट इन्टरनेशनलका महासचिव पृथ्वीराज थापाले ४१ वटा क्लबको १३० जना भन्दा बढीको सहभागिता रहेको अधिवेशनले आगामी दुई वर्षका लागि नयाँ कार्यसमिति चयन गर्ने बताउनु भयो ।

कार्यक्रममा हिसानका राष्ट्रिय अध्यक्ष रमेश सिलवाल, प्याब्सनका अध्यक्ष डिके ढुङ्गाना, एन प्याब्सनका अध्यक्ष पाण्डव हमाल, एन प्याब्सनका पूर्व अध्यक्ष ऋतुराज सापकोटा, किवानिज नेपाल डिस्ट्रिक गर्भनर लक्ष्मण लम्साललगायतले जीवन र आशाको महत्व माथि प्रकाश पार्नु भएको थियो ।

कक्षा १२ को नतिजा सार्वजनिक, ग्रेड बृद्धिको परीक्षा असोज ३० र ३१ गते हुने

भक्तपुर, १७ भदौ । राष्ट्रिय परीक्षा बोर्ड सानोथिमिले आज कक्षा १२ को नतिजा सार्वजनिक गरेको छ । आज बसेको बैठकले बोर्डको नतिजा सार्वजनिक गरेको बोर्डका अध्यक्ष डा. महाश्रम शर्माले जानकारी दिनु दिनुभयो ।

यस वर्ष परीक्षा उतीर्ण हुनका लागि प्रयोगात्मक परीक्षामा ४० र सैद्धान्तिक परीक्षामा ३५ प्रतिशत ल्याउनै पर्र्ने व्यवस्था गरिएको उहाँले जानकारी दिनुभयो । त्योभन्दा कम अंक ल्याएको खण्डमा पुनः परीक्षा दिनुपर्ने बोर्डले जनाएको छ । उहाँका अनुसार नियमित तर्फ तीन लाख ६३ हजार आठ, ग्रेड बृद्धितर्फ ३० हजार ४५ र आंशिक तर्फ तीन हजार १३२ गरि कूल तीन लाख ९६ हजार १८५ विद्यार्थीले परीक्षामा सहभागिता जनाएका थिए ।

जसमध्ये नतिजामा चार हजार १७९ जनाले ३ दशमलव ६१ देखि ४ जिपिए, ३० हजार १०७ जनाले ३ दशमलव २१ देखि ३ दशमलव ६० जिपिए, ६५ हजार २८४ जनाले २ दशमलव ८१ देखि ३ दशमलव २० जिपिए, ६४ हजार ९३ जनाले २ दशमलव ४१ देखि २ दशमलव ८० जिपिए, १० हजार ९०० जनाले २ दशमलव ०१ देखि २ दशमलव ४० जिपिए र ३५ जनाले १ दशमलव ६१ देखि २ जिपिए ल्याएका छन् ।

बोर्डका उपाध्यक्ष डा. शर्माले भन्नुभयो, “यसवर्ष एक लाख ८८ हजार विद्यार्थी नन ग्रेडिङमा परेका छन् । त्यस मध्येमा एक लाख ३० हजार ८७८ जनाले मात्रै ग्रेड बृद्धि परीक्षामा सहभागि हुन पाउँछन् ।” दुई विषयमा निर्धारित प्रतिशत भन्दा कम ल्याउने विद्यार्थीले पुनः ग्रेड बृद्धि परीक्षा सहभागि हुन पाउँछन् । बोर्डले देशभरका १ हजार २९२ परीक्षा केन्द्रमा परीक्षा केन्द्रमा गत जेठ १६ देखि २५ गतेसम्म परीक्षा सञ्चालन गरेको थियो ।

बोर्डले यसवर्षको नतिजामा ग्रेड बृद्धि परीक्षामा सहभागि हुन पाउने एक लाख ३० हजार ८७८ परीक्षार्थीका लागि आउँदो असोज ३० र ३१ गते परीक्षा सञ्चालन गर्ने गरि आजै परीक्षा तालिकासमेत सार्वजनिक गरेको अध्यक्ष डा. शर्माले जानकारी दिनु भयो ।

बोर्डका अनुसार नतिजा राष्ट्रिय परीक्षा बोर्डको वेबसाइट www.neb.gov.np, नेपाल टेलिकमको वेबसाइट www.neb.ntc.net.np मा गएर हेर्न सकिन्छ । त्यसैगरी एसएमएसबाट पनि नतिजा हेर्न सकिने छ । त्यसका लागि neb लेखेर एक स्पेस दिई आफ्नो सिम्बोल नम्बर टाइप गरी १६०० नम्बरमा र नेपाल टेलिकमको १६०१ मा एसएमएस पठाएर पनि हेर्न सकिने छ ।