गगन थापाले भने पार्टी जोगाउँन एक भएर जाऔं
भक्तपुर, २३ साउन । नेपाली कांग्रेसका सभापति गगन थापाले पार्टीलाई जोगाउँन सबै एक भएर जानु पर्ने बताएका छन् ।
आज बालकोटमा काँग्रेस नेता स्वर्गीय श्यामबहादुर कार्कीको १९ औँ स्मृति दिवसका अवसरमा आयोजित छात्रबृत्ति वितरण तथा रक्तदान कार्यक्रममा बोल्दै सभापति थापाले पार्टीभित्र नमिलेका विषयलाई संवाद र सहमतिका माध्यमबाट मिलाएर लैजानु पर्ने औल्याउँदै पार्टीको मौलिकता र आधारभूत मान्यताबाट टाढा जान नहुने बताए ।
सभापति थापाले कांग्रेस नयाँ बनाउने भनेको यसको जग खोज्ने र मौलिकतामा जाने हो भन्दै काँग्रेसको आईतबारबाट बस्ने केन्द्रीय कार्यसमिति बैठकले महाधिवेशनको मिति तोक्ने बताए ।
सत्ता र शक्तिका लागि सिद्धान्तसँग सम्झौता गरेर प्राप्त हुने सत्ताको कुनै अर्थ नहुने भन्दै सत्ता र शक्ति नागरिकको हितका लागि मात्रै हुनुपर्ने बताए ।
उनले कांग्रेसलाई प्रत्येक कार्यकर्ताले गर्व गर्न सक्ने पार्टी बनाउने प्रतिबद्धता व्यक्त गरे । “कांग्रेस हुँ भन्दा छाती पिटेर गर्व गर्न सक्ने लायकको पार्टी बनाउँछु,” उनले भने ।
कार्यक्रममा सभापति थापाले नेपाली कांग्रेसका संस्थापक नेता तथा नेपालको लोकतान्त्रिक आन्दोलनका विराट व्यक्तित्व बीपी कोइरालासँग आफ्नो सम्बन्ध ईश्वर र भक्तको जस्तो रहेको बताए । उनले बीपी कोइरालालाई नेपालको राजनीतिका विराट व्यक्तित्वका रूपमा स्मरण गरे ।
श्याम बहादुर कार्की स्मृति प्रतिष्ठानका अध्यक्ष बिष्णुराज कार्कीको सभापतित्वमा सम्पन्न कार्यक्रममा नेपाली कांग्रेसका केन्द्रीय सदस्य तथा प्रतिनिधिसभा सदस्य मदन कृष्ण श्रेष्ठ, कांग्रेस भक्तपुरका जिल्ला सभापति दुर्लभ थापा, कांग्रेस नेता कविर राणा लगायतले स्वर्गीय श्यामबहादुर कार्कीले सामाजिक क्षेत्रमा पुर्याएको योगदानको चर्चा गरेका थिए । सुर्यविनायक नगरपालिका–२ का वडाअध्यक्ष प्रदिप कार्कीले सञ्चालन गरेको कार्यक्रममा बागमती प्रदेशका उद्योग, पर्यटन, श्रम तथा यातायात मन्त्री शुरेस श्रेष्ठ, लगायतका राजनीतिककर्मीको सहभागिता रहेको थियो ।
सोही अवसरमा प्रतिष्ठानले भक्तपुर रेडक्रससंगको सहकार्यमा आयोजित रक्तदान कार्यक्रममा ५८ जनाले रक्तदान गरेका थिए । प्रतिष्ठानका अध्यक्ष बिष्णुराज कार्कीका अनुसार, समृति दिवसकै अवसरमा स्थानीय गंगेश आधारभुत विद्यालयका सबै बिद्यार्थीलाई स्कूल व्याग, स्टेसनरी र खेलकुद सामाग्री प्रदान गरिएको थियो । प्रतिष्ठानले वर्षेनी यस किसिमको कार्यक्रम गर्दै आएको अध्यक्ष कार्कीले बताए ।