सिसिटीभी क्यामेराले कैद गरिएका डाटा सुरक्षित नै छन् भन्ने अनुमान गर्न सकिन्छ : सर्वोच्च अदालत

काठमाडौँ, ३१ असार  : सर्वोच्च अदालतले अर्थ मन्त्रालयको सिसिटिभी क्यामेराले कैद गरेका डाटाहरु सुरक्षित राखिएको छैन भन्ने अनुमानसमेत गर्न नसकिने भन्दै सो सम्बन्धमा तत्काल अन्तरिम आदेश जारी गर्नु नपर्ने जनाएको छ । आज न्यायाधीश कुमार रेग्मीको एकल इजलासले सिंहदरबार देशको केन्द्रीय प्रमुख प्रशासकीय परिसरभित्रको सुरक्षासमेतलाई दृष्टिगत गर्दा सम्बन्धित निकायहरुले सिंहदरबारभित्र पर्ने अर्थ मन्त्रालयलगायत अन्य मन्त्रालयहरूको सिसिटिभी सुरक्षित नै रहेको अनुमान गर्न सकिने बताएको छ ।

सर्वोच्चले सिंहदरबारको सुरक्षा संवेदनशीलताको कारण यी दृश्य मेटिए होलान् भनी अनुमान गर्न नसकिने भन्दै अन्तरिम आदेश आवश्यक नभएको बताएको छ । अदालतले बजेट निर्माणको गोपनीयता र संवेदनशीलता जोडिएको विषयसँग सम्बन्धित निवेदन भएकाले चाँडो टुंगोमा पुर्याउनुपर्ने भन्दै प्राथमिकता दिन अग्राधिकारको आदेशसमेत दिएको छ । अधिवक्ताहरू सरोजकृष्ण घिमिरे, बाबुराम अर्याल र कपिलदेव ढकालले अर्थ मन्त्रालय र अन्य मन्त्रालयसमेत सिसिटिभी फुटेज सुरक्षित राख्न माग राखी दायर गर्नुभएको रिटको प्रारम्भिक सुनुवाइमा सर्वोच्च अदालतले यस्तो आदेश दिएको हो ।

सात राजदूतको सपथ

काठमाडौँ, ३१ असार  : राष्ट्रपति विद्यादेवी भण्डारीसमक्ष नवनियुक्त नेपाली राजदूतहरूले राष्ट्रपतिको कार्यालय, महाराजगञ्जमा आज आयोजित एक समारोहबीच पद तथा गोपनीयताको शपथ लिनुभएको छ । उक्त अवसरमा परराष्ट्रमन्त्री डा नारायण खड्कालगायत नेपाल सरकारका उच्च पदस्थ अधिकारीसमेतको उपस्थिति थियो ।

शपथ लिने राजदूतहरुमा तीर्थराज वाग्ले (बहराइन), डोरनाथ अर्याल (ओमान), नवराज सुवेदी (साउदी अरेबिया), बासुदेव मिश्र (श्रीलङ्का), भरतकुमार रेग्मी (अष्ट्रिया) तथा संयुक्त राष्ट्रसङ्घ कार्यालय, भियनाका लागि नेपालको स्थायी प्रतिनिधि, सुशीलकुमार लम्साल (इजिप्ट) र घनश्याम भण्डारी (बङ्गलादेश) हुनुहुन्छ ।

शनिवार बिहानै ३०० यात्री साइकलमा सररर……………

भक्तपुर, ३१ असार । भक्तपुरको पर्यटकीय क्षेत्रलाई विश्वमाझ चिनाएर स्वदेशी तथा विदेशी पर्यटकलाई आकर्षित गर्ने मुख्य उदेश्य लिएर भक्तपुरमा ३०० जना भन्दा बढीले एकै साथ साइकल यात्रा अर्थात साइकलिङ च्यालेन्ज गर्ने भएका छन् ।

पैदल र पेडल मैत्री सहर भन्ने मुख्य नाराका साथ कोरा भक्तपुर अभियान चलाएका साइकल कनेक्ट भक्तपुरले आज रफत सञ्चार क्लब सूर्यविनायकमा आयोजना गरेको पत्रकार सम्मेलनमा भोली शनिवार बिहान ६ बजेबाट साइकलिङ च्यालेन्ज कार्यक्रम अन्तर्गत ‘भक्तपुर कोरा २०२२’ सुरु गर्ने जानकारी दिएको हो ।

पत्रकार सम्मेलनमा प्रेस विज्ञप्ती वाचन गर्दै आयोजक साइकल कनेक्ट भक्तपुरका अध्यक्ष सुनिल बालाले भोली शनिवार बिहान पर्यटकीय एवं सम्पदा स्थल भक्तपुर दरबास्क्वायरबाट एकै साथ ५०, ७५ र १०० किलोमिटरको तीन वटा रुटमा साइकलिङ च्यालेन्ज यात्रा सञ्चालन गरिने जानकारी दिनु भयो ।

साइकलिङ च्यालेन्जमा ५० किलोमिटरका लागि ८ महिलासहित १३८ जना, ७५ किलोमिटरका लागि २ महिलासहित ४७ जना र १०० किलोमिटरका लागि ३ महिलासहित १०७ जना गरि कूल २९२ जनाले नाम दर्ता गराएको र भोली बिहानसम्म ३०० भन्दा बढीको सहभागिता रहने उहाँले बताउनु भयो ।

अध्यक्ष बालाले भन्नुभयो, “साँस्कृतिक र प्राकृतिक सौन्दर्यको अवलोकन गर्दै विश्वमाझ नेपाललाई चिनाउदै पर्यटकको आगमन बढाउने मुख्य उदेश्यले यो कार्यक्रम आयोजना गरेका हौ, त्यसको साथै कोरोनाबाट मृत्यु भएका पाराएथलिट तथा साइकलिष्ट यमलाल रसाईको परिवारलाई आर्थिक सहयोग गर्न रु. ६ लाखको कोष स्थापना गर्ने लक्ष्यले यो कार्यक्रम आयोजना गरेका हौँ ।”

यस कार्यक्रममा खाजाका लागि रु. ५०० बाहेक निःशुल्क सहभागिता जनाउन सकिने आयोजकले बताएको छ । सांस्कृतिक र प्राकृतिक छटाहरुको कनेन्ट साइकलबाट गराउने, वातावरण संरक्षणका लागि साइकलिङका प्रवद्र्धन गर्ने, नेपालमा स्वदेशी तथा विदेशी पर्यटकलाई आकर्षित गर्ने लक्ष्य रहेको छ ।

पत्रकार सम्मेलनमा साइकलिङ च्यालेन्ज कार्यक्रमका संयोजक सुनिल ख्याजूले कोरा भक्तपुर साइकलिङ च्यालेन्जका लागि तीन वटा रुट बनाएर भक्तपुरका चार वटै नगरपालिकाका सहरदेखि ग्रामिण क्षेत्रसम्मका आकर्षक पर्यटकीय क्षेत्रहरुको अवलोकन गर्ने बताउनु भयो ।

उहाँले भन्नुभयो “निर्धारण गरिएका तीन वटा रुटमा ३०० जनाले २५ हजार किलोमिटरको यात्रा तय गर्ने भएको छ । यो यात्राका लागि कम्तीमा १३ घण्टा लाग्ने अनुमान हामीले गरेका छाँै, यो यात्रा साईकलप्रेमीहरुका लागि मात्रै नभई पर्यटनप्रेमी र अरुका लागि पनि हो ।”

बिहान ६ बजे भक्तपुर दरबार क्षेत्रबाट सुरु हुने यात्रा सिद्धपोखरी, मध्यपुरथिमिको निकोसेरा, बहाखा बजार, बोडे, निलबाराही, चाँगुनारायण नगरपालिकाको वेशीगाउँ, दुवाकोट, चाँगुनारायण, त्रिशूल डाँडा, तेलकोट, नगरकोट, थाकलमाठ, खावा, नाला गुम्बा, सूर्यविनायक नगरको भंगाल, लटरम्बेश्वर महादेव, साँगा, खाल्चोक, आशापुरी, रानीकोट, गुण्डुप, गाम्चा, सिरुटार, बालकोट, लोकन्थली, कौशलटार, सानोथिमि हुँदै पुनः भक्तपुर दरबार क्षेत्रमा आएर समापन हुने छ ।

च्यालेन्जमा भक्तपुर, काठमाडौं, ललितपुर, बनेपा, पनौति, पोखरा, तनहुँ, धरानलगायतका शहरहरूबाट साइकलयात्री सहभागी रहने संयोजक ख्याजुले बताउनु भयो ।

कार्यक्रममा पर्यटन व्यवसायी एवं होटल हाइल्याण्ड रिसोर्ट रानीकोटका सञ्चालक रामसुन्दर बकेँले साईकलबाट पनि आन्तरिक तथा बाह्य पर्यटनको बिकास गर्न सकिन्छ भनेर युवाहरुले सुरु गरेको अभियान निकै सकारात्मक भएको बताउनु भयो । उहाँले नेपालको साँस्कृतिक सम्पदा एवं प्राकृतिक सोन्दर्यतालाई विश्वमा चिनाउन सफल हुने यस्ता कार्यक्रमले ग्रामिण क्षेत्रको पर्यटनको विकासमा समेत टेवा पुर्याउने बताउनु भयो ।

त्यसअवसरमा नेपाल इको प्यानलका सञ्चालक कृष्ण भक्त दुवाल, रफत सञ्चार क्लबका अध्यक्ष शुसिलबन्धु थापालगायतले सरकारले अब बन्ने सडकमा अनिवार्य साइकल लेनको व्यबस्था गर्न र साईकल यात्रालाई प्रोत्साहन गर्ने कार्यक्रम ल्याउन आग्रह गर्नु भयो ।

जव हातमा मसाल बोकेर सूर्यविनायक सडकमा निस्कियो सरकारको शव

भक्तपुर, २९ असार । भक्तपुरको सूर्यविनायक सडक । साँझ ढल्किदै थियो । मानिसहरुको जमघट बाक्लिदै गयो । केही बेरमै एमाले निकट राष्ट्रिय युवासंघ नेपालका कार्यकर्ताहरु र नेताहरुको उपस्थिति बाक्लियो । अपरान्ह पाँच बजेदेखि नै बाक्लिएको सूर्यविनायक चोकमा युवा संघका नेताहरुले गठबन्धन सरकारले चरम मूल्य बृद्धि गरेर जनताको गाँस बास खोस्न खोजेको र बाच्नै कठिन हुने अबस्थामा पुर्याएको भन्दै सरकारको आलोचना भइरहेको थियो ।

त्यत्तिकैमा सडकमा मानिसहरुले लहरै हात हातमा मसाल लिएर बिच सडकमा सरकारको शव यात्रा गरे । त्यो देखेर वरिपरिका मानिस मात्रै होइन, सडकमा गुडिरहेका सवारी समेत टक्कर रोकिएर सरकारको शव हेर्न थाले ।

हातमा मसाल बोक्नेहरुले शेरबहादुर देउवा नेतृत्व सरकारको आलोचना गर्दै नारा लगाउदै अगाडि बढिरहे. । यो दृश्य हो राष्ट्रिय युवासंघ नेपाल भक्तपुर जिल्ला कमिटीद्वारा जिल्ला कमिटी उपाध्यक्ष कम्रेड रबिन थापा को नेतृत्वमा आयोजित परमादेश संघीय सरकारले गरेको चरम मुल्य वृद्धि र अर्थ मन्त्री जनार्दन शर्माको अनैतिक गतिविधिको विरोध गर्दै मसाल जुलुस प्रर्दशन गरेको थियो भने सरकारको शव यात्रा गरेको थियो ।

कार्यक्रममा एमाले पार्टी जिल्ला कमिटीका अध्यक्ष वचन देउजा र सचिवमोहनवीर श्रेष्ठ को सहभागिता पनि रहेको थियो । कार्यंक्रममा राष्ट्रिय युवासंघ नेपाल भक्तपुर जिल्ला कमिटी, एमाले सुर्यविनायक नगर कमिटी, अखिल नेपाल महिला संघ भक्तपुर २ नम्बर क्षेत्रका नेता कार्यर्का लगायत अन्यको बाक्लो उपस्थिति रहेको थियो ।