एक वर्षमा करेन्ट लागेर १२ जनाले ज्यान गुमाए

सप्तरी, १९ साउन : लापरवाहीका कारण सप्तरीमा एक वर्षका अवधिमा करेन्ट लागेर १२ जनाले अकालमा ज्यान गुमाएका छन् । आर्थिक वर्ष २०७८÷७९ को तथ्याङ्क हेर्दा करेण्ट लागेर ज्यान गुमाउनेको सङ्ख्या १२ र घाइते हुनेको सङ्ख्या २६ जना पुगेको जिल्ला प्रहरी कार्यालय सप्तरीले जनाएको छ । ती मध्ये चार महिला, छ पुरुष र दुई बालक छन् । करेन्टका ४० घटनामा तीन चौपायाको समेत मृत्यु भएको सो कार्यालयका सूचना अधिकारी प्रहरी नायब उपरीक्षक माधवप्रसाद काफ्लेले जानकारीदिनुभयो ।

उहाँका अनुसार घटनामा १२ महिला, आठ पुरुष र छ बालक घाइते भए । ज्यान गुमाउनुको मुख्य कारण मानवीय लापरवाही र विद्युत् प्राधिकरणको पनि लापरवाही हुने गरेको जिल्ला प्रहरी कार्यालयको निष्कर्ष रहेको छ । बुधबार मात्र जिल्लाको कञ्चनरुपमा बुहारीलाई करेन्ट लागेको देखेर जोगाउन जाँदा ससुरासमेतको मृत्यु भएको छ । कञ्चनरुप नगरपालिका–६ घोघनपुरका नरेश सरदारकी श्रीमती २० वर्षीया अञ्जली सरदारलाई करेन्ट लागेको देखेर जोगाउन गएका उनका काका ससुरा ४० वर्षीय मधु भन्ने सौदानन्द सरदारको समेत मृत्यु भएको सप्तरी प्रहरीले जनाएको छ ।

घरआँगनमा रहेको ट्युबेलमा जडान रहेको पानी तान्ने मोटर चलाउँदा अञ्जलीलाई करेन्ट लागेको थियो । करेन्ट लागेर घाइते दुवै जनालाई उपचारका लागि प्राथमिक स्वास्थ्यचौकी कञ्चनरुप लगिएको थियो । स्वास्थ्यचौकीमा परीक्षण गर्दा चिकित्सकले दुवै जनाको मृत्यु भएको घोषणा गरेका थिए । यसैगरी जिल्लाको राजगढ गाउँपालिका–२ कमलपुर बस्ने दुःखी साहको छोरा ५६ वर्षीय शिवशङ्कर साहको समेत मङ्गलबार करेन्ट लागेर मृत्यु भएको छ । आफ्नै घरको आँगनमा रहेको चापाकलमा जडान गरिएको मोटरमा पानी तान्ने क्रममा करेन्ट लागी मृत्यु भएको प्रहरीले जनाएको छ ।

बढ्दै भक्तपुरमा अपराध, एक वर्षमा ८३२ वटा घट्ना, एक हजार ६ अभियुक्त, ७४५ पक्राउ, २६३ जना फरार

भक्तपुर, १५ साउन : भक्तपुरमा गतवर्षहरुको तुलनामा अपराधको घट्ना बढ्दै गएको छ । आज महानगरीय प्रहरी परिसर भक्तपुरमा आर्थिक वर्ष २०७८/०७९ मा भएका बिभिन्न अपराधका घट्नाबारे जानकारी दिन आयोजना गरेको पत्रकार सम्मेलनमा परिषर प्रमुख एवं प्रहरी उपरीक्षक शिवकुमार श्रेष्ठले यसबारे जानकारी दिदै भक्तपुरमा अपराधको घट्ना बढेको बताउनु भएको हो ।

पत्रकार सम्मेलनमा यसबारे जानकारी दिदै प्रहरी उपरीक्षक श्रेष्ठले भन्नुभयो, “अपराधका घट्नाहरु बढ्दै छ, आर्थिक वर्ष २०७६/०७७ मा ६५२ वटा अपराधका घटना भएको भक्तपुरमा आर्थिक वर्ष २०७७/०७८ मा ५६५ घट्ना थियो, तर आर्थिक वर्ष २०७८/०७९ मा अपराधका घट्ना बढेर असार मसान्सम्म ८३२ वटा पुगेको छ, अपराधसँगै चुनौती थपिएका छन् ।”
प्रहरी परिसर भक्तपुुरले आ.व. २०७८/०७९ मा ६६० वटा अपराधका घट्ना घट्ने अनुमान गरेकोमा अनुमान भन्दा घट्ना बढी भएको उहाँको भनाई थियो ।

भक्तपुरमा बलात्कार, बलात्कार उद्योग, हत्या, चोरी, ठगी, चेक बाउन्स, लागू औषध कारोबार तथा सेवन अध्याधिक बढेको पाईएको छ । यहाँ घटेका अपराध मध्ये १४ दशमलव ६६ प्रतिशत घट्ना महिला तथा बालबालिका सम्बन्धी रहेको उहाँले जानकारी दिनु भयो ।

एक वर्षको अबधिमा भक्तपुरमा बैंकिङ् कसुरमा २४७, चोरीमा ९७, अभद्र व्यबहारमा ७०, झुण्डिएर मृत्युमा ६०, भवितव्य ज्यान, ५२, फुटकर ज्यान ५२, लागू औषधमा ४२, जबरजस्ती करणीमा ४०, सवारी ज्यानमा ३१, ज्यान मार्ने उद्योग १९, विष सेवनमा १७, जुवामा १६, बहुबिवाहमा १२, ठगीमा ११, जबरजस्ती करणी उद्योगमा नौ, कर्तव्य ज्यानमा सात, मानव बेचबिखनमा सात, आत्महत्या दुरुत्साहनमा सात, बाल यौन दुव्र्यबहारमा चार, मुद्रा सम्बन्धी कसुरमा चार, चोरी उद्योगमा तीन मुद्धा दर्ता भएका छन् ।

त्यस्तै सवारी अंगभंगमा तीन, गम्भिर उत्तेजनामा कुटपिट गरेकोमा तीन, बगलीमारामा दुई, हामफाली आत्महत्या गरेकोमा दुई, लिखत सम्बन्धी कसुरमा दुई, पशु सम्बन्धी कसरमा दुई, जेष्ठ नागरिक सम्बन्धी कसुरमा दुई, अपराधिक उपद्रवमा दुई, संक्रमण रोग फैलाउनेमा दुई, बिस्फोटक पदार्थमा एक, चक्कुले घाँटी रेटी मृत्युमा एक, सार्वजनिक स्थलमा यौन कार्य गरेकोमा एक, बैंकिङ तथा बित्तिय कसुरमा एक, अपरहणमा एक, नागरिकता सम्बन्धी कसुरमा एक, गर्भ संरक्षक सम्बन्धी कसुरमा एक, बालबालिका सम्बन्धी कसुरमा एक र जातीय भेदभाव तथा छुवाछुतमा एक गरि कूल ८३२ वटा मुद्धा दर्ता भएको उहाँले जानकारी दिनु भयो ।

यी घट्नामा एक हजार ६ जना अभियुक्त रहेको मध्ये ७४५ जना पक्राउ परे पनि २६३ जना अझै फरार रहेको उहाँको भनाइ छ । पत्रकार सम्मेलनमा परिसरका प्रवक्ता एवं प्रहरी नायब उपरीक्षक राजू पाण्डेले अपराधमा कूल घट्ना र अभियुक्त मध्ये ७४ दशमलव ५ प्रतिशत, बैंकिक कसुरमा २१ दशमलव ५ प्रतिशत र अन्यमा ९१ दशमलव तीन प्रतिशत अभियुक्त पक्राउ परेको जानकारी दिनु भयो ।

कार्यक्रममा प्रहरी उपरीक्षक श्रेष्ठले धेरै घट्नाको कारक लागू औषधनै रहेको बताउदै लागू औषध, जबरजस्ती करणी, चोरी जस्ता घट्ना हरेक वर्ष ११ प्रतिशतका दरले बढीरहेको भन्दै यसलाई नियन्त्रण गर्न सिंगो समाज सक्रिय हुनु पर्ने बताउनु भयो ।

दुई करोड ३२ लाख बैकिंङ कसुर मुद्दाका फरार घिमिरे पक्राउ

भक्तपुर, ७ असार : बैंकिङ कसुर गरी फरार रहेका एक व्यक्तिलाई प्रहरीले आज पक्राउ गरेको छ ।

पक्राउ पर्नेमा खोटाङ हलेसी नगरपालिका–६ घरभई हाल भक्तपुरको सूर्यविनायक नगरपालिका–५ कटुञ्जे बस्ने ३५ वर्षीय उपेन्द्र घिमिरेलाई महानगरीय प्रहरी बृत्त जगातीको टोलीले पक्राउ गरेको महानगरीय प्रहरी परिसर भक्तपुरका प्रहरी नायब उपरीक्षक राजु पाण्डेले जानकारी दिनु भयो ।

घिमिरेले बिभिन्न १० जना व्यक्तिहरुलाई आफ्नो रकम नभएको बैंक खाताबाट चेक काटी दुई करोड ३२ लाख ४० हजार रुपैयाँ बराबरको बैंकिङ कसुर गरी फरार रहेको उहाँले जानकारी दिनु भयो । पक्राउ गरी प्रहरी बृत्त जगातीको हिरासतमा राखेर घिमिरे माथि थप अनुसन्धान अगाडि बढाएको छ ।

गाडी र साल तथा सल्लाको काठ सहित दुई जना पक्राउ

भक्तपुर, ८ असार । अबैध रुपमा गाडीमा राखेर साल र सल्लाको काठ सहित प्रहरीले दुई जनालाई पक्राउ गरेको छ ।
प्रहरीले सिन्धुपाल्चोक ईन्द्रावती गाउँपालिका–३ बस्ने सवारी चालक ३० वर्षीय प्रबिन ठकुरी र काठ धनी सिन्धुपाल्चोक जुगल गाउँपालिका–४ घर भई हाल काठमाण्डौ मुलपानी बस्ने ३३ वषीृय दानबहादुर सापकोटालाई पक्राउ गरेको महानगरीय प्रहरी परिसर भक्तपुरका प्रहरी नायब उपरीक्षक राजू पाण्डेले जानकारी दिनु भयो ।

आज प्रहरीले भक्तपुर चाँगुनारायण नगरपालिका–९ ब्रम्हायणी चेकप्वाईन्टबाट बा. १८ च. ३१३० नम्बरको बोलेरो गाडीलाई चेकजाँचको क्रममा बिल नभएको उत्तिस, सल्ला, चिलाउनेको अन्दाजी ३, ४ र ७ फिटका चिरेको र नचिरेको गरी २७ थान काठ ल्याएको फेला परेपछि प्रहरीले उनीहरुलाई पक्राउ गरेको हो ।

प्रहरीले नियन्त्रणमा लिएको काठ, गाडी र पक्राउ परेकालाई जिल्ला बन कार्यालय भक्तपुरमा बुझाइएको र बन ऐन अन्तर्गत आवश्यक कारवाही प्रक्रिया अगाडि बढाएको उहाँले जानकारी दिनु भयो ।

बोडेमा साहुको हत्या, चार पक्राउ

भक्तपुर, २९ जेठ । मध्यपुरथिमि नगरपालिका–८ बोडेकास्थानीय ५१ वर्षीय कल्याण साहुको हत्या गरिएको अबस्थामा जेठ २९ गते घर नजिकै टहरामा शव भेटिएको छ ।

काठको फर्माले हानेर हत्या गरेको अबस्थामा बोडेको लर्डबुद्ध स्कुल अगाडि निर्माणाधिन टहरामा साहुको शव घोप्टो परेको अबस्थामा भेटिएको महानगरीय प्रहरी परिसर भक्तपुरका डिएसपी राजु पाण्डेले जानकारी दिनु भयो । घट्ना परिवारबाट भएको हो वा अन्यबाट भन्ने अनुसन्धान भइरहेको जानकारी उहाँले दिनु भयो ।

प्रहरीले घट्नास्थलबाट रगताम्मे भएको फर्मा बरामद गरेको जानकारी दिदै उहाँले हत्या आशंकामा चार जनालाई पक्राउ गरेर अनुसन्धान गरिरहेको प्रनाउ पाण्डेले जानकारी दिनु भयो । प्रहरीले शव पोष्ट मार्डमका लागि शिक्षण अस्पताल दुवाकोट पठाएर अनुसन्धान सुरु गरेको छ ।

ट्याङकरले ठक्करबाट स्कुटर चालकको मृत्यु

भक्तपुर, २३ जेठ : मध्यपुरथिमि नगरपालिका–१ लोकन्थली चोकमा भक्तपुरबाट काठमाडांै तर्फ जादै गरेको बाग्मती प्रदेश ०२–०२५ प. १६२० नं को स्कुटरलाई सोही दिशा तर्फ जादै गरेको बाग्मती प्रदेश ०१–००४ क. ०५८० नं को दुधको ट्याङकरले आज ठक्कर दिदा एकको मृत्यु भएको छ ।

ट्याङकरले ठक्करबाट गम्भिर घाइते स्कुटर चालक काभ्रेपलाञ्चोक बनेपा नगरपालिका–५ बस्ने ४५ वर्षीय नकुल थापाको गठ्ठाघरस्थित नागरिक कम्युनिटी अस्पतालमा उपचारको क्रममा मृत्यु भएको महानगरीय प्रहरी परिसर भक्तपुरका प्रहरी नायब उपरीक्षक राजू पाण्डेले जानकारी दिनु भयो ।

दुर्घटनामा संलग्न सवारी साधन र ट्याङकर चालक भक्तपुर नगरपालिका–२ ब्यासी बस्ने ३५ वर्षीय राजन ब्यान्जुलाई प्रहरी नियन्त्रणमा लिई थप अनुसन्धान कार्य भईरहेको उहाँले जानकारी दिनुभयो ।

गाईको बाछो काटेर मासु भाग लाउदै गरेका मोक्तान पक्राउ

भक्तपुर, २२ जेठ : गाईको बाछो काटेर मासु भाग लगाई रहेको अबस्थामा प्रहरीले मध्यपुरथिमि नगरपालिका–८ बोडेबाट दुईजनालाई पक्राउ गरेको छ ।

पक्राउ पर्नेमा दोलखा काटाकुटी गाँउपालिका–२ घर भई हाल बोडे पाटी बिहार बस्ने ३८ वर्षीय निमा मोक्तानलाई पक्राउ गरेको महानगरीय प्रहरी परिसर भक्तपुरका प्रहरी नायब उपरीक्षक राजू पोण्डेले जानकारी दिनु भयो ।

मध्यपुरथिमि नगरपालिका–८ बोडेस्थित वडा कार्यालयको भवन नजिकै सार्वजनिक शौचालयमा गाईको बाछो काटी मासु भाग लगाई रहेको स्थानीयले जानकारी गराए लगत्तै महानगरीय प्रहरी बृत्त थिमिबाट खटिएको प्रहरी टोलीले मोक्तानलाई गाईको बाछो काटेर मासु भाग लगाई रहेको अबस्थामा २० के.जी गाईको बाछोको मासु सहित पक्राउ गरेको जानकारी दिनु भयो ।

अन्य तीन जनाको खोजी कार्य भइरहेको प्रहरीले जनाएको छ । प्रहरीले आज मोक्तानलाई जिल्ला अदालत भक्तपुर पेश गरि थप अनुसन्धानसहित कारबाही प्रक्रिया अगाडि बढाउने उहाँले जानकारी दिनु भयो ।

सर्वनाम शिक्षालयको यौन दुर्व्यवहार घटना : प्रिन्सिपलसहित दुई शिक्षक पक्राउ

काठमाडौं, २२ जेठ । जोरपाटीस्थित सर्वनाम शिक्षालयमा भएको यौन दुर्व्यवहारकाे घटनामा प्रिन्सिपलसहित थप दुई शिक्षक पनि पक्राउ परेका छन्। होस्टल वार्डेनका रुपमा खटिएका एक व्यक्तिलाई रामेछापबाट पक्राउ गरेको प्रहरीले थप दुई जनालाई पक्राउ गरेको हो।

गोकर्णेश्वर नगरपालिका–६ बाहुनधारास्थित सर्बनाम शिक्षालयमा कक्षा १० मा अध्यनरत १५ वर्षीया किशोरी, कक्षा ७ मा पढ्ने १२ वर्षीया र कक्षा ८ मा अध्यनरत १३ वर्षीया बालिकालाई दुर्व्यवहार गरेको अभियोगमा उनीहरुलाई पक्राउ गरिएको हो।

सुरुमा होस्टलका वार्डेन रामेछाप घर भएका ३५ वर्षीय रामजी बस्नेतलाई शनिबार दिउँसो रामेछाप प्रहरीको सहयोगमा पक्राउ गरिएको थियो। उनलाई शनिबार राति साढे १० बजे रामेछापबाट काठमाडौं ल्याइएको थियो।

यौन दुर्व्यवहारको आरोपमा सर्वनाम शिक्षालयका वार्डेन पक्राउ

काठमाण्डाै, २१ जेठ ।  छात्राहरूमाथि याैन दुर्व्यवहार गरेकाे आराेप लागेका जाेरपाटीकाे सर्वनाम शिक्षालयका वार्डेन पक्राउ परेका छन् ।शिक्षालयका वार्डेन रामजी बस्नेतलाई रामेछाप प्रहरीकाे समन्वयमा पक्राउ गरिएकाे हाे । अहिले उनलाई काठमाण्डाै ल्याउँदै गरिएकाे प्रहरी नायब उपरीक्षक ढुण्डीराज न्याैपानेले जानकारी दिनुभयाे ।

१२, १३ र १५ वर्षीया बालिकालाई वार्डेन रामजी बस्नेतले झन्डै चार महिनाअघि यौन दुर्व्यवहार गरेको विद्यार्थी र अभिभावकको आरोप छ । यसै विषयमा आज शिक्षालयका प्रधानाध्यापक र विद्यार्थी तथा अभिभावकबीच भनाभन हुँदा अवस्था तनावपूर्ण बनेको थियो ।

१५ वर्षसम्म सर्वनाम शिक्षालयमै शिक्षकको रूपमा कार्यरत बस्नेत अहिले वार्डेनको जिम्मेवारीमा रहेको र १५ वर्षमुनिका तीन जना बालिकालाई यौन दुर्व्यवहार गरेको आरोपमा विद्यार्थी र अभिभावक आक्रोशित बनेका न्यौपानेले जानकारी दिनुभयो । पक्राउ परेका बस्नेतमाथि जाहेरी दर्ताको प्रक्रिया सुरु भएको प्रहरीले जनाएको छ ।