भक्तपुरका दुई निर्वाचन क्षेत्रमा उम्मेदवारी दर्ता सम्पन्न, क्षेत्र नं. १ मा २५ जना र क्षेत्र नं. २ मा ३२ जनाको जम्मेदवारी दर्ता
भक्तपुर, ६ माघ ः आगामी फागुन २१ गते हुने प्रतिनिधि सभाको निर्वाचनका लागि भक्तपुर क्षेत्र नं. १ बाट नेपाल मजदुर किसान पार्टीका केन्द्रीय सचिव प्रेम सुवाल र क्षेत्र नं. २ बाट नेकपा (एमाले)का केन्द्रीय सचिव महेश बस्नेतले उम्मेदवारी दर्ता गराउनु भएको छ ।
क्षेत्र नं. १ का सुवाल र क्षेत्र न. २ का बस्नेत फरक पार्टीका केन्द्रीय सचिव हुन् भने दुबै जना यसअघि प्रतिनिधि सभा सदस्यमा निर्वाचित भइसकेका परिचित अनुहार हन् । दुबै क्षेत्रमा अन्य बिभिन्न राजनीतिक दल र स्वतन्त्र उम्मेदवार दिने उम्मेदवारहरु भने अधिकांश नयाँ अनुहार रहेका छन् ।
निर्वाचन क्षेत्र नं. १ बाट बिभिन्न राजनीतिक दल र स्वतन्त्र गरि २५ जनाले उम्मेदवारी दर्ता गराउनु भएको छ भने क्षेत्र नं. २ बाट राजनीतिक दल र स्वतन्त्र उम्मेदवार गरि ३२ जनाले उम्मेदवारी दर्ता गराउनु भएको मुख्य निर्वाचन अधिकृतको कार्यालयले जानकारी दिएको छ ।
भक्तपुर क्षेत्र न. १ बाट प्रतिनिधिसभा निर्वाचन–२०८२ का लागि नेपाल कम्युनिष्ट पार्टी एमालेबाट सोम मिश्र, नेपाली काँग्रेसबाट किरण न्यौपाने, नेपाल मजदुर किसान पार्टीबाट प्रेम सुवाल, राष्ट्रिय स्वतन्त्र पार्टीबाट रुकेश रञ्जित, नेपाली कम्युनिष्ट पार्टीबाट हरिराम लवजु, राष्ट्रिय प्रजातन्त्र पार्टीबाट भरतबहादुर खड्काले उम्मेदवारी  दर्ता गराउनु भएको छ ।
त्यसैगरि उज्यालो पार्टी नेपाल पार्टीबाट रमेश बल्ल, आम जनता पाटीबाट  देवेन्द्र ठाकुर, राष्ट्रिय जनमोर्चा पार्टीबाट ईश्वरीप्रसाद पैयानी, जनता समाजवादी पार्टी (जसपा) नेपालबाट श्यामसुन्दर शिल्पकार, नेकपा (माओवादी) पार्टीबाट चन्द्रमान कोजु, मितेरी पाटी नेपालबाट सावित्री न्यौपाने, नेपालका लागि नेपाली पाटीबाट दिपक पोखरेलले उम्मेदवारी दिनु भएको छ ।
त्यस्तै स्वतन्त्र उम्मेदवारी दिनेहरुमा सुजिता बुढाथोकी, विष्णुराम दुमरु, राजेश्वरी प्रजापति, सुदिप न्यौपाने, पुण्यराम सुवाल, राजु श्रेष्ठ, दशरथ थापा, सुरेश कोजु, बालकृष्ण खाइतुले उम्मेदवारी दिनु भएको छ ।
त्यसैगरि क्षेत्र नं. २ मा नेकपा एमालेका केन्द्रीय सचिव महेश बस्नेतले उम्मेदवारी दर्ता गराउनु भएको छ भने नेपाली काँग्रेसबाट कबिर राणाले उम्मेदवारी दर्ता गराउनु भएको छ ।
त्यसैगरि नेपाली कम्युनिष्ट पार्टी रामप्रसाद सापकोटा, उज्यालो नेपाल पार्टीबाट जितराम लामा, राष्ट्रिय स्वतन्त्र पार्टीबाट राजिव खत्री, नेपाल मजदुर किसान पार्टीबाट रमेश वैद्य, राष्ट्रिय प्रजातन्त्र पार्टीबाट विक्रम थापा, श्रम संकृति पार्टी अर्जुन बासु, त्रीमुल नेपालबाट राकेश श्रेष्ठ, नेपाल जनसेवा पार्टी जानुका पाठक, प्रगतिशील लोकतान्त्रिक पार्टीबाट जन्मदेव जैसी, नेपाल कम्युनिस्ट पाटी संयुक्त लोककृष्ण दाहाल, जनता समाजवादी पार्टी नेपालबाट नवीन श्रेष्ठ, नेकपा माओवादी प्रकाशराज ढुङ्गेल, मंगोल नेशनल अर्गनाइजेसनबाट पेम्वा घले, नेपालका लागि नेपाली पार्टीबाट राजेश बाडेले उम्मेदवारी दर्ता गराउनु भएको छ ।
त्यसैगरि स्वतन्त्रबाट आनन्द कार्की, मधु प्रकाश साहुखल, श्यामकृष्ण धुख्वा, लक्ष्मि बास्तोला पौडेल, बालकृष्ण थापा, ओमकृष्ण कुटु, नवीनकुमार महत, साजन ढकाल, सुवर्ण थापा, रेणु श्रेष्ठ, अर्चना भट्टराई, अनिता भट्टराई, सविन महत, प्रदिपकुमार रूपाखेतीले उम्मेदवारी दर्ता गर्नु भएको छ ।
स्थापनाको १२१ वर्षपछि नयाँ भवन पाउँदै भक्तपुर अस्पताल, ६२ करोडको लागतमा नयाँ भवन निर्माण
भक्तपुर, २ माघ । नेपालकै दोश्रो अर्थात बीर अस्पताल पछि स्थापना भएको भक्तपुर अस्पतालले स्थापनाको १२१ वर्षपछि ६२ करोडको लागतमा सुबिधा सम्पन्न नयाँ भवन पाउने भएको छ ।
विगत तीन वर्षदेखि देशभरका सात प्रदेशका अस्पताल मध्ये उत्कृष्ट अस्पताल घोषित हुदै आएको भक्तपुर अस्पतालले अब नयाँ सुविधा सम्पन्न अस्पताल भवन पाउने सुनिश्चित भएको वागमति प्रदेशका स्वास्थ्य मन्त्री किरण थापाले जानकारी दिनुभयो ।
भक्तपुर अस्पताल यहाँको नागरिकको मात्रै नभई भक्तपुरदेखि काठमाडौं, ललितपुरका बिरामीहरूलाई पनि ठूलो राहत मिल्ने गरेको बताउदै उहाँले काभ्रेपलाञ्चोकदेखि पूर्वका धेरै जिल्लाबाट आउने विरामीको उपचारको प्रस्थान बिन्दुका रुपमा भक्तपुर अस्पताल रहेको बताउनुभयो ।
स्वास्थ्य मन्त्री थापाले भन्नुभयो, “वाग्मती प्रदेश सरकारले उच्च प्राथमिकतामा राख्दै करिब ६२ करोड रुपैयाँको लागतमा नयाँ भवन निर्माण गर्ने निश्चित गरेको छ । भक्तपुर अस्पताललाई वाग्मती प्रदेशकै नमुना अस्पताल बनाउने उदेश्यले हामीले निकै मिहेनतका साथ बजेट सुनिश्चित गरेर बिस्तृत परियोजना प्रतिवेदन (डिपिआर) समेत पारित गरेका छौँ, अब जतिसक्दो छिटो नयाँ भवन निर्माण सम्पन्न गरि अस्पतालको क्षमतामा गुणात्मक र मात्रात्मक रुपमा सेवा बिस्तार गर्ने गरि तयारी गरेका छौं ।”
उहाँले अस्पतालको नयाँ भवन वातावरण मैत्री, प्रविधि मैत्री, भूकम्प प्रतिरोधी डिजाइनमा अन्तर्राष्ट्रिय मापदण्डअनुसार भक्तपुरको पुरानो एवं परम्परागत शैलीमा भवन निर्माण गरिने छ । विरामी र सेवाग्राहीलाई सहज हुने गरी अस्पतालको नयाँ भवनमा प्रतीक्षालय, अपाङ्ग मैत्री संरचना, लिफ्ट, पार्किङ तथा हरित क्षेत्रको समेत व्यवस्था गरिने भएको जानकारी दिदै उहाँले भवन निर्माणसंगै अस्पतालमा मुटु तथा न्यूरो सम्बन्धी विशेषज्ञ सेवासमेत विस्तार गरिने मन्त्री थापाले बताउनुभयो ।
प्रदेशका संस्कृति तथा पर्यटन मन्त्री सुरेश श्रेष्ठले वाग्मती प्रदेश मध्ये भक्तपर अस्पतालले गुणस्तरीय सेवा प्रदान गर्दै आएको र देशभरका विरामीको उपचारका लागि उचित गन्तव्यको रुपमा नमूना अस्पताल निर्माण गर्न वागमती प्रदेश सरकारले अस्पतालको नयाँ भवन निर्माण गर्ने निर्णय गरेको उहाँले बताउनुभयो । उहाँले स्वास्थ्य क्षेत्रमा गरिने पूर्वाधार लगानीले समाज र अर्थतन्त्रमा दीर्घकालीन सकारात्मक प्रभाव पार्ने विश्वास व्यक्त गर्दै उहाँले निर्माण प्रक्रियामा पारदर्शिता, गुणस्तर र जवाफदेहितामा कुनै सम्झौता नहुने बताउनुभयो ।
वाग्मती प्रदेश स्वास्थ्य मन्त्रालयका सचिव डा. सुमित्रा गौतमले भक्तपुर नयाँ निर्माण हुने भक्तपुर अस्पतालको भवनमा अत्याधुनिक एवं आकस्मिक कक्ष, आइसियु कक्ष, एनआइसियु, प्रसूति तथा स्त्री रोग विभाग, सर्जरी ब्लक, आधुनिक प्रयोगशाला, डिजिटल एक्स–रे, सिटी स्क्यान, एमआरआई, मुटु तथा न्यूरो सेवा समेत विस्तार गर्नेगरि प्रविधियुक्त सेवा विस्तार गरिने बताउनुभयो ।
स्वास्थ्य सचिव डा. सुमित्रा गौतमले भन्नुभयो, “अस्पतालको डिपिआर अनुसार निर्माण कार्य चरणबद्ध रूपमा अघि बढाइनेछ, निर्भारित  समय भित्रै भवन निर्माण सम्पन्न गर्ने लक्ष्य राखिएको छ । स्थानीय जनप्रतिनिधि, अस्पताल व्यवस्थापन समिति र स्वास्थ्यकर्मीहरूले यस योजनालाई ऐतिहासिक उपलब्धिका रूपमा लिँदै नयाँ भवन निर्माणपछि भक्तपुर अस्पताल प्रदेशकै प्रमुख रेफरल अस्पतालको रूपमा स्थापित हुने लिएका छाँ ।”
यसबारेमा भक्तपुर अस्पतालमा प्रदेशका स्वास्थ्य मन्त्री किरण थापा, संस्कृति तथा पर्यटन मन्त्री सुरेश श्रेष्ठ, स्वास्थ्य सचिव डा. सुमित्रा गौतमलगायतको टोलीसहितले नयाँ भवनको विस्तृत परियोजना प्रतिवेदन (डिपिआर) मा रहेको भवनको वास्तुकलात्मक डिजाइन, सेवा विस्तारको खाका, लागत व्यवस्थापन, निर्माण प्रक्रिया र समयसीमालगायतकाबारे छलफल गरेको अस्पतालका कार्यकारी निर्देशक डा. सुरेन्द्र भट्टले जानकारी दिनुभयो ।  उहाँले नयाँ जमिन नभएपछि अस्पतालको हाल प्रशासन र अन्तरंग सेवा सञ्चालन भइरहेको पुरानो भवन र भवनसंगैको जग्गामा नयाँ भवन निर्माण हुने तया भएको जानकारी दिनुभयो ।
भक्तपुर अस्पताल विकास समितिका अध्यक्ष ज्ञानराम श्रेष्ठले भक्तपुर अस्पताल यहाँ आउने विरामीको आशा र भरोसाको केन्द्र भएकाले यहाँबाट जाने कुनै पनि विरामीले उपचार पाएर खुसी भएर फकर्किन वातावरण बनाउनु पर्ने बताउनुभयो ।
भक्तपुर उद्योग वाणिज्य संघका महासचिवबाहेक सबै पद सर्वसम्मत चयन, महासचिवमा प्रजापति र रंजितको भिडन्त
भक्तपुर, २६ पुस : भक्तपुर उद्योग वाणिज्य संघको ३८ औँ वार्षिक साधारण सभा तथा अधिवेशनमा राष्ट्रिय स्वतन्त्र पार्टी (रास्वपा) का नेता सर्वसम्मतको बाधक बनेका छन् ।
भक्तपुर उद्योग वाणिज्य संघको अध्यक्षमा वरिष्ट उपाध्यक्ष कृष्ण मुरारी न्यौपानेले सर्वसम्मत निर्वाचित भएका छन् ।
संघले वरिष्ट उपाध्यक्षलाई स्वतः अध्यक्ष बनाउने परम्परा कायम गर्दै आए अनुरुप न्यौपानेलाई सर्वसम्मत अध्यक्ष चयन गरेको हो ।  वरिष्ठ उपाध्यक्षमा राजेन्द्रप्रसाद प्रजापति, उपाध्यक्ष एसोसिएटतर्फ गणेशहरि प्रजापति, उपाध्यक्ष साधारणतर्फ दिनेश गोसाई र सचिवमा गौतम सुजखू सर्वसम्मत निर्वाचित हुने भएका छन् ।
उपाध्यक्ष वस्तुगततर्फ महेन्द्र खायमली र विश्वराम दुवाल, महासचिवमा वर्तमान महासचिव नविन प्रजापति र रुकेश रञ्जित तथा कोषाध्यक्षमा राजेश त्वानाबासु र रञ्जित मारिखूले उम्मेदवारी दिएको सर्वसम्मतका लागि अथक प्रयास गरेपछि शुक्रबार राती ११ बजे उपाध्यक्ष र कोषाध्यक्षमा समेत सर्वसम्मत गरिएको छ ।
शुक्रबार राती ११ बजे सबै पदमा सर्वसम्मत गर्नका लागि उपाध्यक्ष वस्तुगततर्फ महेन्द्र खायमलीले उम्मेदवारी फिर्ता लिएको र कोषाध्यक्षमा राजेश त्वानाबासुले उम्मेदवारी फिर्ता लिएको संघका सल्लाहकारले जानकारी दिएका छन् ।
सल्लाहकारका अनुसार महासचिवमा नविन प्रजापतिलाई सर्वसम्मत निर्वाचन गराउने शर्तमा उपाध्यक्ष पदका दबेदार खायमली र कोषाध्यक्ष पदका उम्मेदवार त्वायनावासुले उम्मेदवारी फिर्ता लिएपनि रास्वपाका नेता समेत रहेका महासचिव पदका प्रत्यासी रुकेश रञ्जितले भने उम्मेदवारी फिर्ता नलिएपछि महासभविमा मात्रै निर्वाचन गर्नु पर्ने अबस्था आएको जानकारी दिएका छन् ।
सल्लाहकारका अनुसार बस्तुगत उपाध्यक्षमा विश्वराम दुवाल, कोषाध्यक्षमा रञ्जित मारिखु र सदस्यमा एक जनाले फिर्ता लिएपछ सब पद सर्वसम्मत भएको तर महासचिवमा भने वर्तमान महासचिव नविन प्रजापति र रुकेश रञ्जितबीच प्रतिस्पर्धा हुने भएको हो ।
आगामी फागुन २१ गते हुने प्रतिनिधि सभा निर्वाचनमा भक्तपुर क्षेत्र नं १ मा रास्वपाका प्रतक्ष्यतर्फका उम्मेदवार समेत रहेका रुकेश रञ्जितले भने महासचिवमा फिर्ता नलिदाँ सर्वसम्मतमा बाक बनेको सल्लाहकार टिमले जानकारी दिएका छन् ।
श्रोतका अनुसार रुकेश रञ्जितले उम्मेदवारी फिर्ता लिएर सर्वसम्मत बनाउने तयारी गर्दा रास्वपाका जिल्ला तथा केन्द्रीय समितिका नेताहरुले ठूलो दबाब दिएर कुनै हालतमा उम्मेदवारी फिर्ता नलिन र निर्वाचनमा जान दबाब दिएपछि रास्वपाका दबाबकै कारण उम्मेदवारी फिर्ता लिन नसकेको श्रोतको दाबी छ ।
संघका एक सल्लाहकारले व्यवसायीहरुको छाता संगठन भएको संघमा रास्वपले राजनीतिक हस्तक्षेप गर्न खोजेको भन्दै राजनीतिक हस्तक्षेप कुनै हालतमा मान्य नहुने बताए । संघमा रास्वपाको हस्तक्षेपका कारण बन्दाबन्दैको सर्वसम्मत भाडिएर महासचिव पदमा मात्रै मतदान गर्नु पर्ने अबस्था आए त्यसको जवाफ संघका सदस्यहरुले मतदानबाट दिने बताएका छन् ।
महासचिव पदका उम्मेदवार को हुन नविन प्रजापति :
संघका वर्तमान् महासचिव नविन प्रजापति भक्तपुर जन्मे हुर्किएका स्थानीइ सफल एवं एक जिम्मेवार व्यवसायी हन् । स्थानीय बजारको अवस्था, व्यवसाय गर्दा आउने उतार–चढाव र दैनिक संघर्ष उनले आफ्नो नजिकबाट बुझेका छन् ।
इमानदारी, निरन्तर परिश्रम र व्यवहारिक सोचका कारण उहाँले व्यापारिक क्षेत्रमा विश्वास र सम्मान कमाएका प्रजापति हरेक दिन व्यवसायीको हितका लागि काम गर्दै आएका र जिल्लाका कुनै पनि व्यवसायीलाइ कुनै पनि समस्या पदाए अग्रमोर्चामा उभिएर व्यवसायीको पक्षमा समस्या समाधान गर्न उभिने निडर व्यक्ति पनि हुन् ।
साना तथा मझौला व्यवसायीका वास्तविक समस्या पहिचान गर्ने र व्यवहारिक समाधान खोज्ने उनको क्षमता नै उनको बलियो पक्ष हो । व्यवसायसँगै उनले विगत २० वर्षभन्दा बढी समयदेखि समाजसेवामा निरन्तर सक्रिय रहँदै आएका छन् । शिक्षा, युवा सशक्तिकरण र सामाजिक उत्तरदायित्वका क्षेत्रमा उनको योगदान देखावटीभन्दा पनि परिणाममुखी र प्रभावकारी बन्दै आएको छ ।  खेलकुदमार्फत युवामा अनुशासन, सहकार्य र सकारात्मक सोच विकास गर्न सधैं अग्रसर रहने उनी सबल युवा बिना दिगो व्यवसाय एवं सबल समाज सम्भव नहुने बताउछन् ।
भक्तपुर उद्योग वाणिज्य संघको महासचिव पदमा आफ्ना उम्मेदवारी कुनै व्यक्तिगत स्वार्थका लागि होइन, भक्तपुरका व्यवसायीका समस्या सुन्न, बुझ्न, समाधान गर्न र सधै व्यवसायीको हक र हितका लागि लाग्न रहेको छ ।  व्यवसायीक संघर्षबाट माथि उठेर परिणाम दिन सक्ने नेतृत्वको रुपमा चिनिदै आएका  नविन प्रजापति व्यवसायका वास्तविक समस्या बुझ्ने, नीतिगत कमजोरी पहिचान गर्ने र समाधान कार्यान्वयन गर्ने क्षमता भएको व्क्तित्व हुन् ।
कागजी भाषण होइन, व्यवहारिक निर्णय र ठोस काम उनको पहिचान भएको व्यवसायीहरु नै बताउँछन् । २० वर्षदेखिको निस्वार्थ समाजसेवा समाजका हरेक वर्गसँग प्रत्यक्ष जोडिएको अनुभवले उनलाई उत्तरदायी, पारदर्शी र सक्षम बनाएको छ । नेतृत्व अनुशासन, टिमवर्क र एकताको अभ्यास आजको उद्योग–व्यापार नेतृत्वका लागि अत्यावश्यक छ—जुन गुण नविन प्रजापतिमा स्पष्ट देखिने व्यवसायीहरु बताउँछन् ।
इडेन वार्षिक खेलकुद उत्सव २०८२” भव्य रूपमा सम्पन्न

भक्तपुर, :  सूर्यविनायक नगरपालिका–३, बालकोटमा अवस्थित इडेन गार्डेन इङ्लिस स्कुलमा यस वर्षको “इडेन वार्षिक खेलकुद उत्सव २०८२” भव्य रूपमा सम्पन्न भएको छ।

पौष २० गते सुरु भएको उक्त खेलकुद उत्सव चार दिनसम्म सञ्चालन भई पौष २३ गते औपचारिक रूपमा समापन गरिएको हो। विद्यालयका सह-प्रिन्सिपल अनिश राईका अनुसार खेलकुद उत्सव विद्यालयको वार्षिक कार्यक्रम अन्तर्गतको एक महत्वपूर्ण कार्यक्रम हो। विभिन्न तहका विद्यार्थीहरूको शारीरिक, मानसिक तथा सामाजिक विकासलाई लक्षित गरी उक्त उत्सव चार दिनसम्म सञ्चालन गरिएको उहाँले बताउनुभयो।

“स्वास्थ्यका लागि खेलकुद, राष्ट्रका लागि खेलकुद” भन्ने नारालाई आत्मसात गर्दै विद्यालयले हरेक वर्ष विद्यार्थीहरूमा खेलकुदप्रतिको रुचि बढाउने र उनीहरूभित्र रहेका प्रतिभाहरू उजागर गर्ने उद्देश्यले यस्ता कार्यक्रम निरन्तर आयोजना गर्दै आएको विद्यालयको अतिरिक्त क्रियाकलाप तथा खेलकुद संयोजक सुविन्द्र राईले जानकारी दिनुभयो।

चार दिनसम्म सञ्चालन भएको खेलकुद उत्सवमा प्रि–नर्सरीदेखि कक्षा १० सम्मका सबै विद्यार्थीहरुलाई समेट्ने कोसिस गर्दै विद्यालयले विभिन्न खेलहरु खेलाएका थिए । उत्सव अन्तर्गत व्यक्तिगत तथा अन्तर–सदन प्रतियोगिताहरू सञ्चालन गरिएका थिए। प्रतियोगितामा “रेड हाउस” ले सबैभन्दा धेरै स्वर्ण, रजत तथा कास्य पदक जित्दै वर्षको “उत्कृष्ट सदन” घोषित भएको थियो ।

समापन समारोह तथा मेडल वितरण कार्यक्रममा बोल्दै सह-प्रिन्सिपल राईले यस्ता कार्यक्रमहरूले विद्यार्थीहरूको अन्तरनिहित प्रतिभा प्रष्फुटन हुनुका साथै खेलकुदप्रतिको रुचि र अनुशासन विकासमा महत्वपूर्ण भूमिका खेल्ने बताउनुभयो। सो अवसरमा उहाँले विजेता विद्यार्थीहरूलाई मेडल वितरण गर्दै बधाई व्यक्त गर्नुभएको थियो। खेलकुद उत्सवलाई सफल बनाउन सहयोग पुर्याउने सम्पूर्ण शिक्षक, कर्मचारी, अभिभावक तथा सक्रिय सहभागिता जनाउने विद्यार्थीहरूलाई विद्यालय परिवारले धन्यवाद ज्ञापन गरेको छ।

भक्तपुर उद्योग वाणिज्य संघको अध्यक्षमा न्यौपानेसहित केही पद सर्वसम्मत
भक्तपुर, २५ पुस : भक्तपुर उद्योग वाणिज्य संघको अध्यक्षमा वरिष्ट उपाध्यक्ष कृष्ण मुरारी न्यौपानेले सर्वसम्मत निर्वाचित हनु भएको छ ।  संघको ३८ औँ वार्षिक साधारण सभा तथा अधिवेशनको आज उद्घाटन  बन्द सत्र तथा २६ गते हुने नर्वाचन कार्यतालिका अनुसार केही पदमा सर्वसम्मत भएको र केही पदमा निर्वाचन हुने भएको हो ।
संघले वरिष्ट उपाध्यक्षलाई स्वतः अध्यक्ष बनाउने परम्परा कायम गर्दै आए अनुरुप न्यौपानेलाई सर्वसम्मत अध्यक्ष चयन गरेको महासचिव नविन प्रजापतिले जानकारी दिनुभयो ।
त्यसैगरि वरिष्ठ उपाध्यक्षमा राजेन्द्रप्रसाद प्रजापति, उपाध्यक्ष एसोसिएटतर्फ गणेशहरि प्रजापति, उपाध्यक्ष साधारणतर्फ दिनेश गोसाई र सचिवमा गौतम सुजखू सर्वसम्मत निर्वाचित हुने भएको उहाँले जानकारी दिनुभयो ।
आज साँझसम्म सबै पदमा सर्वसम्मत गर्ने प्रयास जारी रहेको बताउदै महाचसवि प्रजापतिले सबै दिमा आज साँझसम्म सर्वसम्मतको प्रयास भइरहेको उहाँले जानकारी दिनुभयो ।
उपाध्यक्ष वस्तुगततर्फ महेन्द्र खायमली र विश्वराम दुवाल, महासचिवमा वर्तमान महासचिव नविन प्रजापति र रुकेश रञ्जित तथा कोषाध्यक्षमा राजेश त्वानाबासु र रञ्जित मारिखूले उम्मेदवारी दिएपछि निर्वाचन हुने भएको छ । सदस्यहरु ११ जना निर्वाचित हुनुपर्नेमा १२ जनाको उम्मेदवारी परेकाले सवैसम्मतको प्रयास भइरहेको उहाँले जानकारी दिनुभयो ।
महासचिव प्रजातिका अनुसार सबै पदमा सर्वसम्मतको प्रयास भइरहेको उहाँले जानकारी दिनुभयो । सर्वसम्मत नभएका केही पदमा मात्रै निर्वाचन हुने र २६ गते बिहान मतदान हुने नानकारी दिनुभयो ।
भक्तपुर उद्योग वाणिज्य संघको ३८ औँ वार्षिक साधारण सभा तथा अधिवेशनको उद्घाटन
भक्तपुर, २५ पुस : नेपाल उद्योग वाणिज्य महासंघका अध्यक्ष चन्द्रप्रसाद ढकालले निजी लगानीमा सञ्चालनमा रहेका औद्योगिक क्षेत्रलाई शान्ति क्षेत्र घोषणा गर्ने सरकारले तयारी गरेको बताउनु भएको छ । आज भक्तपुर उद्योग वाणिज्य संघको ३८ औँ वार्षिक साधारण सभा तथा अधिवेशनको उद्घाटनमा बोल्दै उहाँले महासंघको मागलाई सरकारले सकारात्मक रुपमा लिएर घोषणाको तयारी गरेको बताउनु भएको हो ।
महासंघ ढकालले भन्नुभयो, “स्कुललाई जस्तै निजी लगानीका औद्योगिक क्षेत्रलाई पनि शान्ति क्षेत्र घोषणा गनै सरकारसंग माग गरका थियौ, मन्त्री परिषद्ले यसलाई पारित गरेको जानकारी पाएका छौँ, सरकराले अब छिट्टै शान्ति क्षेत्र घोषणा गरेपछि निजी क्षेत्रमा कुनै प्रकारको बन्द, अडताल, तोडफोड, आगजनी निषेध हुन्छ ।”
अध्यक्ष ढकालले गत भदौ २३–२४ का प्रदर्शनका क्रममा उद्योग र निजी सम्पत्तिमा आक्रमण गर्नेहरू माथि कानूनी कारबाही गर्नुपर्नेमा उहाँले माग गर्नुभयो ।  उहाँले निजी क्षेत्रको मनोबल खस्किएको र लगानी मैत्री वातावरणका छैन भन्ने भाष्यलाई चिर्दै महासंघको पहलमा निजी क्षेत्रका व्यवसायीहरु जुटर १० अर्ब रुपैयाँ पूँजीको नेपाल डेभलपमेन्ट कम्पनी स्थापनाको कार्य भएको बताउनुभयो ।
कम्पनीले ठूला पूर्वाधार परियोजनामा निजी क्षेत्रको सहभागिता र उत्पादनमूलक क्षेत्रमा लगानी तथा रोजगारी सिर्जना गर्ने लक्ष्य राखेको बताउदै उच्चस्तरीय आर्थिक सुधार आयोग गठन एवं लगानीमैत्री वातावरणको लागि विभिन्न कानून संशोधनमा महासंघले महत्वपूर्ण योगदान दिएको बताउनुभयो ।  महासंघ अध्यक्ष ढकालले निजी लगानी गरिरहेका व्यवसायी एवं महासंघलाई सरकारले प्रतिपक्षको रुपमा व्यबहार गर्न नहुने बताउदै राज्यको आर्थिक सम्बृद्धिको मेरुदण्डको रुपमा रहेकाले राज्यले समाज व्यबहार गर्नु पर्ने औल्यानुभयो ।
भक्तपुरलाई ऐतिहासिक, सांस्कृतिक, पर्यटकीय र परम्परागत उद्योग तथा साना–मझौला व्यवसायको केन्द्रका रूपमा चिनाउँदै अध्यक्ष ढकालले स्थानीय वाणिज्य संघहरूको भूमिका महत्वपूर्ण रहेको बताउनुभयो ।  कार्यक्रममा संघका भक्तपुर अध्यक्ष रोशनीमैया धौबञ्जा, महासचिव नविन प्रजापतिलगायतले भक्तपुरलाई पर्यटन र हस्तकला उद्योगबाट समुन्नत बनाउन लागिरहेको बताउनुभयो ।
पत्रकार पेशल आचार्यसहित तीन पत्रकारलाई सम्मान
भक्तपुर, २३ पुस । पत्रकार पेशल आचार्यसहित तीन पत्रकारलाई नेपाल पत्रकार महासंघ भक्तपुर शाखाले आज सम्मान गरेको छ । नेपाल पत्रकार महासंघ जिल्ला शाखा भक्तपुरको २९ औं स्थापना दिवसको अवसरमा लामो समयदेखि पत्रकारिता क्षेत्रमा पुर्याएका योगदानको कदर गर्दै राष्ट्रिय सञ्चार केन्द्रका अध्यक्ष एवं नेपाल अर्थडटकमका कार्यकारी अध्यक्ष समेत रहेका पत्रकार पेशल आर्चालाई १५ हजार रूपैयाँ राशिको स्व.भगवान दास राजकुमार महर्जन स्मृति पत्रकारिता पुरस्कारद्वारा सम्मान गरेको हो ।

कार्यक्रममा स्व.मैंयादेवी शिल्पकार स्मृति पत्रकारिता परस्कारबाट कान्तिपुर टेलिभिजनका फोटो पत्रकार विनोद कोजु र हेरिटेज नेपाल न्यूजकी लीला श्रेष्ठलाई
जनही २ हजार ५ सय रूपैयाँ नगद सहित सम्मान गरेको हो । सूचना तथा सञ्चार प्रविधि मन्त्री जगदिश खरेलले दोसल्ला, सम्मान पत्र र नगद पुरस्कारसहित सम्मान गर्नु भएको हो ।

कार्यक्रममा सञ्चार तथा सूचना प्रबिधि मन्त्री जगदीश खरेलले आगामी फागुन २१ गते हुने आफ्नो उम्मेदवारी दिने या नदिनेबारे कुनै निर्णय नलिएको बताउनु भएको छ । मिडियामा आएका आफ्ना समाचारकाबारे स्पष्ट पार्दै मन्त्री खरेलले भन्नुभयो, “म चुनाबमा उठ्ने रे भन्ने कराहरु पनि आयो, फलानो पार्टीबाट उठ्ने कि, यो पार्टीबाट उठन् रे, यो क्षेत्रबाट उठ्ने रे, त्यो क्षेत्रबाट उठ्ने रे भन्ने पनि आयो, सञ्चार माध्यममा तर म यो स्पष्ट पार्न चाहन्छु कि मैले अहिलेसम्म चुनाबमा उठ्ने या नउठ्ने भन्ने केही पनि निर्णय गरेको छैन, आजको दिनसम्म कुनै पनि पार्टीमामा प्रवेश गरेको छैन, पार्टीमा गएको छैन, वार्ता गरेको छैन, छलफल गरेको छैन, आउँछु भनको छैन, जान्छु भनेको छैन, मैले केही भनेको छैन ।”
प्रधानमन्त्री शुसिला कार्कीको नेतृत्वका सकरारको ध्यान सफल रुपमा चुनाब गराउनु नै रहेको बताउदै उहाँले आफ्नो ध्यान चुनाबमा केन्द्रीत भएपनि फरक ढंगले समाचार आउनुलाई कसरी विश्वास गर्ने भन्दै प्रश्न गर्नुभयो ।  पत्रकारिताले विश्वसनीयता, सन्तुलन र सत्यतथ्यलाई  कायम राख्नुपर्नेमा जोड दिदै उहाँले फागनु २१ मा निर्वाचन हुदैछ, उक्त निर्वाचन निष्पक्ष, स्वतन्त्र, धाधली रहित ढंगबाछ सम्पन्न हुने बताउनु भयो ।  निर्वाचनमा सही, सत्यपरक र सन्तुलित सूचना एवं समाचार विश्वसनीय ढंगले सम्प्रेषण गर्न आग्रह उहाँले आग्रह गर्नुभयो ।
मन्त्री खरेलले चुनाब नजिकिदै गर्दा मतदाता शिक्षालाई प्रभावकारी पार्ने, चुनाबलाई निष्पक्ष, धाँधली, स्वतन्त्र बनाउने, सही उम्मेदवार छान्ने, सही ठाउँ सही तरिकाले भोट रद्ध नहुने गरि मतदान गर्ने र राम्रो नेतृत्व चयन गर्ने सन्दर्भमा सञ्चारमाध्यमको भूमिका महत्वपूर्ण हुने औल्याउनुभयो ।  आमनागरिकले सञ्चार माध्यमबाट कुन पार्टी ठिक, कुन नेता ठिक, कुन चुनाब चिन्ह ठिक, कसरी मत हाल्ने, कसरी सही तरिकाले मत हाल्दा बदर हुदैन, मतदान केन्द्रमा सेवा सुबिधा के छ, सबैजना मतदानमा जानु पर्छ भन्ने कुरा जानकारी दिन लाग्नु पर्नेमा जोड दिनुभयो ।
मन्त्री खरेलले भन्नुभयो, “देश किन बन्न सकेन, कसका कारण बन्न सकेन, कति वटा व्यबस्था परिविर्तन भए, पञ्चायत आयो, प्रजातन्त्र आयो, लोकतन्त्र आयो, गणतन्त्र आयो, सबै व्यबस्था परिवर्तन भए, कयौ व्यक्तिहरु शासन व्यबस्थामा आए, सरकार चलाए, प्रधानमन्त्री चलाए, मन्त्रीहरु बने तर देश किन बनेने ?, जनताको अबस्था किन सुध्रने त ? किन जेन्जी जनआन्दोलन हुनु पर्यो, दर्जनौले बलदानी दिनु पर्यो भन्नेबारेमा समाचार माध्यमले समाचार ल्याउनु पर्छ ।”
मलुकले परिवर्तन खोजेको छ, परिवर्तनका लागि अब फेरी मुलकमा रगत बग्न हुदैन, जेन्जी दाजूभाई दिदी बहिनीहरु मर्ने दिन फेरी आउनु हुदैन, फेरी बलिदानी दिनु पर्ने अबस्था आउनु हुदैन भन्दै उहाँले त्यस्तो दन आउन नदिन एउटा ठूलो अवसर आएको र आउँदो चुनाबबाट राम्रो व्यक्ति, राम्रो पार्टी, राम्रो नेतालाई नेतृत्वमा ल्याएर परिवर्तन गर्नु पर्ने बताउनुभयो ।
उहाँले नेपालमा मिडिया धेरै भएकाले व्यवसायीकरण तर्फ जान नसकेको बताउदै भन्नुभयो, “ हाम्रो देशमा करिब १३ हजार पत्रकार छन्, १३ हजार वटा नै सञ्चार माध्यम छ, त्यो भन्दा बढी होला, कसरी धान्या होला, कसलाई पत्याउन हो, कसलाई मान्ने हो, हाम्रा देशमा १३ हजार मिडिया आवश्यक हो कि होइन, धान्न सकिन्छ कि सकिदैन, यी सञ्चार माध्यम कसरी सर्भाइव गर्ने बडो जोखिमपूर्ण अबस्था छ, यसलाई सम्बद्ध निकायले गहन तबरले बुझ्नु पर्छ ।”  मिडियाले मिस इन्फरमेशन, डिस इन्फरमेशन र फेक न्यूजको शिकार धेरै नै भइरहेको छ भन्ने आमनागरिकको भनाई रहेको बताउदै उहाँल यसलाई कसरी निरुत्साहित गर्ने र कसरी पत्रकारितामा व्यवसायीकता ल्याउने भन्नेबारेमा सोच्नु आवश्यक रहेको बताउनुभयो ।
वागमती प्रदेशका संस्कृति तथा पर्यटन मन्त्री सुरेश श्रेष्ठले पत्रकारिता क्षेत्रका सबै समस्या अहिलेको सरकारले समाधान गर्नु पर्नेमा जोड दिदै लाईक र भ्युअर्स आउने आशामा जथाभावी समाचार सम्पूेषण नगर्न आग्रह गर्नुभयो ।
मन्त्री श्रेष्ठले भन्नुभयो, “प्रदेश सरकार प्रति अनेकौ किसिमका भ्रमहरु फैलाउने, प्रदेश सरकारले गर्दा देशलाई ठूलो धनराशी घाटा भयो, मन्त्री, सांसदले धेरै सेवा सुबिधा लिए भनेर पनि आको छ, अनेकौ घाटा भयो भन्ने कराहरु आएका छन्, प्रदेशका माननीय र प्रदेशका सरकारले सबै सेवा सुबिधा आए भन्ने कुरा आएको छ । प्रदेश सरकारको विषयमा पनि पत्रकारले सत्य तथ्य लेखेर प्रदेश सरकार चाहिने हो कि हाइन, अहिलेको संरचनामा  आवश्यक छ कि छैन भनेर लेखिदिन आग्रह गर्नुभयो ।‘
कार्यक्रममा राष्ट्रिय समाचार समितिका अध्यक्ष धर्मेन्द्र झाले प्रेसस्वतन्त्र र अभिव्यक्ति स्वतन्त्रतालाई फरक ढंगले बुझिदिनु पर्ने बताउनुभयो । उहाँले समाचार गहन विषय भएकाले सत्य, तथ्यमा आधारित भएर नै जानु पर्नेमा जोड दिनुभयो ।
कार्यक्रममा नेपाल पत्रकार महासंघ केन्द्रीय उपाध्यक्ष उम्मिद वागचन, भक्तपुरका प्रमुख जिल्ला अधिकारी उमेशकुमार ढकाल, मध्यपुरथिमि नगरपालिकाका प्रमुख सुरेन्द्र श्रेष्ठ, नेपाल पत्रकार महासंघ उपत्यका प्रदेश अध्यक्ष टेनिश रेक्का, महासंघका काठमाडौं अध्यक्ष शोभा अर्याल, ललितपुर अध्यक्ष रामहरि कार्की, पत्रकार कबिर राणा, शाखाको पूर्वअध्यक्ष नारायणसुन्दर किलम्बु, सम्मानित पत्रकार पेशल आचार्य, कार्यक्रमका सभापति एवं शाखा अध्यक्ष सुन्दर शिल्पकार, महासंघ भक्तपुर शाखा उपाध्यक्ष नविना खर्बुजा, उपाध्यक्ष हेमराज ढकाललगायतले पत्रकारको हकहितमा सरकार लाग्नु पर्नेमा जोड दिनुभयो ।
भक्तपुर काँग्रेस फागुन २१ को निर्वाचनमा होमियो, निर्वाचन पछि नियमित महाधिवेशनको तयारीमा जट्छौं
भक्तपुर, २१ पुस । नेपाली कांग्रेस भक्तपुर जिल्ला नियमित महाधिवेशनको प्रतिक्षा गर्दै आगामी फागुन २१ हुने प्रतिनिधिसभाको निर्वाचनको तयारीमा होमिएको बताएको छ । आज नेपाली काँग्रेस भक्तपर जिल्ला समितिले पार्टी कार्यालयमा आयोजना गरेको पत्रकार सम्मेलनमा भक्तपुर काँग्रेस विशेष महाधिवेशनको पक्षमा नरहेको र निर्वाचनको तयारीमा होमिएको बताएको हो ।
पत्रकार सम्मेलनमा नेपाली काँग्रेस भक्तपुर जिल्ला सभापति एवं निवर्तमान् सांसद दूर्लभ थापाले जिल्लाका ७० प्रतिशत महाधिवेशन प्रतिनिधि तथा महासमिति सदस्यहरूले पार्टीलाई विधि, विधान र निर्धारित कार्यतालिका अनुसार अघि बढाउन नियमित महाधिवेशन नै उपयुक्त हुने बताएको भन्दैं पार्टीभित्रको एकता, अनुशासन र संगठन सुदृढीकरणका लागि पनि समयमै नियमित महाधिवेशन आवश्यक रहेको बताउनुभयो ।
भक्तपुरका ७० प्रतिशत महाधिवेशन प्रतिनिधि एवं महासमिति सदस्यहरुले हस्ताक्षर बुझाउँदै विशेष महाधिवेशनको पक्षमा नरहेको र नियमित महाधिवेशाको माग गरेको उहाँले बताउनुभयो । उहाँले भन्नुभयो, ‘नेपाली काँग्रेस भक्तपुर जिल्ला पार्टीको बिधि र बिधानअनुसार चल्न एक ढिक्का भएको छ । पार्टीको निर्णयानुसार हामी नियमित महाधिवेशनको पक्षमा छौं, जिल्लाका ७५ प्रतिशत महाधिवेशन प्रतिनिधि एवं महासमिति सदस्यहरुले नियमित महाधिवेशन गर्न माग गरेका छन्, त्यसैले हामी यतिखेर आगामी फागुन २१ को निर्वाचन सफल बनाउन निर्वाचनको तयारीमा होमिएका छौँ ।’
पत्रकार सम्मेलनमामा उहाँले ७० प्रतिशत भन्दा बढी महाधिवेशन प्रतिनिधि र महासमिति सदस्यहरुले नियमित महाधिवेशनको पक्षमा हस्ताक्षर गरेको बताउदै फागुन २१ गतेको निर्वाचनको लागि समानुपातिकको उम्मेदवारी दर्ता भइसकेको र प्रत्यक्षतर्फको उम्मेदवार चयनको प्रक्रिया शुरु भइसकेको अवस्थामा विशेष महाधिवेशनको औचित्य सकिएको बताउनुभयो । पार्टीको केन्द्रीय कार्यसम्पादन समिति बैठकको निर्णायानुसार बैशाखमा तोकिएको नियमित महाधिवेशनको पक्षमा रहेको बताउदै सभापति थापाले भक्तपुरमा क्रियासिल सदस्यता ८२ प्रतिशतले नविकरण गरेको र थप २५ प्रतिशत नयाँ क्रियासिल सदस्यता वितरण गरेको बताउनुभयो ।
भक्तपुरका क्षेत्र नम्वर १ मा सर्वसम्मत तरिकाले प्रत्यक्ष तर्फको उम्मेदवार चयन गरेको र २ नम्वर क्षेत्रमा सहमतिको प्रयास भइरहेको बताउदै उहाँले समानुपातिकवाट भक्तपुरवाट विनोद कायस्थ, गणेशमान चक्रधर, र गगांलक्ष्मी अवाल चयन भएको बताउनुभयो। पार्टीको केन्द्रीय महाधिवेशन बैशाख २७ देखि २९ सम्म ताकिएकाले नेपाली कांग्रेस भक्तपुर सोहि अनुसार अघि बढ्ने बताउदै उहाँले देश नै गम्भिर मोडमा उभिएको बेला नेपाली कांग्रेस एक ढिक्का भएर पार्टीको नियमित महाधिवेशन गरी वडा तहदेखी केन्द्रीय नेतृत्व गर्नु आजको आवश्यकता भएको सभापति थापाले बताउनुभयो ।
उहाँले भन्नुभयो, ‘जिल्ला जिल्लामा क्रियाशिल सदस्यता टुङ्याउन अझै बाँकी रहेको अबस्था र देश निर्वाचनमय भएको अबस्थामा हामीले विशेष महाधिवेशन भनेर बस्ने यो समय होइन । पहिला निर्वाचन सफल पाराँै, त्यसपछि केन्द्रीय समितिको निर्णयानुसार महाधिवेशनमा पार्टी जानेनै छ । भक्तपुर काँग्रेस एक ढिक्का भएर निर्वाचनमा होमियौं ।’
आगामी निर्वाचनमा काँग्रेस भक्तपुरको सबै क्षेमा जित सुनिश्चित गर्ने गरि तयारीमा जुटिसकेको बताउदै उहाँले केही नयाँ भन्नेहरुले सामाजिक सञ्जालमा काँग्रेस कमजोर भयो, केही बोल्दैन भन्ने भ्रम फैलाएको टिप्पणी गर्दै उहाँले भक्तपुरमा काँग्रेस बलियो रहेको बताउनुभयो । केही विदेशी शक्तिको आडमा भ्रम फैलाएर केही मच्चिरहेको टिप्पणी गर्दै उहाँले काँग्रेस एमालेको घरघर खोजी खोजी आक्रमण गर्ने, नेताहरु माथि भ्रम फैलाउने र पार्टी भित्रै विवाद ल्याउन खोज्नेहरुलाई काँग्रेसले आफ्नो शक्ति देखाउने बताउनुभयो ।
भक्तपुर काँग्रेस एक्लै चुनाबमा गएर विजयी हुन सक्षम रहेको बताउदै उहाँले पार्टीको केन्द्रीय निर्णयले पार्टीहरु मिलेर चुनामा जाने अबस्था आएपनि काँग्रेस तयार रहेको बताउनुभयो । जिल्ला सभापति थापाले फागुन २१ गते हुने निर्वाचनका लागि समानुपातिकतर्फको उम्मेदवारी दर्ता भइसकेको र प्रत्यक्षतर्फका उम्मेदवार चयन प्रक्रिया सुरु भइसकेको अवस्थामा विशेष महाधिवेशनको कुनै औचित्य नरहेको बताउन भयो ।
कार्यक्रममा जिल्ला समितिको पदाधिकारीहरु, भावी उम्मेदवारको बन्द सूचीमा परेका उम्मेदवारहरु, नगर प्रमुखहरुको समेत सहभागिता रहेको थियो ।
नेकपा एमाले क्षेत्र नं. २ बाट उम्मेदवारमा सचिव महेश बस्नेत सर्वसम्मत, क्षेत्र नं. १ भने बाट ६ जनाको नाम सिफारिस
भक्तपुर, २१ पुस । आगामी फागुन २१ गते हुने प्रतिनिधि सभा निर्वाचनका लागि भक्तपुर क्षेत्र नम्बर २ बाट प्रत्यक्षतर्फका उम्मेदवारमा नेकपा एमालेका सचिव महेश बस्नेत एकल सिफारिसमा पर्नु भएको छ ।
नेकपा एमाले भक्तपुर निर्वाचन क्षेत्र समन्वय कमिटीले पार्टी सचिव महेश बस्नेतको उम्मेदवारका लागि एकल नाम सिफारिस गरेको एमाले भक्तपुर जिल्ला कमिटी अध्यक्ष बचन देउजाले जानकारी दिनुभयो ।
एमालेको तर्फबाट राजेन्द्र राजथला र अनिल श्रेष्ठको समेत उम्मेदवारी दाबी रहेपनि समितिको बैठकले उक्त क्षेत्रबाट राजथला र श्रेष्ठले आफ्‌नो दाबी छाडेर आफूलाई सर्वसम्मत उम्मेदवारी बनाएको सचिव बस्नेतले जानकारी दिनुभयो । सचिव बस्नेतलाई सर्वसम्मत उम्मेदवार सिफासिका लागि एमाले जिल्ला अध्यक्ष देउजाले महत्वपूर्ण भूमिका निर्वाह गर्नु भएको थियो । एमाले नेता राजथलाले भने देश निर्वाचनमय भएकाले जसले टिकट पाएपनि पार्टीलाई विजयी बनाउँन एक ढिक्का भएर लाग्ने बताउनुभयो ।
भक्तपर क्षेत्र नं. १ मा भने प्रतिनिधि सभा निर्वाचनका लागि एमालेबाट ६ जनाको नाम सिफारिस भएको छ । क्षेत्र नं. १ बाट एमालेका पूर्वकेन्द्रीय सदस्य सोमप्रसार मिश्र, सरस्वती वाटी, दिपेश खड्का, राजकुमार लामिछाने ‘चमत्कार’, डा. राजेन्द्र कोजू र रबिन्द्र लाछिमस्यु गरि ६ जनाको नाम सिफारिस गरेको छ ।  क्षेत्र नं. १ बाटै नेता निर्मल भट्टराई र गोविन्द दुलालले पनि उम्मेदवारी दाबी गरेकोमा एमाले भक्तपुर क्षेत्र नं. १ कमिटीले आफ्‌नो क्षेत्र बाहेक अन्य क्षेत्रबाट अएकालाई नस्विकार्ने निर्णय गरेपछि ६ जनाको नाम सिफारिस भएको कमिटीले जानकारी दिएको हो ।
प्रत्यक्षतर्फ यही माघ ६ गते उम्मेदवारी दर्ताको कार्यतालिका तय गरेपछि जिल्ला जिल्लाबाट उम्मेदवारको नाम छनौट गरि सिफारिस गर्ने कार्य तिब्र रुपमा भइरहेको छ ।
राष्ट्रिय एकता तथा मेलमिलाप दिवसका अवसरमा नेपाली काँग्रेस भक्तपुर जिल्ला कार्यसमितिद्धारा “विचार गोष्ठी” को आयोजना
भक्तपुर, १६ पुस । राष्ट्रिय सभाका प्रमुख सचेतक तथा नेपाली काँग्रेसका वरिष्ठ नेता कृष्णप्रसाद सिटौलाले आगामी फागुन २१ गते प्रतिनिधि सभाको निर्वाचन सम्पन्न गर्न कुनै कसर बाँकी राख्नु नहुने बताउनु भएको छ ।
 

आज राष्ट्रिय एकता तथा मेलमिलाप दिवसका अवसरमा आज नेपाली काँग्रेस भक्तपुर जिल्ला कार्यसमितिले जिल्ला पार्टी कार्यालयमा आयोजना गरेको “विचार गोष्ठी” मा बोल्दै उहाँले सरकारले फागुन २१ मै निर्वाचन गर्नु पर्ने बताउनु भएको हो । नेपाली काँग्रेस लगायत दलहरु यतिखेर निर्वाचनको पक्षमा उभिएर चुनाबमा होमिएको बताउदै उहाँले यो उपयुक्त वातावरणलाई सरकारले उपयोग गर्नुपर्नेमा जोड दिनुभयो ।

काँग्रेस नेता सिटौलाले भन्नुभयो, “सरकारले फागुन २१ मा जसरी पनि चुनाब गर्नुपर्छ, काँग्रेस जनादेशको विपक्षमा जादैन, त्यसैले चुनाबमा सहभागि हुन्छ, तर यस्तो अनुकूल वातावरणमा पनि फागुन २१ मा चुनाब हुन सकेन भने देशलाई अनिर्णयको बन्दी बनाएर राख्नु हुदैन, संसद पुर्नस्थापनाको बिकल्प रहदैन, त्यो अबस्थामा संसद पुर्नस्थापना हुनुपर्छ ।”
विपीको मेलमिलापको नीति आज पनि समाजवाद स्थापनाका लागि उत्तिकै सान्दर्भिकता रहेको बताउदै उहाँले विपीकै सिद्धान्त र नीति अनुरुप नै शिक्षा, स्वास्थ्य, विकास गाउँगाउँमा पुगेको बताउनुभयो ।
कार्यक्रममा नेपाली काँग्रेस भक्तपुर जिल्ला सभापित दूर्लभ थापाले नेपाली काँग्रेस चुनावको तयारीमा जुटिसकेको बताउदै काँग्रेस एकढिक्का भएर निर्वाचनमा जानु पर्ने औल्याउनुभयो ।
उहाँले महाधिवेशनको विवादमा अहिले अल्झिनु नहुनेमा जोड दिदै ८० प्रतिशत क्रियासिल सदस्यको विवाद टुङ्गिसकेको अबस्थामा काँग्रेसले विशेष महाधिवेशन वा नियमित महाधिवेशन गर्न तयार रहने बताउनुभयो । उहाँले विपीको मेलमिलाप नीतिलाई आत्मसात गर्दै काँग्रेस अगाडि बढ्नु पर्नेमा जोड दिनुभयो ।
कार्यक्रममा नेपाली काँग्रेसका केन्द्रीय सदस्य मदनकृष्ण श्रेष्ठ,  जिल्ला उपसभापति उर्मिला वन, क्षेत्रीय सभापति भेषबहादुर कार्कीलगायतका नेताहरुले लोकतान्त्रिक मूल्य, मान्यता, राष्ट्रिय एकता, मेलमिलाप र सहकार्यकै मार्गबाट मुलुकलाई समृद्धि र स्थायित्वतर्फ अघि बढाउन नेपाली काँग्रेस सदैव प्रतिबद्ध रहने बताउनुभयो ।