सूर्यविनायक नगरपालिका वडा नं. ८ सिपाडोललाई बालमैत्री स्थानीय शासनयुक्त घोषणा : बालमैत्री स्थानीय शासनयुक्त वडा घोषणाले एउटा इँटा थपिएको छ : नगर प्रमुख वासुदेव थापा

भक्तपुर, १६ असार । सूर्यविनायक नगरपालिकालाई बालमैत्री स्थानीय शासनयुक्त घोषणा अभियान अन्तर्गत आज सूर्यविनायक नगरपालिका वडा नं. ८ सिपाडोललाई बालमैत्री स्थानीय शासनयुक्त घोषणा गरिएको छ ।

आज सूर्यविनायक नगरपालिकाका प्रमुख वासुदेव थापाले सूर्यविनायक नगरपालिका वडा नं. ८ डोलेश्वर मन्दिर प्राङ्गनमा आयोजित कार्यक्रममा कार्यक्रमको उद्घाटन गर्दै बालमैत्री स्थानीय शासनयुक्त वडा घोषणा गरि प्रमाणपत्र प्रदान गर्नुभएको हो ।

नगर प्रमुख वासुदेव थापाले   वडा नं. १ देखि वडा नं. ८ सम्मलाई बालमैत्री स्थानीय शासनयुक्त वडा घोषणा गर्ने क्रममा मंगलबार वडा नं. ८ सिपाडोललाई बालमैत्री स्थानीय शासनयुक्त वडा घोषणा गर्दै  बालमैत्री व्यबहार सम्बृद्ध नगरपालिकाको आधार भन्ने नारालाई सफल बनाएको बताउनु भयो ।

उहाँले भन्नुभयो, “हाम्रो भविश्य बालबालिका हुन्, उनीहरुको भविश्व बनाउन सके देशको भविश्य बन्छ, देशभरका ७५३ पालिका मध्ये सूर्यविनायक नगरपालिका बालमैत्री स्थानीय शासनयुक्त पालिका घोषणामा अगाडि रहेको छ । हामीले अन्तर्राष्ट्रिय मापदण्डलाई पुरा गर्दै नेपाल सरकारको निर्ण अनुसार सरकारले निर्धारण गरेको ५१ वटा सूचक र स्थानीय तहको १ गरि ५२ वटा सूचक पुरा गरेर घोषणा गरेका हौं ।”

उहाँले तीन वर्ष अगाडि नै नगरपालिकाले सूर्यविनायकलाई बालमैत्री स्थानीय शासनयुक्त नगरपालिका घोषणा गर्ने निर्णय गर्दै निर्देशिका र कार्यबिधि बनाएर तीन वर्षको अथक प्रयासले सबै वडामा बाल समिति गठन गर्दै सबै प्रक्रिया पुरा गरेको बताउनुभयो ।

सूर्यविनायकको सबै वडामा बालमैत्री स्थानीय शासनयुक्त वडा घोषणाले एउटा इँटा थपिएको बताउदै उहाँले यसलाई दिगोपनाका लागि नगरपालिकाले थप जिम्मेवारी निर्वाह गर्ने र यसका लागि सबै नागरिक समाजको सहयोग हुने विश्वास रहेको उहाँले बताउनुभयो ।

नगर प्रमुख वासुदेव थापाले भन्नुभयो, “नौ वर्ष मेरो नेतृत्वमा नगरपालिकाको विकासमा समय व्यतित भयो, अब ११ महिना मेरो कार्यकाल बाँकी छ, त्यो कार्यकालमा बालमैत्री स्थानीय शासनयुक्त पालिका घोषणालाई दिगोपना दिन लाग्नेछौं, हामी भन्दा माथि उठेर कुनै काम गर्दैनौ, संविधान भित्र रहेर नगरपालिकाको विकास र नगरवासीका समृद्धका लागि काम गर्नेछौं ।”

सम्पूर्ण रुपमा बाल अधिकारको संरक्षण गर्दै बालमैत्री शासन सूर्यविनायकमा व्यबहारिक रुपमा लागू भएको भन्दै उहाँले जेष्ठ नागरिक मैत्री नगरपालिका समेत व्यबहारिक रुपमा लागू भएको बताउनुभयो ।

उहाँले भन्नुभयो, “सूर्यविनायक अब बालमैत्री मात्रै नभई जेष्ठ नागरिक मैत्री नगरपालिका पनि हो, यस नगरपालिकामा कोही पनि जेष्ठ नागरिकलाई परिवारबाट अपहेलना भएमा त्यस्ता परिवारलाई नगरपालिकाबाट दिने सेवा रोक्ने र कानूनी कारबाहीलाई अगाडि बढाउने नीति लिएका छौ, यस नगरपालिकामा कोही पनि जेष्ठ नागरिक अधिकारबाट बञ्चित हुनु पर्दैन ।”

नगरपालिकाका उपप्रमुख सरिता तिम्सिना भट्टराईले बालमैत्री स्थानीय शासनयुक्त वडा घोषणा सम्पन्न भएसंगै यसलाई दिगोपनाका लागि नगरपालिकाले आगामी आथिएक वर्षका लागि पनि बजेटको ब्यबस्था गरेको बताउनुभयो ।

उहाँले बालमैत्री स्थानीय शासनयुक्त वडा घोषणा कुनै सहज नभएको बताउँदै यसमा धेरैको सहयोग र अथक प्रयासले सफल भएको बताउनुभयो ।

उहाँले भन्नुभयो, “मानवीय विकासको सुरुवात बालबालिकाको जन्मदेखि नै हुन्छ, उनीहरुको अधिकार सुरक्षित गर्नु घर, परिवार र सरकारको जिम्मवारी हो, सरकारका जिम्मेवारी हामी पुरा गरिरहेका छौं ।”

बालमैत्री स्थानीय शासनयुक्त वडा घोषणा गरेसंगै यसलाई दिगोपना दिने जिम्मेवारी सबैको काँधमा आएको बताउदै उहाँले यसका लागि सबैले साझ प्रतिबद्धता गरेर जिम्मेवारी निर्वाह गर्नु पर्ने बताउनुभयो ।

सरकारले तयार पारेको बालमैत्री स्थानीय शासन कार्यान्वयन निर्देशिका, २०७८ ले तय गरेको ५१ सूचक पुरा गरेसंगै नगरपालिकाले यहाँका प्रत्येक वडालाई बालमैत्री स्थानीय शासनयुक्त वडा घोषणा अभियान सञ्चालन गरिरहेको नगर प्रमुख थापाले बताउनुभयो ।

नगरपालिकाका प्रमुख प्रशासकीय अधिकृत युवराज आचार्यले बालमैत्री स्थानीय शासनयुक्त वडा तथा पालिका घोषणा गर्ने नगर प्रमुखको सपना साकार भएको र नगरपालिकाको घोषणाको तयारीमा पुगेको बताउनु भयो । उहाँले एउटा हिन्दी फिल्मको उदाहरण दिदै बालबालिकाको अधिकार घरबाटै सुनिश्चित हुनु पर्ने औल्याउनु भयो ।

आचार्यले भन्नुभयो, “औलामा गन्न सकिने स्थानीय तह मात्रै बालमैत्री स्थानीय शासनयुक्त घोषणा भएको छ । हाम्रो नगरपालिकाले घोषणाको चरण पार गरेको छ । मेयसको सपना साकार भएको छ, बालबालिकाको भविश्य र जिम्मेवारीलाई उहाँले महत्व दिनुभयो र यो अभियान सञ्चालन भयो । यो अभियान यही सकिएको छैन, यसको दिगोपन भयो कि भएन, घरघरमा बालअधिकारको सुनिश्चितता छ कि छैन, हामी दिगोपनाको लाग अनुगमनदेखि कार्यक्रमलाई निरन्तरता दिन्छौं ।”

नगरपालिकाका प्रवक्ता एवं सामाजिक विकास समितिका संयोजक रविन्द्र सापकोटाले नगर प्रमुख वासुदेव थापाको २०७४ बाट सुरु भएको पहिलो कार्यकाल भौतिक पूर्वाधार निर्माण तथा विकासमा लगाएको र दोश्रो कार्यकाल त्यसका साथै मानवीय विकासमा सक्रिय भएर लागेको बताउनुभयो ।  मानवीय विकासको नमूनाको रुपमा बालमैत्री, महिलामैत्री, जेष्ठ नागरिक मैत्री नगरपालिका र सेवा प्रवाह अगाडि बढिरहेको बताउदै उहाँले तीन वर्ष भित्र नगरपालिकालाई बालमैत्री स्थानीइ शासन युक्त घोषणा अभियान अन्नतः सफल भएको बताउनुभयो ।

उहाँले भन्नुभयो, “भोलीको भविश्यको रुपमा रहेको बालबालिकालाई सक्षम राष्ट्रप्रेमी नागरिक बनाउन बालबालिका माथि सरकारको पनि लगानी लगाउनु पर्छ भनेर तीन वर्षदेखि कार्य योजना बनाएर वडा वडामा बिज्ञ समूहबाट प्रत्येक घरघरमा अनुगमन गरि ५२ वटा सूचक पुरा गरि जिल्ला समन्वय समितिले समेत प्रक्रिया पुरा गरि अनुमति प्राप्त गरेपछि मात्रै घोषणा अभियान सुरु गरेका हौं ।”

दिगो विकास, व्यबस्थित सहरको नाराका साथ अगाडि बढेको नगरपालिकाले दिगो विकासमा महत्वपूर्ण काम गरेको चर्चा गर्दै उहाँले बाल बचाउँका १४ वटा सेक्टर पार गर्दै अभियान सञ्चालन गरेको बताउनुभयो ।  उहाँले बालमैत्री स्थानीय शासनयुक्त वडा घोषणामा चिया पसलमा बसेर नकारात्मक टिप्पणी गर्ने र सामाजिक सञ्जालबाट भ्रम छर्न खोज्नेले नगरपालिका भित्र रहेका ३५ हजार बालबालिकाको बचाउ र अधिकारमाथि अपमान गरेको बताउनुभयो ।

कार्यक्रममा जिल्ला समन्वय समितिका कार्यबाहक सभापति सुजाता बाडे बैधले बालमैत्री स्थानीय शासनयुक्त घोषणा गरेर नगरपालिकाले बालअधिकारको सुनिश्चित गरेको बताउनुभयो ।  कार्यक्रममा कार्यपालिका सदस्य सावित्रा मिश्रले बालमैत्री स्थानीय शासनयुक्त वडा घोषणाका क्रममा पार गरेका बिभिन्न चरणहरुको प्रस्तुती दिनु भएको थियो ।

कार्यक्रमका सभापति एवं वडा अध्यक्ष पुष्पराज बस्नेतले बालमैत्री स्थानीय शासनयुक्त वडा घोषणाले बालबालिकाको भविश्य र बाल अधिकार सुनिश्चित भएको बताउदै यसलाई दिगोपनाको लागि नगरपालिकासंगै सबै जुट्नु पर्ने औल्याउनुभयो ।

घोषणालाई दिगोपना दिन नगरपालिकामा बाल अधिकार संरषण गर्ने, बालबालिकालाई बस्न लायक र बाल मत्री बनाउनका लागि सबैबाट आएको एक्यबद्धता सकारात्मक भएको भन्दै यसको दिगोपनाका लागि सबैले हस्ताक्षर र प्रतिबद्धता जनाउनु पर्ने बताउनुभयो ।

वडा अध्यक्ष बस्नेतले भन्नुभयो, “आजका बालबालिका हाम्रो भविश्य हो, नगरपालिकाको भविश्य हो, यो देशको भविश्य हो, नगरपालिकाको लगानी १०० वर्षसम्म पनि देखिने गरि गरेका छौं ।” कार्यक्रममा बालमैत्री स्थानीय शासनयुक्त वडा घोषणामा सहयोग पुर्याउने बिभिन्न संघ संस्थाहरुलाई सम्मान गर्नुका साथै बालबालिकाहरुले बिभिन्न साँस्कृतिक प्रस्तुतीहरु राखेका थिए ।

गुण्डुमा सम्पन्न सार्वजनिक सुनुवाईमा स्थानीयवासीले खोजे चुनाबमा मात्रै मुख देखिएको संघीय सांसद खोई…………….

भक्तपुर, २१ जेठ । सूर्यविनायक नगरपालिका वडा नं. ७ गुण्डुस्थित वडा कार्यालयको सभा हल । बिहिबार सूर्यविनायक नगरपालिकाको सहयोग एवं समन्वयमा क्रियासिल पत्रकार मञ्च भक्तपुरले वडा कार्यालयको हलमा आयोजना गरेको “सार्वजनिक सुनुवाई कार्यक्रम” मा भेला भएका स्थानीयले खोजी गर्दै सोधे ‘हाम्रो क्षेत्रको संघीय सांसद खोई’……..।

आज वडा कार्यालयको हलमा ‘जनप्रतिनिधिसँग वडावासीको आवाज’ भन्ने नाराका साथ आयोजना भएको सार्वजनिक सुनुवाई कार्यक्रममा स्थानीयवासी रामकृष्ण श्रेष्ठले वडाको विकास र समृद्धिमा तीनवटै तहको सरकारको समन्यव आवश्यकता रहे पनि संघीय सांसदले निर्वाचित भए पश्चात अनुहार नै नदेखाएको गुनासो गर्नुभयो ।

‘२०७४ अघिका जनप्रतिनिधि र पछिका विकास जनताले हेरेका छन् तर जनताको विकासप्रतिको तिव्र चाहना पुरा हुन सकेन,’ उहाँले भन्नुभयो, ‘भक्तपुर क्षेत्र नं. २ बाट निर्वाचित प्रतिनिधिसभाका सांसद राजिव खत्री कता हुनुहुन्छ ? सार्वजनिक कार्यक्रममा ल्याएर जनताको माझमा उभ्याउनु पर्यो, जसले गर्दा हाम्रो आवाज संघीय सरकारमा पुगोस्, जनताको मतलाई तिरस्कार गर्ने छुट उहाँलाई छैन ।’

कार्यक्रममा स्थानीय राधाकृष्ण नगरकोटीले नयाँ वर्ष मनाईने जात्रा र गणेश चतुर्थीमा मनाईने सिन्दुर जात्राका लागि बजेट व्यबस्थापन गर्नुपर्ने, गणेश पार्टी निर्माण गर्नुपर्ने, व्यायाम शाला र पार्क निर्माण गर्नुपर्ने माग राख्नु भयो ।

स्थानिय दिपेश कार्कीले मन्थलीबाट वडा कार्यालय आउने सडक सञ्जाल जोडनु पर्ने, जिप लाइन मुनीको जग्गा प्लानिङ्ग राक्नु पर्ने, जेष्ठ नागरिक भ्रमण रोकेर बजेट विकासमा लगाउनु पर्ने, प्राणी उद्यान क्षेत्रमा चलचित्र छायांकन रोक्नु पर्ने बताउनुभयो ।

तिथली गणेश भैरब समितिका अध्यक्ष सानुकाजी नगरकोटीले सडक निर्माणले ऐतिहासिक इनार पुरियो, चन्द्रसूर्य आधारभूत विद्यालय बेवास्ता गरेको गुनासो गर्नुभयो ।
स्थानीय मनोज केसीले सार्वजनिक जग्गा संरक्षणमा के गरिरहेको छ भन्दै निर्माण सुरु गरेको दुईवटै पौडी पोखी अलपत्र परेको, भिम प्राबि वरिपरि सार्वजनिक जग्गा अतिक्रमण भएको गुनासो गर्नुभयो ।

भूक्षय नियन्त्रणका लागि वडाले के गर्दैछ भन्दै कृष्णमुरारी वाग्लेले योगमय बनाउन वडा कार्यालयले व्यबस्थापन गर्नुपर्ने बताउनुभयो । स्थानीय शिव नगरकोटीले दधिकोट वडा नं. ४ र गुण्डु वडा नं. ७ जोड्ने बुढी गण्डकी खोलाको पुल निर्माण सम्पन्न गरेकोमा धन्यवाद भन्दै खोलामा किरियापुत्री भवन वा पार्टी निर्माण गर्न माग गर्नुभयो ।

स्थानीय रमेश नगरकोटीले सडकम घर बनाउने निर्माण सामग्री थपार्नेलाई कारबाही गर्नु पर्न माग गर्नुभयो भने रविन्द्र नगरकोटीले नयाँ बस्तीले सडकको मापदण्ड मिचेर संरचना बनाएकाले तत्काल रोक्न माग गर्नुभयो । स्थानीय रामकृष्ण श्रेष्ठले गुण्डुको गौ संरक्षण केन्द्र र २ करोड १३ लाख बजेट आइसकेको पाथीभरा माताको मन्दिरको जिम्मा स्थानीय सरकारले लिनुपर्ने धारणा राख्नु भयो ।

स्थानीय रिषभ खत्रीले सामुदायिक भवनमा स्थापना गरेको गुण्डु खानपानी कार्यालयले कोठा भाडामा लाउने कार्य रोक्नु पर्ने औल्याउनुभयो ।
कार्यक्रममा वडा नं. ७ का वडा अध्यक्ष रबिन्द्र सापकोटाले जेनजी आन्दोलनपछि वडाको प्रशासनिक तथा अन्य सेवा प्रभावहरुमा प्रत्यक्ष प्रभाव परेको उल्लेख गर्नुभयो ।
समस्या भएपनि छिटो र छरितो सेवा प्रभावहरुमा वडाले विशेष रणनीति बनाई १५ देखी ३० मिनेट भित्रमा सहज रुपमा सेवा प्रदान गरिरहेको बताउनुभयो ।

मूल्यवृद्धिका कारण भौतिक पूर्वाधारको कार्यहरुमा समस्या उत्पन्न भइरहेको उल्लेख गर्दै उहाँले भन्नुभयो, ‘जनताको अपेक्षा धेरै छन् तर हामीसँग स्रोत सिमित छ । त्यस्तैले अब नयाँ योजना शुरु गर्नेभन्दा पनि पुराना बाँकी रहेका योजनालाई आफ्नै कार्यकालमा सम्पन्न गर्ने तयारीका साथ लागिरहेका छौं । जसको लागि संघीय सरकारको बजेटले यसवर्ष वडालाई छोएको छैन । अब प्रदेशको बजेट कस्तो आउँछ ? त्यहि अनुसार योजना बैंक तयार गरेर नगरबाट बजेट व्यवस्थापन गरी कार्य सम्पादन गर्नेछौं ।’

केन्द्रीय सरकारले तीन करोड भन्दा तलका बहुवर्षीय आयोजनाका बजेट काट्दा गुण्डुका ६ वटा ठूला आयोजनाहरु अलपत्र परेको भन्दै उहाँले सिंहदरबारसंगको पहुँच टाढिदै गएको बताउनुभयो ।

शिक्षा, स्वास्थ्य, खानेपानी, पूर्वाधार तथा लक्षित कार्य गर्ने उल्लेख गर्दै उहाँले बालमैत्री वडा घोषणा गर्न ८० प्रतिशत कार्यहरु सम्पन्न भइसकेको जानकारी गराउनुभयो । आवेग नभई विवेक प्रयोग गरी सहज र सुलभ सेवा प्रभावहरु नै अहिले प्राथमिकता रहेको बताउनुभयो ।

धार्मिक, कला, संस्कृति तथा व्यायम केन्द्रहरु आवश्यकता अनुसार थप गर्दै लैजाने प्रतिवद्धता जनाउँदै उहाँले इतिहास मेटेर विकास नगरिने प्रतिवद्धता जनाउनुभयो । त्यस्तै उहाँले वडामा एक वटा पनि प्लानिङका स्वीकृति प्रदान नगरिएको भन्दै स्थानीयले जग्गा बिक्री गर्ने अनि किन्नेहरुले घर बनाउन खोज्दा बिरोध गर्ने कार्य गर्न नहुने बताउनुभयो । स्मार्ट सिटीका कारण आठ आनाभन्दा कम कित्ता काट नहुने भएपछि चार जनाले एक रोपनी जग्गा किन्ने र अदालतको आदेशबाट त्युलाई टुक्रा पारेर घर बनाउने कार्यलाई वडाले चाहेर पनि रोक्न नसक्ने बताउनुभयो ।

उहाँले भन्नुभयो, ‘वडाको सार्वजनिक जग्गा संरक्षण हुन्छ, भइरहेको छ । सार्वजनिक जग्गा संरक्षण गर्न नगरपालिकाकै सवैभन्दा उत्कृष्ट वडा नं. ७ हो । जीपलाईन मुनिको प्लानिङ गरेको होइन । जग्गा नापेर मात्र प्रकृया अगाडी बढाउन भनेर काम रोकेका छौं । स्वीमिङ पुल संघीय सरकारको पर्यटन मन्त्रालय अन्तरगतको बजेटबाट बनेको हो । जहाँ पार्क सहित बन्ने भनेर बहुआयामिक तरिकाले पर्यटन प्रवद्र्धन गर्ने योजना थियो । संघले बजेट नपठाउँदा अलपत्र पर्यो, वडाले सिमाङ्कन मात्र गरेको हो । अहिले संघीय सरकारको प्राथमिकतामा नपरेर अवमूल्यन भएको हो । बजेट आउँदा समन्वय, पहल र पहुँचका आधारमा हुने भएकाले राजनीतिक अस्थिरतका कारण विकासमा प्रत्यक्ष रुपमा असर परेको छ ।’

प्राणी उद्यानभित्र चलचित्र सुटिङ गर्न दिने वा नदिने भन्ने वडाको क्षेत्राधिकार नभई संघीय सरकारको भएको उल्लेख गर्दै उहाँले योग प्रवद्र्धनको लागि नगरपालिकाले नीतिगत व्यवस्था गर्ने बताउनुभयो ।

सडकमा गिटी तथा बालुवा लगायतका सामाग्रीहरु राख्न नपाउने स्पष्ट पार्दै उहाँले सो कार्य गरे कारवाही गर्नु चेतावनी दिनुभयो । घर निर्माण गर्दा सडकलाई असर पुर्याउनु नहुनेमा सचेत हुन आग्रह गर्दै उहाँले मापदण्ड पालना गर्नुपर्नेमा जोड दिनुभयो ।

धार्मिक पर्यटन प्रवद्र्धन गर्न योजनावद्ध लाग्नुपर्नेमा जोड दिँदै उहाँले सामुदायीक भवनमा खानेपानीमा काम गर्ने मजदुरलाई निर्माणको क्रममा एक महिना बस्न दिएको बताउनुभयो । घ्याम्पेडाँडाको विद्यालय विद्यार्थी नभएका कारण मर्ज गरिएको उल्लेख गर्नुभयो । कार्यक्रममा चालु आर्थिक वर्षभित्रमा गरेका पूर्वाधारको विकास, प्रशासनीक सेवा प्रवाह, सामाजिक कार्यलगायतका विषयहरुलाई समेटेर जनताका गुनासा, प्रश्न र सुझावहरुलाई संकलन गरिएको छ ।

कार्यक्रममा वडाका सचिव सूर्यवहादुर माकजुले वडाले आर्थिक वर्षमा गरिएका प्रशासनीक तथा सेवा प्रवाहरुको बारेमा विस्तृतमा उल्लेख गर्नुभयो ।
वडामा चालु आवमा नगरसभाबाट ५४ वटा योजनाहरु स्वीकृत भएको जानकारी गराउँदै उहाँले हालसम्म ५० वटा योजना सम्झौता भइ निर्माण कार्य भइरहेको, १४ वटा सम्पन्न, ३४ वटा चालु रहेको र दुई वटा सम्झौता भई कार्यशुभारम्भ नभएको जानकारी गराउनुभयो । त्यस्तै चार वटा योजना कोटेशनको माध्यमबाट सञ्चालन भइरहेको बताउनुभयो ।

वडामा विभिन्न प्रकारका लक्षित कार्यक्रमहरु आयोजना गरिएको जानकारी गराउँदै उहाँले भन्नुभयो, ‘वडाले जेष्ठ नागरिक, अपाङ्गता, महिला, दलित, बालवालिका लक्षित कार्यक्रमहरु सञ्चालन गरेको छ ।

त्यस्तै बालबालिकाको लागि पञ्चवर्षिय लगानी योजना तयार गरेको छ । सडकमुक्त बालबालिका, बालबालिकालाई मदिरा तथा सूर्तिजन्य सामग्री विक्रि वितरणमा रोक, बालमैत्री वडा घोषणाका लागि सचेतनामूलक कार्य, वडा बाल सञ्जाललाई ट्र्याकसुट वितरण, तेस्रो वडा स्तरीय बाल हाजिरी जवाफ प्रतियोगिता, ४४ जना कृषकलाई इलेक्ट्रिक स्प्रेयर पम्प, एसइइ उर्तीण विद्यार्थीलाई सम्मान लगायतका कार्यहरु गरेका छौं ।’

उहाँका अनुसार वडामा नगरसभाबाट कार्यक्रम तथा योजनाको लागि रु दुई करोड, ६० लाख तथा विभिन्न मितिमा नगर कार्यपालिकाबाट स्वीकृत रु चार करोड ७३ लाख रकम विनियोजन भएको छ । त्यस्तै वडामा कृषकसँगको लागत साझेदारीमा फुलको विरुवा वितरण, ५० प्रतिशत अनुदानमा प्लाष्टिक टनेल वितरण लगायतका सामाजिक कार्यहरु भएका छन् ।

कार्यक्रममा गुण्डू प्रहरी प्रभागका प्रमुख इन्द्र प्रसाद बोयजुले सडक दुर्घटना रोक्न मापसे चेकिङ गर्नु प्रहरीको जिम्मेवारी रहेको बताउदै अपराधन नियन्त्रण र जनताको सेवामा समर्पित रहेको भनाई राख्नु भयो । ट्राफिक चेकिङ आवश्यकता अनुसार हुने उल्लेख गर्दै उहाँले लिखानारायण क्षेत्रमा विदाको समयमा हुने पिकनिकमा लुटपाट हुने भएकाले विशेष फोकस गरी शान्ति सुरक्षाका कार्यहरुमा ध्यान दिइएको बताउनुभयो ।

मञ्चका अध्यक्ष रमेश गिरीको अध्यक्षतामा भएको कार्यक्रममा कोषाध्यक्ष पुस्करराज बुढाथोकीले कार्यक्रम सञ्चालन गर्नुभएको थियो । कार्यक्रममा कार्यपालिका सदस्य उमेश कार्की, समुन परियार, वडासदस्य गिता बस्नेत, सन्तोसी नेपाली, विभिन्न दलका प्रतिनिधि, विभिन्न विद्यालय तथा सामाजिक क्षेत्रका प्रतिनिधिहरुको सहभागिता रहेको थियो ।