गाडी मुनी छिरेर खेल्न थालेका १७ महिने बालक सोही गाडीले किच्दा मृत्यु

भक्तपुर, ७ असोज । मध्यपुरथिमि नगरपालिका–१ लोकन्थलीमा पानी झार्न रोकिराखेको बा. ५ ख. ७८१७ नं. ट्रकमुनी खेल्दै छिरेका एक १७ महिनाको बालिकको सोही ट्रकले किच्दा आज मृत्यु भएको छ ।

सिन्धुपाल्चोक त्रिपुरासुन्दरी गाँउपालिका–५ घरभई हाल लोकन्थली बस्ने केशवलाल श्रेष्ठको १७ महिनाको छोरा सलिन श्रेष्ठ खेल्दै गाडीमुनि छिरेको अबस्थामा गाडी अगाडी बढाउदा किचेर गम्भिर घाईते भई उपचारको लागि समिट अस्पताल लोकन्थली लगे पनि मृत्यु भएको अस्पतालले जनाएको महानगरीय प्रहरी परिसर भक्तपुरका प्रहरी नायब उपरीक्षक राजू पाण्डेले जानकारी दिनु भयो ।

प्रहरीले सवारी साधन र चालक सिन्धुपाल्चोक मेलम्ची गाँउपालिका –३ घर भई हाल काठमाण्डौ मुलपानी बस्ने २३ वर्षीय आकाश भुजेललाई प्रहरी वृत्तथिमिले पक्राउ गरि अनुसन्धान गरिरहेको उहाँले जानकारी दिनु भयो ।